1 KORINTIA 14 - NITI GONTU N.T. (BSI)

Abuyaya Piigo Yajiyallo Kokii ka Ahmiñ

¹ Hensu niimi miichitalyi hiila nunu hento, ho uropa anna la hento yajiyallo ka ahmiñayiñ mi, luchila lusupakoda nunu nyibuhela dopa.

² Niimpalukoda kone huna khiibe aguñ ludonii hii miyu atañmi lumake hojalo Pinii mike; niimpalukoda kone hetrḛ mo kiimi tachiñ ma, hojalo mo miyu chimanii drih mi Yajiyallo ho ludo.

³ Yoheyapa ludokoda, huna nyibu hendo nii hii miyu mi luriido mohluka aya kiipa ho haro lupado ho myado.

⁴ Huna khiibe aguñ ludonii hii atoh mi lulyañ siido, hojalo huna nyibuhendonii hii gyoliñkonii mi miilyañ giido.

⁵ Siisi ngo miilañ rumi khiibe aguñ lukiñcho hiila hendo, hojalo nyibuheniiñ mi uro yapacho henkiñcho hiila hendo. Huna nyibuhendo nii hii kahe yado khiibe aguñ luniiñmi hento la, nii dahepa mi kone hiimi luko lusi bitema, gyoliñkonii mi miilyañ giidupa.

⁶ Siisi, anubarmii atañ, ngo matiirḛ nunuko ahbiila khiibe aguñpa ludo koda, niihtañpa ngo nunupa aya giikiñdo nii dahepa ngo ahgii tama nyibuheniiñ malo chiniiñ malo nyibuheniiñ malo tonsḛrnii?

⁷ Sango giimanii miina-luna nanii lohepa, ellu chitañ malo berañ chitañ, nii dahepa benna nanii mi bengula bentema, niihtañpa mi kone tala kendo nii mi bendo hiila?

⁸ Ho siirii muniiñ mi matiirḛ tangu lama dopa miido koda, hu henju kendo gyambo padupa?

⁹ Hopa nunu atohpa; nunu matiirḛ khiibe aguñ lo luliñ dokoda hiika hii tadḛr makoda, niihtañpa mi kone tachiñ talyi nii ludo hiila? Niimpalukoda nunu allyi hosu lupa siidonii.

¹⁰ Hemmosanii giima abuje ponsa ponsa aguñ do dohadolo so, ho kone hetrḛ piigo giimanii hiila nyima;

¹¹ hojalo ngo matiirḛ aguñ luniiñmi tala makoda, ngo nyibo pa lyido hiika lunii bopa ho luniibo ngiipa nyibo pa lyido.

¹² Hopa nunu atohpa; nunu uropa yajiyallo ka kakiñ niimi anado, uro yapa meto gyoliñkonii atañ mika sancha giina naniiñpa.

¹³ Hopa, huna khiibe aguñ ludonii kuto lusi naniiñ ka harchichike mi bipe hiila.

¹⁴ Niimpalukoda ngo matiirḛ khiibe aguñ lo kudo koda, ngiika yajiyallo hii kudo hojalo ngiika henju hii ahee higiima.

¹⁵ Nii pe ngo miikiñ donii? Ngo yajiyallo lo kuchi ho ngo punyu lotrḛ kuchi; ngo yajiyallo lo biisie sichi ho ngo punyu lotrḛ sichi.

¹⁶ Hiilamakoda, no matiirḛ kudo koda yajiyallo lo, niihtañpa mi kone ago hoka ahnii luchi “Amen” niika payapacho luniiñmi nii dahepa mo chintema niika luniiñmi?

¹⁷ Niimpalukoda rongkoda no khepa payapacho hiila lusu dudo, hojalo khiibemiyu atañmi miilyañ giima.

¹⁸ Ngo Pinii mi payapacho ludu niimpalukoda ngo nunu miilañrumi uro yapa khiibe aguñ ludu;

¹⁹ hojalopa, gyoliñkonii ho ngo aguñ gongo hesu lusu talyinii ngiika henju lo, jalyañhe khiibe aguñ loka lusa niimi, mihmi kakiñ naniiñpa.

