Efesus 1 - Aria New Testament

Pelengon ane la ke osep Efesus ina

¹ Ngong Pol ka Ida Tapolngon rere ngong Krais Yesus ila aposel gesa e ngasogo pas ane. Ngasogoe uti la ke umu ka Ida Tapolngon ila osep ka umodong dagar lokono ke Krais Yesus ka umodong ke armok Efesus.

² Ma ngawaiki Ida Tapolngon ka Pmada e Ida Puda Yesus Krais urok makaingan dong kap umu e due aitno lumu epen.

Ida Tapolngon kere ite kesua batne iteneklep ke Krais

³ Deka ngawaiki itakakai Ida Tapolngon ka Ida Puda Yesus Krais timla angaine tito la ke egim lokono. Kesua batne iye kere ite ke ila kerengen ka itau lokono ka la ke omur heven batne iteneklep ke Krais kodong.

⁴ Oglou oglou ari alo ka Ida Tapolngon dau tapol taklak ka pula keniye kovok iye rere ite ka ila osep kodong ma iteneklep ke Krais. Iye rere ite ma itodong itau lokono e ma elio kene gesa vri lite kovok.

⁵ Oglou ari kodong Ida Tapolngon lana iye ke ite e rere ite titno ite kesua batne iye ile ma Yesus Krais lua ite. Deka iye tona didi aitno e rere ite titno ite.

⁶ E oku ane ngawaiki itakakai Ida Tapolngon angaine tito la egim. Kesua iye didi ila makaingan ka itau lokono e pagei Otno Arang ka iye lana iye omba ke iye me polou lite e itokoli batne la ke iye kovok.

⁷ E Yesus ina metengen e ina marau kli udo elio epmes ina deka elio epmes ina tonari munu pes ite kovok. Deka Ida Tapolngon didi ila makaingan ka ombatno lokono e klok udo elio epmes ina.

⁸ Iye lua ite itau lokono ke ila makaingan ka ombatno lokono. Kesua ila ilengen ombatno e iye ile omur ke wan bitna bitna keniye.

⁹ E iye nis itosep ke elio ka oglou iye waiki due polou ke itosep. Alo ari iye dau kukwop iye ke osep. Deka ari me iding ke alo ka Krais polou ke itosep isak tile ke iye kovok. Mase Krais me polou lite e elio tonari polou malak lokono. E eknikane iteile omur ine.

¹⁰ Oglou Ida Tapolngon rere oklou ka lesen ma wan ka pula keniye ma polou yagos. Deka mase ma iye due polou yagos. E ma iye tona due Krais ma plau ila duengen ka pula keniye. Ma iye plau wan bitna bitna keniye ka dong ke omur ka egim e ma iye plau wan bitna bitna keniye ka dong ke taklak blang.

¹¹ Ida Tapolngon didi aitno ke elio bitna bitna keniye ka iye waiki tipolou. Deka iye due isak keniye tipolou. Oglou iye tona didi aitno e rere imi osep Yuda ina ka imeneklep ke Krais ma imi ila osep imi.

¹² E langane. Imi osua ka mgo ke osep ka aitno lisak dagar ke Krais. Deka imakakai Ida Tapolngon angaine tito la egim ine.

¹³ E umu blang alo ka umo-klingen Ida Tapolngon ila pelengon lokono ka omon itau aitno lumu la dagar ine. Deka Ida Tapolngon lua umu ke lumu elio epmes ina e umeneklep ke Krais. Deka iye tuk Ano Itau me dong ke aitno lumu. Are eriar langka nisngen umu ila osep umu langka oglou iye wai dagar ine.

¹⁴ E langane. Elio ka Ano Itau dong ke aitno lite iye tona nisngen ma mase Ida Tapolngon kere ila osep eriar langka oglou iye wai dagar ine. Ma iye kar wan ka pula keniye ke ila osep ite ka iye waiki kere ite ine. Ma iye me due ite deka ma itodong kap iye. Deka ma itakakai angaine tito la ke egim lokono kesua iye itau lokono.

Pol wai itau ke Ida Tapolngon ma iye lua osep Efesus ina

¹⁵ E langane. Ngaklingen ko-dong ke elio ka aitno lumu ila dagar la ke Ida Puda Yesus e ke elio ka umu lana umu ke Ida Tapolngon ila osep keniye.

¹⁶ Ngaklingen ine deka alo ari me iding ke eknikane oklou aling aling ngakakai Ida Tapolngon angaine ine. Kesua batne lumu elio tonari itau. E alo ka ngawai itau ke Ida Tapolngon ngapmi iye ke umu.

¹⁷ Ngapmi Pmada ka Ida Puda Yesus Krais Ina Tapolngon ka ila bublongon e ila arit ombatno lokono ma iye due Ano Itau ma lua umu ma aitno lumu mter itau ke ila elio itau. Ma Ano Itau nis umu ke Ida Tapolngon ila elio itau ma umeile omur ke iye.

¹⁸ Ngapmi Ida Tapolngon ma iye lua umu ma umeile omur ke pelengon lokono ka ila poloungon batne ke iye. Ma umeile omur ke wan bitna bitna keniye ka Ida Tapolngon waiki kere ila osep ine e itapara ine.

¹⁹ Ma umeile omur ke Ida Tapolngon ila arit ka ombatno lokono ka iye lua ite ka aitno lite dagar ke Krais ine.

²⁰ Ida Tapolngon ila arit ka iye lua ite ine eriar langka ila arit ka due Krais poga tito ke ina denga. Ida Tapolngon due Krais poga tito deka due dong ke limla odung ke omur heven.

²¹ Deka Krais dong ke omur heven e mgo ke ensel e wan ka pula keniye ka tidong ine e iye plau isak. Iye mgo ke osep ka pula keniye ka tidong ke omur omur ke taklak. Iye mgo ke osep ka pula keniye ka tivri mgo ke omur omur. Iye mgo ke osep keniye ka urok arit dong lisak. Iye mgo ke osep ngongle keniye. E angaine ombatno lokono e mole osep ka pula keniye ka eknikane tidong angainsak e osep ka pula keniye ka mase ma tidong angainsak blang.

²² Ida Tapolngon due Krais ila arit polou ombatno lokono deka ila arit mole wan ka pula keniye urok arit. Deka iye plau wan ka pula keniye. Ida Tapolngon due langane ma Krais dong Ida Tapolngon ila osep Inarak Puda.

²³ E ite ka Yesus ila osep itodong eriar langka Krais pampamu ine. E eriar langka Krais dong ke omur ka pula keniye iye dong kap ite ka Yesus ila osep blang.