Taitus 1 - Aria New Testament

¹ Ngong Pol ngong Ida Tapol-ngon ila gute bokongon ina gesa e ngong Yesus Krais ila aposel gesa. Iye rere ngong e pagei ngong ngala ngadue osep ka Ida Tapolngon rere isak ila osep ma aitno lisak ila dagar dong dagar. Deka ngadue isak ma tile omur ke pelengon lokono e aitno lisak la dagar ine e tididi Ida Tapolngon ila elio itau.

² Ngaboko ma ngalua aitno lisak ila dagar ma aitno lisak mter ke urok mosongon ka dong vala dong alo ka itodong kap Ida Tapolngon. Oglou oglou ari alo ka Ida Tapolngon dau tapol wan gesa kovok iye wai dagar ma iye kar mosongon tonari ke ite. E iteile iye yakyak kovok.

³ Deka taim ka iye rere kodong iye rere osep leklou ma tinapapra ila omon itau. Deka ke elio langane iye due ila pelengon polou malak ma osep tile omur ine. Deka Ida Tapolngon ka lua ite ke udo elio epmes ina rere ngong ma nganapapra ila omon itau.

⁴ E Taitus ngasogo pas ane uti ke wom. Aitno lite ila dagar eriar e ompolou langka erigu gesa. Nga-waiki Ida Tapolngon ka Pmada kap Ida Luangan Krais Yesus timakai wom e tidue aitno lugom dong epen.

Osep ka tiplau Yesus ila osep

⁵ Oglou alo ka itodong ke aidunu Krit itababrum udo boko-ngon kovok. Deka ngasongon wom omdong ke Krit ma ambabrum bokongon ka dau dong. Ngawaiki emrere osep leklou ma tiplau Yesus ila osep ke armok armok ka tidong ine langka oglou ngawai ke wom ine.

⁶ Emrere osep ka langane. Gute ka iye due elio itau vala ma osep tikaranga tisin elio soulu vri ke iye kovok. E langka iye gi deka ila asap kene vala e langka gute tonari titno tidong deka aitno lisak dagar ke Yesus blang. E titno tididi elio isuk isuk ka soulu ke Ida Tapolngon bitna kovok e tituk sipmarak e titnarak urok pelengon kovok. Kesua langka tidue langane e osep tivati urok elio soulu are itau kovok.

⁷ E emile gute ka plau sios plau Ida Tapolngon ila bokongon. Deka ngawaiki iye due elio itau vala ma osep ka pula keniye tikaranga tivati elio soulu gesa vri ke iye kovok. Aitno mter langka angaine omba e iye karanga pagei osep kovok. E aitno nevlik kovok. Iye inim aki dagar ma bitna balilu kovok. Aitno amnga suong deka iye mluk osep kovok. E aitno vri ke mani vala kovok.

⁸ Iye due elio itau e kere osep ka time ke ila ninu itau. E aitno itau ke elio bitna bitna ka itau vala. E iye plau iye itau. Iye didi elio isuk isuk ka itau e Ida Tapolngon ila elio bitna bitna vala. Iye ile iye itau lama iye due elio soulu.

⁹ Iye kis Ida Tapolngon ila pelengon ka lokono ka oglou osep tiparere iye ine dagar. Iye due langane deka iye karanga parere osep ke pelengon lokono ma osep aitno lisak dagar ine. E iye karanga wai dagar ke osep ka tiwaiki tituk pelengon tonari ma tile omur urok pelengon yakngan vala.

Osep yakngan ina

¹⁰ Emrere osep ka tiplau sios kene kene ke aidunu Krit itau. Kesua Ida Tapolngon ila osep pula ke omur ari urok aiding langka tipul ila pelengon. Tiwai pelengon bitna bitna ka adai e tiyakyak osep ine. Osep leklou tonari urok osua osep Yuda ina. E tiwaiki osep tididi inarak apu langka elio ulangngan ina.

¹¹ Osep are tiparere osep kesua tiwaiki urok mani polou omba ine. E langka tiparere langane tidue elio soulu e tidue agegeng ke osep kap urok osua aitno lisak ila dagar. Deka amdangdang isak ma tiwai pelengon langane kovok.

¹² Oglou kodong gute Krit ina gesa ka iye gute ilengen ina wai langane. “Osep Krit ina isak osep yakngan ina. Isak osep soulu lokono langka ongwa kevena. Isak osep ropo vala e aitno lisak mter ke ngangon ma tingen omba vala.”

¹³ Gute tonari ila pelengon lokono. Deka ngawaiki amwai dagar ke isak e ommosi urok elio ma aitno lisak dagar ke Ida Tapolngon vala.

¹⁴ E tiklingen osep Yuda ina urok alemge bitna bitna kovok. E silang blang tiklingen pelengon dagar ke osep ka tipli Ida Tapolngon ila pelengon kovok.

¹⁵ Langka osep aitno lisak dagar ke Ida Tapolngon deka aitno lisak itau kodong. Deka urok wan bitna bitna keniye dong itau blang. E langka osep tididi elio soulu e aitno lisak dagar ke Yesus kovok urok wan gesa itau kovok. Kesua aitno lisak amum lokono ke Ida Tapolngon bitna e tikaranga tiwade elio itau e elio soulu kovok. Deka wan gesa dong itau ke isak kovok.

¹⁶ Tiwai langane. “Imeile Ida Tapolngon.” E dau urok elio ka tidue iye nisngen langane. Tipul dogur ke Ida Tapolngon kodong. Tididi Ida Tapolngon ila pelengon kovok e tikaranga tididi elio itau gesa kovok. Deka Ida Tapolngon aitno engil lokono ke isak.