²⁰ Anubarmii atañ, nunuka heniiñ ho himme chitañ heyo; diimmah ho himme pa lyito, hojalo heniiñ ho hengḛr nyato ku.

²¹ Dapo ho hiila keto la do, “Miyu atañka khiibe aguñ lo la nyibo atañka nyachu lo ngo miyu atañmi lurii talyi, ho hojalo mohlu ngiika luniiñmi takiñma, Attoh ludo.”

²² Hopa, khiibe aguñ luniiñsi kagiñnanii ke henjebo atañ pamapa hojalo henje maniibo atañpa, hojalo nyibuheniiñsi henje maniibo atañ pamapa hojalo henjebo atañ pake.

²³ Hopa, matiirḛ, hikha gyoliñkonii dakuñ dala ho khiibe aguñ ludo koda, ho ago hokii malo henjemanii ahdo koda, mohlu lukiñ masu peha nunu rundo hiila?

²⁴ Hojalo matiirḛ hikha nyibuhendo koda, ho henjemanii malo ago miyu ahdo koda, mo miilañ rulo halii kokiñdo, mo miilañ rulo taka kokiñdo,

²⁵ mohka mi chima paka ahha hoka giiniiñmi kakiñ kendo; ho hiila, nyimo chukila, mo Pinii mi herii kendo ho lukiñ do jije Pinii nunu punkoho da hiila.

Gyoliñkonii Hoka Miiju

²⁶ Nii hokoda, anubarmii atañ? Niida nunu ahkuñ talyi, kone abi bariebiisie mi biito, risanii, nyibuheniiñ, khiibe aguñ, malo lusibiniiñ. Hikha drih mi miitolya miilyañ siina naniiñpa.

²⁷ Hu jalo matiirḛ khiibe aguñ ludo koda, hiiko anye kontii luke nento malo abujapa hinge, ho kone kone luri biila; ho kone lusi bito.

²⁸ Hojalo hiiko matiirḛ mi lusi binii nyima koda, kone abi adu mapa dato gyoliñkoniiho ho mohpa la Pinii pa luke nento.

²⁹ Anye malo hinge nyibuhenii mi luke nento, ho khiibe nunu taka to nii ludo hiila.

³⁰ Hoka koneya dunii mi matiirḛ mihukakiñ dokoda, kapyobo adu kumapa dulya bito.

³¹ Niimpalukoda nunu hikha nyibuhela kendoke kone kone herila, hikharu chingii dupa ho miilañru haro lupa siidupa;

³² ho nyibuhengii bo yajiyallo atañ hii nyibuhenii atañka luniiñmi tadu ke.

³³ Niimpalukoda Pinii hempuhenka ka Pinii make hojalo chimie ka Pinii ke. Hikha gyoliñkonii atañ hoka piniimiyu atañ hiilyañ,

³⁴ nyimii atañ adumapa duto gyoliñkonii atañ ho. Niimpalukoda mohlumi ludo pa bimake, hojalo atuyapa dunii pake, dapo lohe ludo.

³⁵ Mohlu matiirḛ hang chinna la lyido milo, mohlumi mohluka millo mi taka kiineto ude ho. Niimpalukoda siikasi nyimii atañpa hiinyañmohi ke gyoliñkonii hoka luniiñsi.

³⁶ Nii! Pinii ka aguñsi nunu kokiiha lintu pa lingii nenii, malo nunuko kontii siiha si ahchi siidonii?

³⁷ Mi kone matiirḛ hendo koda mo nyibuhenii hiila, malo yajiyallo ho danii hiila, mohmi chinke nento niihna ngo ketiinii hii Attoh kokiika miitolya lunii hiila.

³⁸ Mi kone matiirḛ siimi tama koda, mohkiimi tiirḛ talya yo.

³⁹ Hopa, ngiika anubarmii atañ, uropa anala hento nyibuhenii siimi, ho khiibe aguñ luniiñmi luyo hiila lutiñ yo;

⁴⁰ hojalo hikha drih mi miidiko ho miichañ ho miito.