2 KORINTIA 1 - NITI GONTU N.T. (BSI)

¹ Pol, Kristo Jisu ka kiiniñkonii Pinii ka henko jaho, ho Timoti ngunuka anu. Pinii ka gyoliñkonii Korint hoka dunii atañmi, hikha piniimiyu atañka agiñho hutiina Akaia ho dunii:

² Aroh-aya ho ngunuka Aba ho Attoh Jisu Kristo kokii chimie dokiñcho nunuko.

Pol Pinii mi Payapacho Ludo

³ Payapacho Pinii ho ngunuka Attoh Jisu Kristo ka Aba mi, aroh ka Aba ho hikha hembyuñ niika Pinii,

⁴ huna ngunumi hembyuñ dunii hikha ngunuka ahiare ho, niimpalukoda ngunu tiirḛ hembyuñ ladopa huna ahiare ho dunii, hiika hembyuñ niilo nii mina ngunu atohpa Pinii lo hembyuñ kotiinii.

⁵ Niimpalukoda ngunu abuje Kristo ka heru henko ho hembo tii, hiichulipa Kristo ko abuje henjuñ mitrḛ hembo kendo.

⁶ Ngunu matiirḛ pamyo batii koda, hiika hii nunuka henjuñ kiipa la sangopyako kiipake; ho ngunu matiirḛ hembyuñ kotii koda, hiika hii nunuka henjuñ kiipake, nii mina nunu henka tiiku nii chimiepa pigii biidola heru heniiñ ahiñlo nii mina ngunu heru hentiinii.

⁷ Ngunuka nunupaka hentiñ hii abyumake; niimpalukoda ngunu chindo nunu ngunuka heru henko ho hembo mondo koda, nunu ngunuka henjuñ hotiirḛ hembo monkiñdo.

⁸ Niimpalukoda ngunu nunumi chimapa dake nena ma, anubarmii atañ, Asia hoka ngunuka pamyotakho heniiñmi ngunumi hiimkane uropa, ho pigiilama dopa nyorpilo ngunu santo kudo hiila tiirḛ henku mato.

⁹ Niimpa, ngunu hento ngunumi shiigo mi bitii ku hiila; hojalo hiika hii henka biikele ngunumi atoh mi hentiñ siima yapa hiila hojalo Pinii mi huna shiinii mi seri dunii;

¹⁰ mo ngunumi hiimkane shiigo lyusanii hokii tupya tiiku, ho mo ngunumi tupya kendo, mohko ngunuka hentiñ naniiñ do ho hiika hii hiira ngunumi tupya kendo.

¹¹ Nunu tiirḛ ngunumi hembyuñ kendo loda kuniiñ lo, niimpalukoda abuje miyu mi ngunu kiipa payapacho hiila luke nendupa ngunu paka abuje kuniiñ mika talii laka biniiñmi.

Pol ka Hemmyonii atañ mika Hengunii

¹² Ngunu ka hentii hii sike, ngunu henju ka pyakonii hiilake niihtañ pana ngunu dohadolo ho datiinii, ho abuyaya nunuka hataho, darii ho pinii henju jaho, kiiddiapiñ ka chila lomapa hojalo Pinii ka aroh-aya lo.

¹³ Niimpalukoda ngunu nunumi hang kema lyike hojalo nii mina nunu puri lakiñ donii ho tala kendo nii hiimi siike; ngo hentiñ do nunu aya loda tala nedo hiila,

¹⁴ niihtañpa nunu tange mi tala do, hiipa nunu ngunupa hentii lakiñdo niihtañpa ngunu nunupa, Attoh Jisu ka allo ho.

¹⁵ Niimpalukoda ngo sipa henjeto, ngo kapyopa niiko ahnañto, niimpalukoda niiko hempyo mi ronye abu yapa dopa;

¹⁶ Ngo nunuko ahnañto ngo Masedonia ho bolyila, ho nunuko ahbii talyi kuke Masedonia hokii ho nunulo Judia ho indu pa hembyuñ kochi.

¹⁷ ngo ludḛr mapa dane peha ngiika siimi ka miichi hiila helyiho? Ngo ngiika miichi hiila hemmyo niimi dohadolo miyu ka henchañho hene peha, ohepada ḛh hiilala ho ma hukula?

¹⁸ Pinii ka lotii nii chulipa, ngunuka aguñ nunupaka ḛh hiiku lala ho ma hiiku make.

¹⁹ Niimpalukoda Pinii ka Oho, Jisu Kristo, humina ngunu nunuka punkoho tonsḛrkhenyo tonii, Silvanas, Timoti ho ngo, hii ḛh la ma nyimaneke; hojalo mohko ḛh adike.

²⁰ Niimpalukoda hikha Pinii ka hemme nii hii mohko ḛh hiido. Hopa niihna ngunu Amen ludu nii mohkokiila, Pinii ka tatukatu kiipa.

²¹ Hojalo siikasi Pinii ke ngunumi nunu agiñho dadopa miidonii Kristo ko, ho ngunumi kiiniñ tiinii;

²² mo mohka tiihonanii lo ngunumi tiihotii ho ngunumi mohka Yajiyallo mi bitii ngunuka ahha ho hentiñ naniiñpa.

²³ Hojalo ngo Pinii mi gyodu ngiipa haki biniipa-siikasi niimi hempa lake ngo Korint hoka ahsa niimi apa lyatiinii.

²⁴ Hiila make ngunu niika henje ka attoh lyidupa hiila; ngunu niika agiñho miigo miidu niika hempyo kiipa, niimpalukoda no niika henje ho alḛrpa da.