2 TESOLONIA 2 - NITI GONTU N.T. (BSI)

Diimmah Kone

¹ Siisi ngunuka Attoh Jisu ka ahsa niimi ho ngunuka dakuñ saniiñmi mohmi kapa dupa, ngunu nunumi yardu, anubarmii atañ,

² ohepada punyu mi hendḛr lama pa lyiyo malo hempyo yayo, yajiyallo lo malo aguñ lotrḛ, malo siiti ngunukii dalyi hokii siijalo, lubiidola Attoh ka allo ahdo kuke.

³ Kone lotrḛ talubalo kolyayo niilojalo; niimpalukoda hiika allo hii ahkiñ make, nii dahepa chekhonii kapyopa ahtema, ho diimmah miyu hii kakiñtama, nelimyoko ka oho,

⁴ huna chekhodonii ho atohmi assañ siidonii chekhola koneabi pinii hiila gyoko nii hemi malo heriidupa ka puchiniimi, niimpalukoda mo mohka dukomi Pinii ka piniiude ho biidupa hiila, atohmi Pinii ke hiila gyuko siila.

⁵ Nunu henge giimapo siimi ngiika nunuka agiñ hoka dalyiho ngo nunumi siika siimi lukoto?

⁶ Ho nunu chindo niihna mohmi lutiñbiidonii siisi niimpalukoda mohmi mohka myodu ho kakiñ kiine dupa.

⁷ Niimpalukoda michilamanii diimmah atañka miigo miila doku; mo kontii huna lutiñtiinii siimi miikiñ siidonii nii dahepa mo siimi lembo hokii lara biitema.

⁸ Ho diimmah kone mi kakiñ kendoku, ho Attoh Jisu menkiñdo mohmi mohka aguñ ka saniiñlo ho mohmi pyadu lokiñdo mohka kapakola ho ahlyikuho.

⁹ Diimmah koneka ahniiñhii saitan ka miigo miiniiñlo hikha harchichike ho amuhpaka kagiñnanii ho kahotamo agiñho,

¹⁰ ho hikha diimmah golluniilo hutiina lyukiñdonii, niimpalukoda mohlu tamatii jije mika hensa niimi ho lyangur kosa niimi.

¹¹ Hopa Pinii kiiniñtii mohluka hahoho amuh ka tamomi, mohlumi henje kiinedupa niihna jije manii,

¹² niimpalukoda miilañ rumi halii kiine dupa hutiina henje manii jijemi hojalo diimmah hoya hempyo pa sonyadonii.

Nunumi Kahetii Sangopyako pa

¹³ Hojalo ngunu Pinii mi kiirañ payapacho ludopa lyido loda nunu kiipa, anubarmii Attoh ka heniiñja, niimpalukoda Pinii niimi kahetii lotujaho hokii lyangur dupa, Yajiyallo lo dardḛkunii ho henje biidola jijemi.

¹⁴ Siika sipa mo nunumi gyotii ngunuka ayapuyu kiilo, niimpalukoda nunumi labii kiine dupa ngunuka Attoh Jisu Kristo ka tatukatu mi.

¹⁵ Hiikohopa, anubarmii atañ, alḛrpa dato ho miiju mi biito nii mina nunumi ngunu tonsḛr tiinii, aguñ lubiidola malo siiti kebii dola jalo.

¹⁶ Siisi ngunuka Attoh Jisu Kristo mo atoh loda, ho Pinii ngunuka Aba, huna ngunumi hendonii ho ayudahe paka hembyuñ mi ngunumi bitiinii ho aya hentiñ aroh-aya lo,

¹⁷ nunuka ahha mi henjuñ kencho ho hiika atañmi miiko kencho kapane aya miigo ho aguñ pa.