Kolosi 1 - Aria New Testament

¹ Ngong Pol e ngong Yesus Krais ila aposel gesa. Ke Ida Tapolngon aitno iye rere ngong gute aposel. Ngong imorwo Timoti ka iye sudo gesa imosogo pas ane.

² Imosogo pas ane uti ke umu ka Ida Tapolngon ila osep ka umodong ke armok Kolosi. Umu ka sipmi aitno lumu ila dagar dong dagar ke Krais. Ida Tapolngon ka Pmada ila makaingan dong kap umu e due aitno lumu dong epen.

Osep Kolosi ina aitno lisak dagar ke Yesus

³ Alo ka imorwo imawai itau ke Ida Tapolngon aling aling aitno limi vri ke umu e imawai tenkyu ke iye ka Ida Puda Yesus Krais timla.

⁴ Kesua imorwo imeklingen pelengon ke umu langane. Ime-klingen aitno lumu la dagar ke Krais Yesus e umu lana umu ke Ida Tapolngon ila osep ka pula keniye.

⁵ Oglou alo ka pelengon lokono ka omon itau polou ke umu deka umoklingen ke wan ka itau lokono ka Ida Tapolngon rere ka dong para ke umu ke omur heven.

⁶ E Ida Tapolngon ila omon itau kes lila la ke omur pula ke taklak e omon tonari due osep ka aitno lisak dagar ine aitno lisak itau e urok elio isuk isuk tipolou itau. Elio ane eriar langka elio ka polou ke umu alo ka aling kene ina umoklingen omon ke Ida Tapolngon ila makaingan e umeile omur ine.

⁷ Gute Epafras iye napapra omon itau ke umu e umeile ine. Epafras iye Krais ila gute bokongon ina ka itau e iye due bokongon eriar langka imi e imi lana imi ke iye lokono. Iye lua umu e due Krais ila bokongon itau.

⁸ Iye palongo limem ke elio ka Ano Itau due umu deka umu lana umu ke Ida Tapolngon ila osep leklou.

⁹ Deka nogrum ke oklou mgongon ina ka imeklingen ke lumu elio itau aling aling imawai itau e imepmi Ida Tapolngon ma iye lua umu ma umeile omur ke aitno. E ma Ano Itau kar umu ilengen itau ma umeile ke elio bitna bitna ka aitno itau ine ma elio tonari bon ke aitno lumu.

¹⁰ Ma umelila ke elio ka Ida Puda waiki umedidie ma aitno itau lokono ke lumu elio. E ma umodue bokongon itau e ma umeile omur ke Ida Tapolngon. Deka aling aling ma lumu ilengen res polou omba.

¹¹ E imorwo imawai itau langane. Alo ka umanamani ke elio ka opru umu imawaiki Ida Tapolngon ila arit omba ka itau lokono lua umu ma umevri dagar ine. E ma aitno lumu dong epen e ma umodong umapara ke alo ka elio ka opru umu polou yagos. E ma aitno lumu itau e aitno lumu neser ine.

¹² Umawai tenkyu ke Pmada ka due umu ma umedidi elio itau la lama iding ke alo ka umodue wan ka itau lokono ka iye rere ke umu. Ma umodue langane kap osep ka Ida Tapolngon ila osep ka tidong ke ila omur ka bublo omba.

¹³ Oglou elio epmes ina ila arit plau ite e eknikane Ida Tapolngon ka iye lana iye ke Otno Arang lua ite ke udo elio epmes ina e due ite itodong ke omur ka Otno Arang plaue.

¹⁴ Ida Tapolngon Otno Arang kli ite ke udo elio epmes ina e klok udo elio epmes ina la.

Pol wai ke Krais ila elio isuk isuk

¹⁵ Itakaranga itavati Ida Tapolngon kovok e dau Otno Arang iye eriar langka Ida Tapolngon. Iye Ida Tapolngon Otno Arang ka ina sirngen e iye mgo ke wan ka pula keniye ka Ida Tapolngon due polou.

