Matyu 17 - Aria New Testament

Yesus tarna bublo langka oklou

¹ Mase oklou epmes lumakene mela yagos deka Yesus kap Pita e Jems e ina aiver Jon isak vala titito ke gigri ka apna dong egim.

² E Yesus pampamu ine polou silang ke amtarsak e bitna bublo langka oklou e ila klos polou okou lokono.

³ Deka Moses e Elaija tipolou e osep disaipel tivati isak tiwai kap Yesus.

⁴ Pita vati elio ane e wai ke Yesus langane. “Ipem Puda are itau imodong ane e langka amwaiki ngauri pengau eklu ma ngauri isak. Ma ngauri kene ke wom e kene ke Moses e kene ke Elaija.”

⁵ Alo ka Pita dau wai gaup ka okou lokono kading oklou e kreine me ke gaup ka wai langane. “Gute ane Erigu Arang ka ngong lana ngong ke iye omba e aitno lungong itau lokono ke iye. Umoklingen ila pelengon.”

⁶ E alo ka ila disaipel tiklingen kreine wai tigene e amtarsak pes taklak e tilim ine.

⁷ E Yesus me ke isak e kai isak e wai langane. “Umetito e umelim kovok.”

⁸ E amtarsak tito e tivati Yesus tona vala dong e osep leklou kovok.

⁹ E alo ka tiduru ke gigri Yesus wai dagar ke isak langane. “Umapalongo wan ka umavati ke gigri ke gute gesa kovok la lama Gute Ka Polou Langka Osep poga tito ke ina denga.”

¹⁰ E ila disaipel tipmi iye langane. “Ina lange osep ka tile itau ke Moses ila sogongon tiwai Elaija ma me mgo ke gute ka Ida Tapolngon rere ma iye lua osep?”

¹¹ E Yesus koli wai langane. “Elaija ma me e kere wan keniye.

¹² E ngawai ke umu Elaija me kodong e osep tile ine kovok e tidue wan soulu ka didi aitno lisak ke iye. E eriar langane osep ma tidue pogle ke Gute Ka Polou Langka Osep.”

¹³ Deka Yesus ila disaipel tile iye wai ke isak ke Jon ka paunim osep.

Yesus sapir angelo soulu ke agau

¹⁴ Alo ka tipolou ke osep pula pula gute kene me ke Yesus bitna e grum kamla e wai langane.

¹⁵ “Puda aitno lugom due erigu arang kesua wan due deka iye polou manga manga e namani elio soulu lokono. Aling pula iye gene ke eiou e ke aki.

¹⁶ E ngapaur iye ke lem disaipel e tikaranga tidue polou itau blang kovok.”

¹⁷ E Yesus koli wai ke iye langane. “Umu osep ka umodong oku ane aitno lumu dagar ke Ida Tapolngon kovok e lumu elio soulu. Ma ngadong kap umu tauni? Ngawaiki ngadong kap umu tauni kovok. Ampaur iye ke ngong.”

¹⁸ E Yesus wai dagar ke angelo soulu ka dong ke agau ma songon iye e lokono agau polou itau blang.

¹⁹ Deka osep disaipel kla ke Yesus alo ka iye kene vala dong e tipmi iye langane. “Ina lange imakaranga imasapir angelo soulu tonari kovok?”

^20-21 E Yesus wai ke isak langane. “Umakaranga umasapir iye kovok kesua aitno lumu ila dagar sasi boto vala. Ngawai lokono ke umu. Langka aitno lumu ila dagar daudeng langka mastet londo umakaranga umawai ke gigri ma iye songon omur kene e la ke omur silang e gigri ma la. E ma umakaranga umodue elio keniye ka umawaiki umodue.

Yesus wai aling orwo ina ke ina metengen

²² Tiduni pulu ke omur Galili e Yesus wai ke isak langane. “Osep ma tikar ngong ka Gute Ka Polou Langka Osep ke osep leklou.

²³ E ma timluk ngong ma ngamete e mase oklou eklu mela yagos ma ngapoga ngatito ke ngau denga.” E ila disaipel aitno lisak soulu lokono ine.

Yesus kli takis ke Ida Tapolngon ila ninu

²⁴ E tipolou ke armok Kaper-neam e osep ka tidue takis ka la ke Ida Tapolngon ila ninu la ke Pita e tipmi iye langane. “Lem parerengen kli takis ka la ke Ida Tapolngon ila ninu koke aurou?”

²⁵ E Pita koli wai. “Ee. Iye klie.” E alo ka iye sep ke ninu Yesus wai ke iye langane. “Saimon aitno lugom lange? Osep ka tivri mgo ke omur omur tidue takis ke osep seisei? Tidue takis ke osep matamur koke tidue takis ke osep kaulei?”

²⁶ Alo ka Pita koli wai tidue takis ke osep kaulei Yesus wai langane. “Ma osep matamur tikli takis kovok i?

²⁷ E dau lama osep aitno lisak soulu ke ite amla ke aki e omkngo lodu. E omklok ene ke lodu ka omdue mgo e ma ampado mani. Omdue mani tonari e emkli takis ke wom e ngong ine.”