Aposel 9 - Aria New Testament

Gute Sol aitno la dagar ke Yesus

¹ Alo ari Sol wai iye waiki due agegeng e due burwa ke osep ka aitno lisak dagar ke Ida Puda. Iye waiki due burwa ke Yesus ila disaipel. Deka iye la ke gute loulou ina ka mgo.

² E iye wai langane. “Omsogo pas leklou ma ngakalke isak ngala ke osep Yuda ina urok duningen ina ninu ninu ka tidong ke armok Damaskus.” Deka gute loulou ina tonari sogo ila pas leklou ka wai langane. “Langka gute Sol pado osep arang e apmang ka tididi elio oku ina ma iye pou isak e paur isak time ke Jerusalem.” Iye sogo langane deka kar pas ke Sol.

³ Deka Sol songon Jerusalem e didi ekreng ka tito la ke Damaskus. Iye didi ekreng e polou olwo boto ke Damaskus deka lokono bublongon ka mana ke sirva nevlik e bublo omba duru lelei iye.

⁴ Deka Sol gene duru ke taklak e iye klingen gute gesa wai langane. “Sol Sol ina lange omdue agegeng ke ngong?”

⁵ Deka Sol koli wai langane. “Ngau Puda wom sei?” E gute tonari wai langane. “Ngong Yesus ka omdue agegeng ke ngong.

⁶ Emtito amla emsep ke Damaskus deka ma gute gesa palongo lem ke elio ka ma omdue.”

⁷ Ari osep ka tigosok Sol tiklingen gute gesa ila pelengon vala e tivati gute tonari kovok. Tivri vala e tikaranga tiwai kovok kesua ansak nesik.

⁸ E Sol tito vri ke taklak e bitna pal e dau iye karanga vati wan kovok kesua bitna evin. Deka tikis limla e tipanene iye la ke Damaskus.

⁹ Deka Sol dong ke Damaskus oklou epmes eklu. Ari bitna evin e iye ngen ngangon kovok e inim aki kovok.

¹⁰ Alo ari gute gesa ka didi Yesus dong ke Damaskus ka angaine Ananaias. Iye dong e vati ano deka Ida Puda wai ke iye langane. “Ananaias.” Deka Ananaias koli wai langane. “Ngau Puda ngadong ane.”

¹¹ Deka Ina Puda palongo ila langane. “Emtito amla ke ekreng ka osep tisire ekreng Osuk e ma ompolou ke gute Judas ila ninu deka empmi iye langane. ‘Gute Sol ka armok Tarsus ina dong ge?’ Empmi iye ine kesua Sol dong ke ninu tonari e wai itau ke ngong.

¹² Iye wai itau ke ngong e vati ano e vati gute ka angaine Ananaias polou ke iye e limla duru e kai iye deka bitna polou itau blang.”

¹³ Deka Ananaias koli wai langane. “Ngau Puda osep pula tiwai ke ngong ke gute Sol ila elio soulu. Iye due agegeng pula ke lem osep ka tidong ke Jerusalem.

¹⁴ Osep loulou ina ka omba tikar arit ke iye ma iye pou osep keniye ka aitno lisak dagar ke wom e tiwai itau ke wom e tisir angain wom.”

¹⁵ Deka Ina Puda wai ke iye langane. “Aurou. Amla kesua ngarere iye ma iye polou lou gute bokongon ina. Ma iye napapra ngau basikngen ke osep pula ka isak osep Yuda ina kovok. Ma iye napapra ngau basikngen ke osep pula ka tivri mgo ke omur pula e ke osep Israel ina blang.

¹⁶ Ma nganis iye ke elio soulu pula ka mase iye ma namani kesua batne iye due lou bokongon.”

¹⁷ Deka Ananaias songon ila ninu e la ke ninu ka Sol dong ine e sepe. Deka iye polou ke Sol e limla duru kai iye deka iye wai langane. “Lou aten Sol emklingen. Ida Puda Yesus ka polou ke wom ke ekreng ka emdidie pagei ngong deka ngame ke wom. Iye pagei ngong ke wom kesua iye waiki emtem polou itau blang e ma Ano Itau due aitno lugom e plau wom.”

¹⁸ Iye wai langane deka lokono wan langka sakarkar nesluk ke Sol bitna deka Sol vati omur blang. Deka iye tito e osep tipaunim iye.

¹⁹ Tipaunim iye yagos deka iye ngen ina ngangon e ila arit polou ke iye blang. Alo ari oklou leklou Sol dong kap Yesus ila disaipel ka tidong ke Damaskus.

Sol napapra Yesus ila omon itau

²⁰ Ari Sol la ke osep Yuda ina urok duningen ina ninu leklou e lokono iye napapra ke Yesus e wai langane. “Gute Yesus iye tona Ida Tapolngon Otno Arang.”

²¹ Ari osep ka tiklingen ila pelengon tidigrik ine e tiwai langane. “Oglou gute ane due agegeng ke osep ka tisir Inarak Puda Yesus ka tidong ke Jerusalem. Deka oku ane iye me ke armok ane ma iye pou osep ka aitno lisak dagar ke Yesus deka paur isak ke osep loulou ina ka omba.”

²² E Sol ila arit res polou omba lokono. Iye wai dagar lokono Yesus iye gute ka Ida Tapolngon rere Krais ka lua osep ke urok elio epmes ina. Osep Yuda ina ka tidong ke Damaskus tiklingen ila pelengon e aitno lisak kaka ine. E tikaranga timole ila pelengon kovok.

