Pas ka Pol sogoe uti la ke osep Rom ina 6 - Aria New Testament

Udo mosongon ka itau batne ke Yesus

¹ Aitno lumu lange? Ma itodue elio epmes ina pula kesua itawaiki Ida Tapolngon ila makaingan pula polou ke ite?

² Aurou. Ma itodue elio epmes ina kovok. Kesua itemete kap Yesus kodong. E ma itodue elio epmes ina bitna bitna kovok kesua osep ka timete kodong tikaranga tidue elio epmes ina kovok.

³ Oglou itodue elio paunimngen ina ke Yesus Krais angaine. E elio tonari nisngen langka itogosok Yesus itemete kodong.

⁴ Elio paunimngen ina nisngen eriar langka itogosok Yesus itemete deka osep tiyas ite itesep ke ina denga e itomunu ine. Itomunu ine deka Ida Tapolngon didi ila arit e due ite itogosok Yesus itopoga itetito ke ida denga. Iye due ite itopoga itetito ke ida denga kesua iye waiki ma itedidi elio oku ina vala.

⁵ Langka oglou itogosok Yesus itemete ma Ida Tapolngon due ite itopoga itetito ke ida denga eriar langka oglou iye due Yesus poga tito ke ina denga.

⁶ E silang blang langane. Eriar langka Yesus mana ke ina akai e mete ine ite blang udo elio oglou ina mana e mete kap iye kodong. Udo elio oglou ina mete kap iye. Ma elio tonari ila arit yagos e ma plau ite aling silang blang kovok.

⁷ Kesua osep ka timete kodong elio epmes ina ila arit karanga plau isak blang kovok.

⁸ E silang blang langane. Ite ka itemete kap Yesus aitno lite dagar Ida Tapolngon ma due ite itodong itau blang kap iye.

⁹ Iteile omur oglou alo ka Yesus mete Ida Tapolngon due poga tito ke ina denga. E iye karanga mete aling kene blang kovok. Aurou. Ma iye dong vala dong e metengen ma karanga due aling kene blang kovok.

¹⁰ Yesus mete aling kene vala ma iye mole elio epmes ina ila arit. Iye mole yagos kodong deka Ida Tapolngon due poga tito ke ina denga. E eknikane Yesus due elio ka didi Ida Tapolngon aitno vala.

¹¹ E Ida Tapolngon waiki aitno lumu mter umemete ma elio epmes ina plau umu blang kovok. E silang blang iye waiki ma umodue elio epmes ina bitna bitna aling kene blang kovok. Ida Tapolngon waiki aitno lumu mter umodong kap Yesus Krais e iye waiki umodue elio isuk isuk langka iye due.

¹² Eknikane aitno lumu itau ke elio epmes ina bitna bitna kovok lama iye plau pampamu lumu. Umadangdang ine vala lama umawaiki umodue elio epmes ina bitna bitna blang.

¹³ E umadangdang pampamu lumu lama umodue elio epmes ina bitna bitna ine. Umadangdang pampamu lumu keniye ma umodue elio epmes ina ine kovok. Ida Tapolngon waiki pampamu lumu dong itau vala. Kesua umodong eriar langka osep ka oglou timete deka mase tipoga titito ke inarak denga. Ma umakar pampamu lumu ke Ida Tapolngon ma iye plau isak e ma umodue elio itau ine vala.

¹⁴ Umadangdang elio epmes ina ma iye dong upu puda kovok. Kesua eknikane umedidi elio langka Ida Tapolngon ila makaingan. E umedidi Moses ila sogongon kovok.

Ida Tapolngon waiki elio itau plau ite

¹⁵ Eknikane Ida Tapolngon ila makaingan plau itosep e Moses ila sogongon plau ite kovok. Aitno lumu lange? Ma itodue elio epmes ina pula kesua Moses ila sogongon plau ite kovok? Aurou. Ma itodue elio epmes ina pula langane kovok.

¹⁶ E umeile omur langka umawaiki gute gesa vri mgo ma iye plau umu ma umoklingen ila pelengon e ma umodue ila bokongon. Deka umopolou lumu plaungan tonari ila osep bokongon ina umu. E silang blang langane. Langka umedidi elio epmes ina vala ma elio epmes plau umu e ma umemete ine. E langka umedidi Ida Tapolngon ila elio itau vala ma iye due umu umopolou itau e osuk ke bitna.

¹⁷ Oglou elio epmes ina plau umu e umodue elio epmes ina bitna bitna vala. Mase osep tiparere umu ke Ida Tapolngon ila pelengon deka aitno lumu la dagar ine. Aitno lumu dong dagar ine e ngakakai Ida Tapolngon angaine tito ine.

¹⁸ Ngakakai Ida Tapolngon angaine tito kesua iye klok lumu elio epmes ina e elio epmes ina plau umu kovok. Deka eknikane elio itau vala plau umu.

¹⁹ ­Ma ngakar pelengon ane ke umu ma kere lou pelengon tonari. Kesua lou pelengon tonari lana ine opru umu. Oglou aitno lumu itau ke elio epmes ina bitna bitna vala e umodue elio epmes ina pula ka soulu lokono. E eknikane aitno lumu itau ke elio itau vala. E ngawaiki elio itau plau pampamu lumu vala ma umopolou Ida Tapolngon ila osep ka itau.

²⁰ Oglou elio epmes ina vala plau umu deka umodue elio itau gesa kovok.

²¹ Aurou. Oglou umodue elio epmes ina bitna bitna vala e eknikane umu mnak umu ine. Aitno lumu lange? Lumu elio epmes ina bitna bitna lua umu koke aurou? Aurou. Lumu elio epmes ina bitna bitna lua umu kovok. Kesua osep ka tidue elio epmes ina bitna bitna ma timete ine vala.

²² E eknikane elio epmes ina plau umu kovok. Aurou. Ida Tapolngon klok lumu elio epmes ina kodong deka iye plau umu. Deka umodue elio itau vala. E elio itau ka umodue lua umu ma umopolou osep ka tidong itau e osuk ke Ida Tapolngon bitna. Ma umodong kap Ida Tapolngon e umodue lumu mosongon ka dong vala dong.

²³ E osep ka tidue elio epmes ina bitna bitna ma timete ine. Kesua elio epmes ina ina klingen metengen. E ite ka Ida Tapolngon klok udo elio epmes ina kodong iye kar ite mosongon ka itau ka dong vala dong. Iye lua ite batne ke Ida Puda Yesus Krais dong e itokoli batne la ine kovok.