2 TESOLONIA 1 - NITI GONTU N.T. (BSI)

¹ Pol, Silvanas, ho Timoti, Tesolonika daka gyoliñkonii atañmi Pinii ngunuka Aba ho Attoh Jisu Kristo kokii:

² Nunumi aroh-aya ho chimie lulyi Pinii aba ho Attoh Jisu Kristo kokii.

Ayakacho Kaniiñ Kristo ka Ahlyiho

³ Ngunu nunupa kiirañ Pinii mi payapacho ludopa loda lyido, anubarmii atañ, si miisa niisuta, niimpalukoda nunuka henje hempḛr uropa sanchala do, ho nunuka hensunii kone anyañ paka heniiñ hii abuyayado.

⁴ Hopa ngunu atohpa khansudu Pinii ka gyoliñkonii atañ ho niimpalukoda nunuka ranttiniiñ giiko hopa ho henjemi hikha nunumika miihimiire hotiirḛ ho pamyotakho mika nunuka pigii niimi.

⁵ Siikasi jijemi kakiñ naniiñke denki Pinii ka ayakacho kaniiñho, niimpalukoda nunumi khiiniiñpa miikiñcho Pinii ka raddeganda ho, nii pana nunu heruhendanii,

⁶ Pinii sipa bisi kendoke ayakacho kalyiho heru myañka mi huna nunumi herumyanka dopa miitiinii,

⁷ ho nunumi ngunuka agiñho dumo dopa bikiñdo hutiina heru henyatiinii, niida Attoh Jisu dariiganda hokii mohka tamo miidopopi ka agiñho yamu miilyo ho kakiñ kendo,

⁸ herudopa miisi kendo hutiina Pinii mi chimanii ho huna ngunu Attoh Jisu Kristo ka ayapuyu mi taliila miimanii.

⁹ Mohlu heru henkiñdo ayudahe pyadusaniiñ ka pamyo kenkoniimi ho attoh ka dako hokii nengu linko kendo ho mohka tamo ka tatukatu hokii,

¹⁰ niida mo ahchi hiika allo ho mohka piniimiyu atañko assañ kokiñdo, ho aluñ kendo hikha hutiina henje nyadonii, niimpalukoda nunu ngunuka pyakoniimi henjetii.

¹¹ Hiiko hopa ngunu kiirañ nunupa kubidu, niimpalukoda ngunuka Pinii nunumi niihpa gyotii hiipa khiikiñcho hiila, ho miipe kencho kapane aya miigo miichi luniiñmi ho henje ka miigomi mohka harchichike lo,

¹² niimpalukoda Attoh Jisu ka armyañ mi nunuko assañdiilañ kiine dupa, ho nunumi mohko, ngunuka Pinii ka aroh-aya ko jaho ho Attoh Jisu Kristo ko.