²³ Sol dong ke Damaskus oklou pula deka osep Yuda ina tilalo pelengon ma tiwaiki tidue burwa ke iye.

²⁴ Deka amtarsak kis dagar ke armok ina ari ina ekreng bitna oklou e epmes. Kesua tiwaiki tidue burwa ke Sol. Ari Yesus ila disaipel tiwai ke iye ine deka iye ile osep tonari aitno lisak.

²⁵ Deka epmes gesa Sol ila disaipel tipaur iye ke armok ina ari ka apna dong egim. Deka Sol sep ke kerka ombatno gesa ka tipou galou ine deka tidue nerir nerir duru la ke taklak deka iye la.

²⁶ Sol songon Damaskus deka duru la ke Jerusalem e waiki neklep ke Yesus ila disaipel e tiulou tarna lisak ke iye. Tiulou tarna lisak ke iye kesua aitno lisak mter iye yak isak e didi Yesus kovok.

²⁷ Deka gute Barnabas due Sol e isak orwo kla ke osep aposel amtarsak deka Barnabas palongo urok langane. “Oglou alo ka Sol didi ekreng iye vati Ida Puda. Iye vati e klingen pelengon ka iye kare ke iye. Mase iye dong ke Damaskus e napapra osep ke Yesus e ulou tarna kovok.”

²⁸ Barnabas wai yagos deka Sol neklep ke Yesus ila disaipel deka iye dong ke Jerusalem. E iye lila ke omur pula ke Jerusalem e napapra osep ke Ida Puda e ulou tarna ine kovok.

²⁹ Iye wai pula e kot pelengon pulu kap osep Yuda ina ka tiwai pelengon Grik. Deka aitno lisak engil ke iye e tiwaiki tidue burwa ke iye.

³⁰ Sol sisrok tile osep tonari aitno lisak deka tipaur Sol duru la ke armok Sisaria deka tipagei iye la ke armok Tarsus.

³¹ Alo ari Ida Tapolngon ila osep ka tidong ke omur Judia e ke omur Galili e ke omur Samaria osep aitno lisak epen ke isak. Ari Ano Itau lua osep tonari e due aitno lisak dagar lokono ke Yesus. Deka osep ka aitno lisak dagar ke Yesus tires tipolou pula. Deka tidong itau e tidue anit ke Inarak Puda.

Pita due elio arit ina

³² Ari Pita lila ke omur pula deka ke langan gesa iye la duru ke armok Lida deka dong kap Ida Tapolngon ila osep are.

³³ Alo ka iye dong ari iye vati gute gesa ka angaine Ainas ka kamla mete. E ari Ainias munu ke ila kova vala tobor lumeklu kodong.

³⁴ Deka Pita wai ke iye langane. “Ainas Yesus Krais lua wom e due kevep tipolou itau blang e oku ane emtito emkere lem kova.” Iye wai langane deka lokono Ainias tito vri.

³⁵ Osep keniye ka tidong ke armok Lida e ke omur Saron ina tivati gute tonari deka isak keniye aitno lisak la dagar ke Ida Puda.

³⁶ Alo ari ke armok Jopa apmang kene dong ka aitno dagar ke Yesus ka angaine Tabita. E langka osep tiwai pelengon Grik deka tisir apmang tonari angaine Dorkas. Apmang tonari ila elio itau lokono. Oklou pula iye due elio itau e kar wan adai ke osep e tidue batne kovok.

³⁷ Apmang dong la lama paiangan gesa due deka iye mete. Deka osep leklou tiris pampamu ine e tidue pampamu ine munu ke eliang ka dong egim.

³⁸ Ari Yesus ila disaipel tiklingen Pita dong ke armok Lida ka dong olwo boto ke Jopa. Deka tipagei osep orwo ke Pita. Tipolou ke iye deka tiwai dagar langane. “Pita omsuong omo kap imi.”

³⁹ Pita klingen urok pelengon deka iye tito e la kap isak. Tididi ekreng e tipolou ke Dorkas ila ninu deka tipaur Pita tito ke ninu ina eliang ka dong egim. Apmang ka sasap batne tivri olwo boto ke Pita e tikngis ke Dorkas deka tinis iye ke klos e molo ka oglou Dorkas due.

⁴⁰ Deka Pita wai ke isak langane. “Umala ke dogur.” Deka tisongon eliang tonari. Pita dau dong ine kap Dorkas pampamu ine deka iye grum kamla e manik duru e wai itau ke Ida Tapolngon. Deka bitna la ke apmang ka mete kodong e iye wai langane. “Tabita emtipa.” Deka Tabita bitna pal e iye vati Pita deka tipa e dong.

⁴¹ Deka Pita kis limla e lua iye tito vri deka Pita gi Ida Tapolngon ila osep ma time tisep ke eliang. Osep tonari leklou isak apmang sasap batne. Deka time tisep ke eliang e tivati Dorkas dong blang.

⁴² Ari elio ane ina omon pakes lila deka osep pula ke armok Jopa aitno lisak la dagar ke Ida Puda.

⁴³ Ari Pita dong oklou pula ke Jopa. Iye dong kap gute Saimon ka boko e due wan ke bulmakau tarna lisak ka tisisie ke bulmakau ka timke isak timete kodong.