1 TESOLONIA 5 - NITI GONTU N.T. (BSI)

Hendila Dunyato Attoh ka Ahniiñpa

¹ Hojalo myodu la myodumyolo nyimi, anubarmii atañ, nunupa hangdrih mi kedopa lyima.

² Niimpalukoda nunu atoh aya loda chindo Attoh ka allo hii diipyoniika ayoh hoka ahchañ ho ahkiñdo hiila.

³ Niida miyuatañ luchi, “Chimie ho hatii doke,” ho aluñpada pyaduloniiñ hii ahkiñdo mohlukoho niihtañpa wiinga akhii achih hii nyimii atañko chihadu wiinga agiñho, ho hiiko hargii ko nyikiñma.

⁴ Hojalo nunu kamo ho dama ke, anubarmii atañ, niimpalukoda hiika allo hii nunumi diipyo nii hiilyañ aluñ dopa miikiñ make.

⁵ Niimpalukoda nunu hikha hutoh ka la allo ka oho atañke; ngunu ayoh kiimake malo kamo kiimake.

⁶ Hopa kiije ngunu imila domasa, khiibe atañka miichañho, hojalo kiije ngunu hurola dusa ho hendila dasa.

⁷ Niimpalukoda huna imi dunii hii ayoho imidu, ho huna tangii nyadunii hii ayoho tangii nyadu.

⁸ Hojalo, ngunu allo kiike, kiije ngunu hendi nyasa, ho giito henje ka habyañsiitiñ la hensu niimi, ho dachañ byopa pa sangopyako ka hentiñ naniiñmi giito.

⁹ Niimpalukoda Pinii ngunumi urohadii kiipa bardiñ kiine make, hojalo sangopyako mi labiikiine dupa ngunuka Attoh Jisu Kristo kiilo,

¹⁰ huna ngunupa shiibi tiinii niimpalukoda ngunu hurodojalo malo imi yado kujalo ngunu mo agiñho dubo mola dopa.

¹¹ Hopa kone anyañmi haro lupa siito ho kone anyañmi pencha siito, nunuka siisi ka miichañho.

Kamijapa ka Lukonii ho Ayahelyi

¹² Hojalo ngunu nunumi yarlyi ke, anubarmii atañ, khiito lya hutiina nunuka punkoho apo khendonii ho Attoh ko nunumi akhopa dagii danii ho nunumi lulyañ giidonii,

¹³ ho mohlumi hempḛr uropa hembiidola khiito lya niimpalukoda mohluka miigo miinii kiipa. Nunuka punkoho Chimie mi doke nentolya.

¹⁴ Ho ngunu nunumi haro lupadu, anubarmii atañ, assumiyu mi lulyañ siigii tolya, hame mi haro lupa giito, ajju mi hembyuñto, miilañ jami pigii tolya.

¹⁵ Hendi tolya nunu kone tiirḛ diimmah pa diimmah miisi lyayo, hojalo kiirañ aya miidupa meto lya kone anyañpa ho miilañ rupa.

¹⁶ Kiirañ hempyoto,

¹⁷ kukañ ari kuto,

¹⁸ niihtañ siijalo payapacho luto; niimpalukoda siikasi Pinii ka heniiñ Kristo Jisu ko nunupa.

¹⁹ Darii Yajiyallo mi byomeyo,

²⁰ nyibuheniiñ mi khiipayo,

²¹ hojalo kapanemi tenka tolya; niihna aya donii hiimi atii biitolya,

²² dasagiito lya kapane diimmah miiju hokii.

²³ Chimie ka Pinii mohloda nunumi hikha darii miikiñcho; ho nunuka yajiyallo ho yallo ho apo mi dariipa atii kencho ho pahañhansa giima dopa Attoh Jisu Kristo ka ahlyikuho.

²⁴ Mo huna nunumi gyodonii lotiike, ho mo siimi miibi kendoke.

²⁵ Anubarmii atañ, ngunupa kuto lyape.

²⁶ Hikha anubarmii atañmi ayahelyi lutolya darii mochu siibii dola.

²⁷ Ngo nunumi lulyike Attoh kiilo siika siiti siimi hikha anubarmii atañka agiñho rito lya.

²⁸ Attoh Jisu Kristo ka aroh-aya nunuka agiñho dokiñcho.