1 TESOLONIA 2 - NITI GONTU N.T. (BSI)

Pol ka Miigomiiniiñ Tesolonika ho

¹ Niimpalukoda nunu atoh chinsudo, anubarmii atañ, ngunuka nunukoka ahniiñ danyo pa impa ma;

² Hojalo ngunu heru hensutiiku ho hiinyañmohi dopa miipa kosu tiijalo Pilipi ho, nunu chindo, ngunu haroto ngunuka Pinii ko nunumi Pinii ka ayapuyu mi luko dopa hempḛr uro cherii niika hataho.

³ Niimpalukoda ngunu yarniiñ miikha nii hokii malo kacho hokii lima, malo siikasi surupiibi la miima;

⁴ hojalo niihtañpa ngunumi Pinii ko taliikaha la ayapuyu mi luniiñpa lutiiku, hopa ngunu ludu, miyu mi hempyo miipa pama, hojalo Pinii mi hempyo miipa dupa huna ngunuka ahha mi tenka dunii.

⁵ Niimpalukoda ngunu pema luta nama surudonyo aguñmi, nunu chindo, malo chahi mi achuñ giipama, Pinii haki pa dake;

⁶ malo ngunu miyu lo assañ kodu pa mema, nunukokii malo khiibe atañ kokii, ngunu rongkoda kunyatiido Kristo ka kiiniñkonii dalyi pa lyila.

⁷ Hojalo ngunu yanu toke nunuka punkoho, niihtañpa himme kaniibo kalyañdu hiika kachañho.

⁸ Hopa, nunumi hempḛr hela, ngunu nunumi ayapuyu mi kontii mapa hojalo ngunu atoh mitrḛ biche siinato, niimpalukoda nunu ngunuka hempḛr heniiñ pa lyidoku.

⁹ Niimpalukoda nunu hempa dudo ngunuka miiniiñ ho apo kheniiñmi, anubarmii atañ; ngunu allo ayoh miigo miito, niimpalukoda ngunu kone mitrḛ nunumi alluaba mi bake nena mato, ngunuka Pinii ka ayapuyu mika nunumika tonsḛrkhenyo lyiho.

¹⁰ Nunu haki ke, ho Pinii tiirḛ, niihtañ darii ho denki ho pahañhansa giima ngunuka henjumiijuho nunu henjenii atañpa;

¹¹ niimpalukoda nunu chindo niihtañpa hiila, aba chuli mohka himme atañ agiñho, ngunu harolupato nunu kone abimi ho nunumi haromiipato ho nunumi khelii to

¹² sango mi Pinii khiiko dopa sando pa, huna nunumi gyotiinii mohka atoh raddegandaho ho tatukatu ho.

¹³ Ho ngunu hiira kiirañ Pinii mi sipa payapacho ludu, niimpalukoda nunuka Pinii ka aguñ mika larii lyiho nii mina nunu ngunu kokii tapa tiinii, nunu siimi talii biine miyu ka aguñ hiila mapa hojalo niihtañpa jije hii do, Pinii ka aguñ, niihna nunu henjenii atañ ko miigo miila donii.

¹⁴ Nunu pake, anubarmii atañ, katiñ naniiñpa lyitiinii Pinii ka gyoliñkonii atañ Jisu Kristo ko niihna Judia ho donii; niimpalukoda nunu heruhentii ahiñ siidapa nunu ganda miyu ahiñ kokii niihtañpa mohlu Jew atañ kokii hentii,

¹⁵ huna anyerumi mentiinii Attoh Jisu la nyibuhenii atañmi, ho ngunumi ago nempalintii, ho Pinii mi herumiipatii ho hikha miyu atañmi chekhotii

¹⁶ ngunumi Midomiyu atañ mika lurii saniiñ mi lutiñ tii mohlumi lyangur kiine saniiñmi-sitañpa kiirañ miiniiñ hiilyañ mohlu miipe biine hikha ingyamiigyaniimi. Hojalo Pinii ka hadii mohluko ahtii kamikalo ho!

Pol ka Mohluko Hiira Ahnañla Lyiniiñ

¹⁷ Hojalo ngunumi nunukokii miipetii, anubarmii atañ, myodu ichuchepa, apo pasu ahha homa, ngunu uroyapa miito uro henga biidola ho hempḛr uro nunumi kadela kapa nala;

¹⁸ niimpalukoda ngunu nunuko hiira-hiira ahnañla lyito-Ngo, Pol, hojalo Saitan ngunumi miitiñ biine.

¹⁹ Niimpalukoda nii ngunuka hentiñnanii malo hempyo malo hentiilaka khansunii tahiñbyopa ngunuka Attoh Jisu mohka ahlyikuho? Siikasi nunu masu peha?

²⁰ Niimpalukoda nunu ngunuka tatukatu ho hempyo.