2 KORINTIA 13 - NITI GONTU N.T. (BSI)

Kamijapa ka Luluñniiñ ho Ayahelyi

¹ Siikasi ngiika rohiñ niipaka nunu koka ahniiñ. Niijalo halii talyi anye malo hinge haki dulyi milo hiimi talii tolya.

² Ngo luluñ lyike nunumi hutiina kapyo ho ingyamiigya nyatii nii ho hikha khiibe atañmi, ho ngo siisi mohlumi luluñ lyike nyima jalo, niihtañpa ngiika daho ngo miito ngiika ronye niipaka ahlyi ho, ngo matiirḛ hiira ahkur lyimilo ngo apataku make mohlumi

³ nunu jije siiha hiila chinna nyada ngiimi Kristo lurii do hiila. Mo ajju make nunumi miilyañ dupa, hojalo nunuka uraho tamo lake donii.

⁴ Niimpalukoda mo mi ledatii ajjuho, hojalo turla da Pinii ka harchichikelo. Niimpalukoda ngunu mohko ajjudo, hojalo nunumi miilyañ biidola ngunu mo agiñho turkiñdo Pinii ka harchichikelo.

⁵ Nunu atohmi henka siito, kaka siito nunu nunuka henje mi gabii tola dasuda hiila. Tenka siito nunu atohmi. Nunu hendḛr siimapo Jisu Kristo nunuko da hiila? nii dahepa hiila tama nunu tenka siiko ho miipelama pa lyido!

⁶ Ngo hentiñdo nunu hiila kapanedo ngunu miipelama pa miima hiila.

⁷ Hojalo ngunu hiila Pinii mi kudu nunu miigya mado koda hiila-ngunuka ahniiñsi tenka niimi kapa dupa hiilama, hojalo nunumi niihna jijenii hiimi miike nendupa, ngunu miipelama pa lyisu dojalo.

⁸ Niimpalukoda ngunu jije mi miikho la mudu hiila miila kema, hojalo jije pa kontiisii.

⁹ Niimpalukoda ngunu hempyo do niida ngunu ajju talyi ho nunu tamo talyi. Niina ngunu kudo nii hiikoda nunuka hatachasa niipake.

¹⁰ Ngo siimi ketii ngiika nunu kokiika adho daho, niimpalukoda ngiika ahlyi ho ngo uropa ngiika otority mi miima dopa nii mina Attoh ngiimi bitiinii hata chagii naniiñpa ho miidulodu pamapa.

¹¹ Kamijapa anubarmii atañ, hempyo tolya. nunuka lembo mi miilyañ siitolya, ngiika tonsḛr niimi henge giitolya, kone anyañ mi talii siitolya, chimie pa duhiñ tolya, ho Pinii ka hensunii ho chimie nunuka agiñho dobo kencho.

¹² Ayahensu tolya kone anyañ mi darii mochu siibii dola.

¹³ Hikha piniimiyu atañ nunumi ayahelyi ke.

¹⁴ Attoh Jisu Kristo ka aroh-aya ho Pinii ka hensunii ho Darii Yajiyallo ka dabo monii hikha nunuka agiñho dabo kencho.