2 KORINTIA 6 - NITI GONTU N.T. (BSI)

¹ Mohka agiñho tongepa miihiñsa, ho, ngunu nunumi lubii lyike Pinii ka aroh-aya mi danyo pa impa kiine lyayo.

² Niimpalukoda mo ludo, “Myodu ka khiirii lyiho ngo nunuka luniiñmi tage talyi, ho hembyuñ talyi nunumi sangopyako allo ho.” Kato, siisi ke khiirii niika myodu; kato, siisi ke sangopyako allo.

³ Ngunu kone katrḛ lembo ho miitiñmiiko ma, niimpalukoda ngunuka miigolugo ho hang miikha lukhanii kapa madopa,

⁴ hojalo Pinii ka miira siilyinii ngunu kapakohe lembo ho lusudu: uropa pigii biidola, herumyanka ho, henkhiimilyiñ ho, hachesiire ho,

⁵ hikotii, tunkobiidola, gyupyukobii dola, apo khembii dola, imima dola, haya pibii dola;

⁶ dariipa dala, chimbiidola, pigiibiidola, helakala biidola, Darii Yajiyallo lo, aya hensu niilo,

⁷ lotiipa lubiidola, ho Pinii ka harchichike; denki ka dankho panyi biitola lahbi alah ho lahchi alah pama;

⁸ khiido jalo ho khiima jalo, khiipa dojalo ho assañ dojalo. Ngunu mi gollunii hiila khiitii hojalo jijelunii;

⁹ lusu dokoda chimaniisu, hojalo aya loda chiniiñ; shiila donii, ho kato ngunu turla da; miikhiiñtii, hojalo memma;

¹⁰ heru siido, hojalo kiirañ hempyodo; aroh siido, hojalo abujemi mingo dopa miitii; hang nyima siitrḛ, hojalo kapane hemi biidu.

¹¹ Ngunu nunupa lubilyike, Korint daka miyuatañ; ngunuka ahha mi ngeko bitiike.

¹² Nunumi ngunu lutiñ malyike, hojalo nunu nunuka atoh henju hoke miitiñ siibiidonii.

¹³ Bili lyila ngo nunumi himme hiilyañ hembiidola lulyi-nunuka ahha mitrḛ ngeko bito.

Khiibemiyu lo Miidopaka miiko niimi ka luluñnii

¹⁴ Henjemanii atañka agiñho miiboyo. Niimpalukoda denki la ingyamiigya nyi duhiñ lakiñ dopeha? Malo hutoh la kamo nyi dukuñ siila kendo peha?

¹⁵ Niitañpa Kristo la Igii nyi talii siila kendo? Malo Niitañpa henjebo hii ahiñ siila kendo henjemanii agiñho?

¹⁶ Niitañpa talii lakiñdo Pinii ka piniiude hii miichi niika agiñho? Niimpalukoda ngunu turnii Pinii ka piniiude; Pinii hiila lutii, “Ngo mohluka agiñho dubo monchi ho mohluka agiñho imbo monchi, ho ngo mohluka Pinii, ho mohlu ngiika miyu.

¹⁷ Hopa mohluka agiñ hokii linto ku, ho mohluka agiñ hokii ponsa pa dato, Attoh ludo, ho kacho drih mi tenne yo; ho ngo nunumi larii talyi,

¹⁸ ho ngo nunuka aba pa lyikiñdo, ho nunu ngiika milobo ho nyimii wiinga atañ, Attoh Tamojabo ludo.”