Mak 16 - Aria New Testament

Yesus poga tito ke ina denga

¹ Deka mase alo ka sabat la yagos Maria ka Makdala ina e Maria ka Jems tna e Salome isak kla tikli wan ka amna itau. Kesua tiwaiki tisake ke Yesus pampamu ine.

² Tikli wan tonari yagos deka tidong tipara ke oklou silang ka iye oklou mgongon ina ke wik. Tipara ma kotkotu lokono deka tisongon armok e isak kla ma tipolou ke Yesus ina denga.

³ Alo ka tididi ekreng tiwai pulu langane. “Opmu ombatno kading Yesus ina denga ina ekreng bitna deka sei ma tabulbul opmu la?”

⁴ Isak dau tididi ekreng la lama tipolou ke Yesus ina denga deka amtarsak la ke ina ekreng bitna. E tivati opmu kading denga ina ekreng bitna kovok.

⁵ Deka tisep ke denga e tivati gute auram ka ila klos okou lokono dong ke denga aitno ke galna ka limsak odung ina. E ansak nesik ke iye.

⁶ Deka gute tonari wai ke isak langane. “Anmu nesik sakam. Umekrim Yesus ka Nasaret ina ka osep tinilim kamla e limla ke ina akai deka iye mete. Oglou pampamu ine munu ane e eknikane amune dong adai kesua iye poga tito kodong.

⁷ Umala umapalongo Yesus ila disaipel keniye e Pita langane. ‘Yesus poga tito ke ina denga e iye mgo ke umu la ke omur Galili. Ma umavati iye blang ke omur tonari eriar langka oglou iye wai ke umu ine.’”

⁸ Apmang tiklingen gute tonari ila pelengon deka tipolou ke dogur e tiulou kla. Kesua tinakarkar omba e ansak nesik. E tipalongo osep leklou ke elio tonari kovok kesua tiulou tarna lisak.

Maria ka Makdala ina vati Yesus

⁹ *Yesus poga tito ke ina denga ke kotkotu lokono ke oklou mgongon ina ke wik. Deka mgongon iye la polou ke Maria ka Makdala ina ka oglou iye sapir angelo soulu lumorwo ka tidong ke aitno tipolou kla.

¹⁰ Iye vati Yesus deka iye la polou ke osep ka oglou tilila kap iye. Alo ka iye palongo osep tonari ine ari dau aitno lisak soulu lokono e tikngis ke Yesus.

¹¹ Osep tonari tiklingen Maria ka Makdala ina ila pelengon e tingelek ine vala.

¹² Mase ke oklou tonari Yesus la polou ke sisrok orwo ka tisongon Jerusalem e tididi ekreng kla. Deka tivati iye langka iye gute silang blang e tivati iye langka oglou tivati iye kovok.

¹³ Tivati iye e ari tile omur ke iye. Deka tipaur pulu e isak kla tipalongo Yesus sisrok ine. Osep tonari tiklingen urok pelengon e tingelek ine blang.

Yesus kar pelengon ke ila disaipel

¹⁴ Mase ila disaipel songotno kene tiduni pulu tidong lelei bota gesa ka tingen inarak ngangon ine. Deka Yesus me polou ke isak deka iluk isak kesua aitno lisak dagar ke ila baulukngon kovok e tingelek ine vala. Iye iluk isak kesua alo ka tiklingen pelengon ke osep ka tivati iye poga tito ke ina denga aitno lisak la dagar ke osep tonari urok pelengon kovok.

¹⁵ Deka Yesus wai ke isak langane. “Umala ke omur ka pula keniye ke taklak e umanapapra Ida Tapolngon ila omon itau ke osep ka pula keniye.

¹⁶ Deka osep seisei ka aitno lisak dagar ine e tididi elio paunimngen ina ma ngalua isak ke urok elio epmes ina. E osep seisei ka aitno lisak la dagar ke ngong kovok ma Ida Tapolngon kot isak ine ke omur hel.

¹⁷ E osep ka aitno lisak me dagar ke ngong ma tidue elio arit ina ka nisngen ke osep amtarsak langane. Ma tisapir angelo soulu ka tidong ke osep batne ke ngong. E ma tiwai ke tokples oku ina ka oglou tile ine kovok batne ke ngong.

¹⁸ Langka tikis mota ka orsak olune soulu ka due osep timete ma timete kovok batne ke ngong. Langka tinim aki soulu ka due osep timete ma timete kovok. Aurou. Ma tidong vala batne ke ngong. Ma limsak tiduru timunu ke osep ka tipaia deka ma osep tonari inarak paiangan yagos batne ke ngong.”

¹⁹ Ida Puda Yesus wai yagos deka iye tito la ke omur heven deka dong ke Ida Tapolngon limla odung.

²⁰ Deka ila disaipel isak kla ke omur ka pula keniye e tinapapra ke osep pula. Deka Ida Puda lua isak ke ila arit e tidue elio arit ina. Deka osep ka tivati elio arit ina ka tidue tile omur urok pelengon lokono. Itau.