1 JON 4 - NITI GONTU N.T. (BSI)

Jije Yajiyallo la Amuh Yajiyallo

¹ Heniiñja, yajiyallo koneabi mi henje lyayo, hojalo tenka tolya yajiyallo mi siika atañsi Pinii kokii siipeha hiila; niimpalukoda abuje amuh nyibuhenii dohadolo so linya ne.

² Siika silo nunu Pinii ka Yajiyallo mi chila kendoke: yajiyallo koneabi huna pyako donii Jisu Kristo ka asiialyo paka ahniiñsi Pinii kokii,

³ ho yajiyallo kone abi huna Jisu Pinii kokii hiila pyako manii. Siikasi kristokamabo boka yajiyallo, nii mina nunu tapatiinii si ahla do hiila, ho siisi siikasi dohadolo ho doku.

⁴ Himme atu atañ, nunu Pinii kokii ke, ho hiika atañmi pamiñ tiiku; niimpalukoda mo huna nunuka ura ho dunii hii siika dohadolo daka doniimi kaye yake.

⁵ Mohlu dohadolo kiike, hopa niihna mohlu ludonii hii dohadolo kii, ho dohadolo hii mohluka luniiñmi tado.

⁶ Ngunu Pinii kii. Hujalo Pinii mi chindo ngunumi tagedu, ho hii huna Pinii kokii manii ngunuka luniiñmi tama. Siika silo ngunu chindo jije ka yajiyallo mi ho amuh yajiyallo mi.

Pinii Hensu niike

⁷ Heniiñja, kiije ngunu koneanyañ mi hensusa; niimpalukoda hensuniisi Pinii kokiike, ho hii huna hensu donii hii Pinii loka buko niike ho Pinii mi chindo.

⁸ Hii huna hensu manii Pinii mi chima; niimpalukoda Pinii hensu niike.

⁹ Siika so Pinii ka hensu niimi kakiñdo ngunuka punkoho, hiikahii Pinii mohka hiiro kone kontiimi dohadolo so kiiniñ bitii hiila, niimpalukoda ngunu mohkokiila sandupa.

¹⁰ Siika sike hensu nii, hiila ma ngunu Pinii mi hentola hiila hojalo mo ngunumi hentii ho mohka Oho mi kiiniñtii ngunuka ingyamiigya niipa bili bidupa hiila.

¹¹ Heniiñja, Pinii matiirḛ hiimkane ngunumi hentii koda, ngunu tiirḛ kone anyañmi hensu kendo.

¹² Miyu kone hetrḛ Pinii mi ronge tiirḛ kapama; ngunu matiirḛ kone anyañmi hensu dokoda, Pinii ngunu ko giige tola do ho mohka hensunii digoabiaya giido ngunu ko.

¹³ Siika silo ngunu chindo ngunu mohko giigela do ho mo ngunu ko, niimpalukoda mo ngunumi mohka atoh Yajiyallo mi bitii.

¹⁴ Ho ngunu kapa tiiku ho pyakodu Aba mohka atoh Oho mi kiiniñtii dohadolo mika lyangur niipa.

¹⁵ Hujalopa khako talyi Jisu Pinii ka Oho hiila, Pinii mohko giigela do, ho mo Pinii ko.

¹⁶ Hopa ngunu chindo ho henjedu Pinii ka ngunupa heniiñmi. Pinii hensunii, ho hii huna hensu niimi giige donii Pinii ko giigedo, ho Pinii mohko giigela do.

¹⁷ Siika so hensunii hii digoabiaya giido ngunuko, ngunumi hatii ladopa ayakacho kalyiko allo hopa, niimpalukoda mohka danii hiilyañ ngunu tiirḛ siika dohadolo so da.

¹⁸ Hensu niiho hang biiso nyima, hojalo digoabiaya hensunii hii biiso mi mompa do. Niimpalukoda biiso hii miikhiiñnii hosu dosu donii, ho hii huna biiso donii hiika hensunii hii digoabiaya homa.

¹⁹ Ngunu hendu, niimpalukoda mo ngunumi hempyotii.

²⁰ Mihkone matiirḛ ludo koda, “Ngo Pinii mi hendu,” ho mohka atoh anubarmii mi hema dokoda, mo gollunii; niimpalukoda hii huna atoh anubarmii mi hemanii humina kapa la danii, hela kema Pinii mi humina mo kapa manii.

²¹ Ho siika lujubiniiñsi ngunu koka doniisi mohkokii ke, hiikahii huna Pinii mi hendo nii atohka anubarmii mitrḛ hento.