2 KORINTIA 10 - NITI GONTU N.T. (BSI)

Pol Mohka Miigo mi Lulyañsiido

¹ Ngo, Pol, ngo loda nunumi yardu, Kristo ka yanu ho ahhakeyiñ mi giitola-ngo huna yanu dunii nunuka agiñ hoka dalyiho, hojalo haro dunii nunupa niida ngo nunu agiñho datema!

² Ngo nunumi yardu ngiika dalyiho ngo kakiñma sitañ haropa nunumi, niihtañpa ngo kakiñdu tonge mi hutiina hemmo nyadonii ngunumi asiialyo ka henchañho hendo hiila.

³ Niimpalukoda ngunu dohadolo so dasu dajalo ngunu dohadolo ka gyambo pajupa pama ke,

⁴ niimpalukoda ngunuka gyambo panananii ka dankho panyi si dohadolo kiitañ make hojalo yajiyallo ka harchichike lo adañpaka punii atañmi pyadu lona naniiñpa.

⁵ Ngunu pyadu lodu chesuniimi ho kapane hentii siila ka Pinii ka chiniiñ mika miitiñ miiko niimi, ho kapane heniiñmi latubiidu Kristo ka luniiñmi tadopa,

⁶ luniiñ tama niimi miikhiiñ dupa hembyola, niidana ngunuka luniiñ taniiñ hii miipe talyinii.

⁷ Kato niihna niika amee ka hataho donii. Mi kone matiirḛ jije ngo Kristo ko da hiila hensu dokoda, hiimi atohmi hempa siido pa miito niihtañpa mo Kristo ko da, hiichulipa ngunu tiirḛ dake hiila.

⁸ Hojalo ngo matiirḛ hentii dokoda ngunuka otority mi iche jalo uro yapa hendo koda, nii mina Attoh bitiinii nunu mika hata chagii naniipa ho nunumi pyadu lodu pamapa, ngo hiinyañ tama.

⁹ Ngo nunumi siiti lo biiso muluñpa miima ke.

¹⁰ Niimpalukoda mohlu luda, “Mohka siiti si anoaya ketii ho chikhodo, hojalo mohka aruñhoka dalyiho ajjudo, ho mohka luniiñsi hang piigo giima.”

¹¹ Sitañ miyu mi chinke nento niihna ngunu siiti ho ludonii ngunuka nyima lyiho, ngunu hiimi miidu dalyiho.

¹² Hiilamake ngunu mohluka ahiñpa lyidupa malo atohmi khiitiñ siila tonge ka agiñ hutiina atohmi assañ siidonii. Hojalo niidana mohlu kone anya mi khiika siichinii, ho kone anyañ mi khiitiñ siichinii, mohlu hang chimapa.

¹³ Hojalo ngunu hentii siitema heleyala, hojalo noh lohena Pinii ngunumi bitiinii ho lohe atii talyi, nunuko lohe pa ahchidupa.

¹⁴ Niimpalukoda ngunu atohmi ile yabiila imake, ngunu nunumi kachi kula lyiku majalo; ngunu ke atujapa ka ahnii hiimkane adho hokiila nunuko Kristo ka ayapuyu agiñho.

¹⁵ Ngunu heleyala hentii siima ke, khiibemiyu ka miigo miiniiñ ho; hojalo ngunuka hentiñ hii hiisuke nunuka henje abuyalyi ho, ngunuka miigo nunukoka doniimi uro yapa kahe kiine dupa,

¹⁶ Niimpalukoda ngunu ayapuyu mi tonsḛrkhenyo dupa nunuka ganda pache dalyi lohepa, mika aji hoka mika miigo miito kula doku niimi hentii siimapa.

¹⁷ “Huna hentii siina donii, Attoh ko hentii siinya kiineto.”

¹⁸ Niimpalukoda siikasi miyu make huna atohmi assañ siidonii taliitiiku hiila, hojalo humina Attoh assañdonii.