Matyu 28 - Aria New Testament

Yesus poga tito ke ina denga

¹ Oklou sabat mela yagos e ke kotkotu lokono ke oklou kene ina ke wik Maria ke Makdala gosok Maria silang isak kla tivati denga.

² E suong orgi omba polou e Ida Puda ila ensel gesa duru ke omur heven e tabulbul opmu la e dong ine.

³ E bitna langka aragu egle e ila klos okou lokono.

⁴ E osep ola ina ka tiplau denga tilim ke iye e tinakarkar e tipolou langka osep ka timete.

⁵ E ensel wai ke apmang orwo langane. “Umelim kovok kesua ngaile umekrim Yesus ka tinilim iye ke ina akai.

⁶ E iye dong ane kovok kesua iye poga tito ke ina denga kodong eriar langka oglou iye wai ine. Umomo e umavati omur ka iye munu ine.

⁷ Deka umala umosuong e umapalongo ila disaipel iye poga tito ke ina denga kodong e iye la mgo ke umu ke omur Galili e ma umavati iye are. Omtomu sisir lou pelengon.”

⁸ Deka tisongon ina denga e isak kla tisuong e aitno lisak nesik e dau tiketir blang. E tisuong ma tipalongo ila disaipel ine.

⁹ E alo ka tisuong Yesus soson isak e wai ke isak langane. “Aitno lumu dong itau.” E tipolou ke iye e tikis kamla e tilotuim iye.

¹⁰ Deka Yesus wai ke isak langane. “Umelim kovok e umala umapalongo lou osua ma isak kla ke omur Galili e ma tivati ngong ari.”

Osep ola ina tiwai ke osep loulou ina

¹¹ E alo ka apmang isak kla ke ila disaipel osep ola ina leklou ka tiplau denga tisep ke armok e tipalongo osep loulou ina ka omba ke wan ka pula keniye ka tipolou.

¹² Deka tiduni pulu kap osep namormor e tilalo pelengon e tikar mani gesa ke osep ola ina tonari.

¹³ E tiwai ke isak langane. “Umawai ke osep langane. ‘Ila disaipel time ke epmes e tidue pampamu ine alo ka imomunu kudung.’

¹⁴ E langka gute ka vri mgo ke osep Rom ina ke omur ane klingen ke elio ane ma imawai ke iye e imomosi pelengon ine ma wan gesa polou ke umu kovok.”

¹⁵ Deka osep ola ina tidue mani tonari e tidue eriar langka osep tiwai ine. E basikngen ane kes lila ke osep Yuda ina la lama oku ane iye dau dong.

Yesus wai ke ila disaipel ke bokongon ka iye waiki tidue

¹⁶ E osep disaipel songotno kene kla ke omur Galili ke gigri ka Yesus wai ine.

¹⁷ E alo ka tivati iye tilotuim iye e dau isak leklou aitno lisak orwo ke iye.

¹⁸ E Yesus polou olwo boto ke isak e wai ke isak langane. “Ida Tapolngon kar arit ka pula keniye ke ngong ma ngaplau wan ka omur heven ina e wan ka taklak ina blang.

¹⁹ Deka umala ke omur ka pula keniye ke taklak e umodue osep tipolou lou disaipel e umapaunim isak ke Upu Tapolngon ka Pmomu angaine e Upu Tapolngon Otno Arang angaine e Ano Itau angaine.

²⁰ E umaparere isak ma tini wan ka pula keniye ka ngawai dagar ke umu ine. E ma ngadong kap umu e ngalua umu aling aling la lama taklak ane yagos.”