Pas ka Pol sogoe uti la ke osep Rom ina 13 - Aria New Testament

Ma iteini osep gavman ina urok pelengon

¹ Ite ka pula keniye ma ite-klingen e itedidi osep gavman ina urok pelengon. Iteile Ida Tapolngon rere isak ma tiplau ite e tirere isak ine kovok.

² Deka langka osep tini osep gavman ina urok pelengon kovok tipul pelengon ke osep gavman ina ka Ida Tapolngon rere isak ke urok bokongon. E osep ka tidue langane ma osep gavman ina tikoli urok elio soulu.

³ Osep gavman ina tidong e osep ka tidue elio soulu ma tilim ke isak. E osep ka tidue elio itau vala ma tilim ke isak kovok. Aurou. E langka omdue elio itau vala ma emlim ke osep gavman ina kovok. E ma tikakai angain wom ine.

⁴ Osep gavman ina isak Ida Tapolngon ila osep bokongon ina ma tilua ite. E ma tidue ite ma itodong itau. E langka omdue elio soulu ma emlim ke isak. Kesua osep gavman ina urok arit dong ke isak e tikaranga tidue agegeng ke osep ka tidue elio soulu. Isak Ida Tapolngon ila osep bokongon ina ma tikoli batne ke osep ka tidue elio soulu.

⁵ Deka ma itedidi urok pelengon lama Ida Tapolngon aitno ila engil due ite. E silang blang langane. Ma itedidi urok pelengon kesua iteile Ida Tapolngon waiki itodue langane.

⁶ Ke batne langane umekli takis blang. Kesua osep gavman ina isak Ida Tapolngon ila osep bokongon ina e tiboko dagar ma tiplau urok bokongon tonari.

⁷ E silang blang langane. Umekli takis bitna bitna ka osep gavman ina tiwai ine. E silang blang umodue anit ke osep ka Ida Tapolngon rere isak ke urok bokongon.

Ida Tapolngon waiki osep lana isak pulu

⁸ Umekis gute silang ila wan e batne munu pes umu sakam. Wan kene vala munu pes umu. Ma umu lana umu pulu. Kesua gute ka lana iye ke gute silang are langka iye didi Moses ila sogongon keniye.

⁹ Umeile Moses ila sogongon wai langane. “Umoklou lumu sasap e lumu soboget sakam. Umodue burwa ke gute gesa sakam. Uma-panako wan gesa sakam. Umangale gute gesa ila wan sakam.” Moses ila sogongon ane e pelengon dagar silang isak ka pula keniye urok pelengon la ke pelengon dagar ka kene vala. Pelengon dagar tonari langane. “Ma umu lana umu ke osep leklou langka umu lana umu ke umu tona.”

¹⁰ Gute ka lana iye ke osep ka pula keniye ma due elio soulu ke gute gesa kovok. E langka gute lana iye ke osep ka pula keniye deka lokono iye didi Moses ila sogongon.

¹¹ E ngawai ke umu ma umedidi elio tonari. Kesua umeile omur taim ane ma isuk boto yagos. Deka eknikane ma umodong langka osep ka timunu kudung vala kovok. Umeile alo ka aitno lite la dagar ke Krais are ila baulukngon dau olwo kovok. E eknikane ila baulukngon polou olwo boto kodong.

¹² Isuk boto ma epmes yagos e isuk boto ma oklou tito. Deka wan ka itau ma itosongon udo elio soulu bitna bitna e ma itedidi elio itau vala. E ma elio itau dangdang elio soulu ma elio soulu mole ite kovok.

¹³ Ma itodue elio itau vala eriar langka osep tidue ke osep ka pula amtarsak langka ke oklou. Ma itekepis kovok. E ma iteinim aki dagar ma amtada balilu kovok. Ma itodue okwa kovok e ma itodue wan ulik ulik kovok. Ma itodue amnga kovok e ma aitno lite soulu ke gute silang kovok.

¹⁴ Eknikane iteneklep ke Ida Puda Yesus Krais e itakana ila elio. E aitno lumu mter ke elio soulu ka pampamu lumu waiki due kovok.