¹⁶ Ke Otno Arang ila arit Ida Tapolngon due wan ka pula keniye ke omur heven e ke taklak. Iye due wan ka pula keniye ka itavati e wan ka itakaranga itavati kovok. Wan ka itakaranga itavati kovok ane langka ensel ka urok arit omba e wan langka ano ka urok arit omba blang e wan leklou ka urok arit omba blang. Iye kar arit ke Krais deka Krais tapol wan ka pula keniye e wan ka pula keniye iye tona ila wan.

¹⁷ Alo ka wan ka pula keniye tonari dau polou kovok Krais dong. E iye due wan ka pula keniye dong itau kap iye.

¹⁸ Sios iye Krais pampamu ine e iye mgo ke sios langka otuk ine. E iye mosongon ka itau batne e iye mgo ke osep ka timole inarak denga e iye ma vri mgo ke wan ka pula keniye.

¹⁹ Ida Tapolngon didi aitno deka due ila elio bitna bitna keniye dong ke Otno Arang. Deka Ida Tapolngon ila elio keniye bon ke iye.

²⁰ E Ida Tapolngon Otno Arang due wan ka pula keniye ma tigosok iye tidong aitno lisak kene pulu. Wan ka taklak ina e wan ka omur heven ina. Deka iye songon Krais iye mete ke ina akai e ina marau baser. Ke elio tonari Ida Tapolngon due osep ka pula keniye tidong aitno lisak epen pulu kap iye.

²¹ Oglou umodong mawa ke Ida Tapolngon e aitno lumu mter ke wan ka due umu ina oul. E umu ina oul kesua umodue elio soulu bitna bitna e aitno lumu mter ke elio soulu vala.

²² Deka Krais mete e mana ke ina akai kodong. Ke elio langane Ida Tapolngon due umu umodong aitno lumu epen pulu kap iye. Iye due langane ma lumu elio soulu gesa vri ke umu kovok e umodong itau lokono ke bitna.

²³ E ma umevri dagar ke aitno lumu ila dagar. Lama wan gesa nak umu e umosongon elio ka umapara ke wan itau lokono. Umonogrum umapara ke wan itau lokono alo ka umoklingen omon itau. Osep tinapapra omon itau ke osep ka pula keniye ka tidong ke taklak e ngong Pol ngapolou omon itau tonari ina gute bokongon ina blang.

Pol ila bokongon lua osep sios ina

²⁴ Eknikane aitno lungong itau lokono alo ka nganamani elio ka polou ka opru ngong ma ngalua umu. Elio opru tonari langka elio opru ka Krais namani ka ma lua sios ine e elio opru tonari dau yagos kovok. E ngawaiki ngalua Krais ila sios ka pampamu ine. E ke elio opru ka nganamani ke pampamu lungong ngawaiki ma ngalua sios blang.

²⁵ Ida Tapolngon rere ngong e ngapolou sios ina gute bokongon ina ma ngalua umu. E lou bokongon dong ka nganapapra Ida Tapolngon ila pelengon keniye.

²⁶ Ke oglou pelengon tonari dong kukwop e osep ka pula keniye tile ine kovok. E eknikane iye polou malak kodong ke Ida Tapolngon ila osep.

²⁷ Ida Tapolngon didi aitno e nis ila osep ke pelengon ka oglou dong kukwop ma tile omur ine. Pelengon tonari itau lokono e karanga lua osep ka pula keniye. Pelengon ka kukwop langane. Krais dong kap umu e ma umapara ke iye ma iye me kum umu e umala umodong kap iye ma umodue wan ka pula keniye ka omur heven ina.

²⁸ E imanapapra Krais ila omon itau ke osep keniye. E imedidi ilengen ka itau e imeile omur imawai osuk ke isak e imaparere isak kesua imawaiki ma tineklep ke Krais e tipolou osep ngongle ke aitno lisak ila dagar.

²⁹ Deka ke bokongon tonari ngaboko engil lokono ke Krais ila arit ka omba. Iye lua ngong ke ila arit deka ngaboko ine.