2 TESOLONIA 3 - NITI GONTU N.T. (BSI)

Ngunupa Kutope

¹ Kamijapa, anubarmii atañ, ngunupa kutope, niimpalukoda Attoh ka aguñmi nyibya yapa sandopa ho pamiñdopa, nunuka punko hoka lyiniiñ hiilyañpa,

² ho ngunumi aliñdokupa diimmah ho diimmah miyuatañ kokii; niimpalukoda miilañruko henje giima.

³ Hojalo Attoh lotii ke; mo nunumi alḛr giikiñ doke ho nunumi diimmah hokii dagur biikiñ doke.

⁴ Ho ngunu hentiñdo Attoh ko nunu piigopa, niimpalukoda nunu miilado ho drih atañmi miikiñdo nii mina ngunu miito luchinii.

⁵ Attoh nunuka ahha mi Pinii mi hendopa kakiñ nedo ho Kristo ka ranttiniimi.

Miigo Miidopaka Lyiniiñsi

⁶ Siisi ngunu nunumi luduke, anubarmii atañ, ngunu Attoh Jisu Kristo ka armyañ pa, dasa giitolya anubarmii kokii huna assuale pa sandonii ho dumiñ miiju ho miimapa nii mina nunu ngunu kokii lariitiinii.

⁷ Niimpalukoda nunu atoh chindo niihtañ nunu ngunumi katiñ nandu hiila; ngunu assuale pa damato nunu agiñ hoka ngunuka dalyiho,

⁸ ngunu diimato mika yatañmi arie bimapa, hojalo khembii dola ho injobiidola ngunu miito allo ayoh mi, niimpalukoda ngunu nunu kone mitrḛ alluaba madupa.

⁹ Siikasi ngunu hiimi miila kema hiilama, hojalo nunumi ngunuka miijumi bidupa katiñbiidola lutiñnaniiñpa.

¹⁰ Niimpalukoda ngunuka nunuka agiñ hoka dalyi hotiirḛ, ngunu siika miito luniiñ siimi bito: hujalo pa matiirḛ miigo miitema, hiimi diigo diike neyo.

¹¹ Niimpalukoda ngunu hiila tapado nunu hokii tonge assualepa sando hiila, miilu miile miijola, hang miigo miimapa.

¹² Siisi sitañ miyu mi ngunu ludu ho harolupadu Attoh Jisu Kristo ko atoh miigomi miito adu-abiñ mapa ho atoh sango pa injo diito hiila.

¹³ Anubarmii atañ, iche hetrḛ renge lyayo aya miigo ho.

¹⁴ Hu jalo matiirḛ tatema niihna ngunu ludonii siika siiti so, hiika miyu mi kadḛr giitolya, ho hang miilyayo mo agiñho, niimpalukoda mohmi hiinyañ kiine dupa.

¹⁵ Mohmi ahha banii hiilyañ kalya yo, hojalo luluñ tolya anubarmii pa hembiidola.

Kamijapa Luniiñ

¹⁶ Siisi chimie ka Attoh mo atoh loda nunumi kiirañ chimie bikiñcho hikha lembo ho. Attoh nunu miilañ ruka agiñho dabo kencho.

¹⁷ Ngo, Pol, kebiilyi siika ayahelyi luniiñ siimi ngiika atoh alah lo. Siikasi kagiñnaniike ngiika siiti keniiñ tahe abiho; siika kejujaho hoke ngo kedunii.

¹⁸ Ngunu Attoh Jisu Kristo ka aroh-aya nunu miilañruko dokiñcho.