2 Timoti 1 - Aria New Testament

¹ Ngong Pol ngong Krais Yesus ila aposel gesa. Ida Tapolngon didi aitno e rere ngong ila aposel. Ma ngawai ke osep ke mosongon oku ina ka dong vala dong. Ida Tapolngon wai promis ma iye kar mosongon oku ina tonari ke osep ka aitno lisak dagar ke Krais Yesus.

² Ngasogo pas ane uti ke wom Timoti ka wom langka erigu ka ngong lana ngong ke wom. Ngawaiki Ida Tapolngon ka Pmada kap Ida Puda Krais Yesus timakai wom e aitno lisak due wom e tidue aitno lugom dong epen.

Ma ite mnak ite ke Ida Tapolngon ila omon itau kovok

³ Oglou lou seia tidue Ida Tapolngon ila bokongon e urok bokongon itau e osuk ke bitna e wan gesa vri ke isak ine kovok. E eknikane ngong blang langane. Aling aling aitno lungong itau ke wan ka Ida Tapolngon due e ke oklou e epmes ngawai itau ke Ida Tapolngon ke wom e omtongu sisir wom.

⁴ Omtongu sisir langka emkngis alo ka itosongon pulu e ngawaiki ngavati wom blang e ngapara ine. Ma aitno lungong neser omba alo ka ngavati wom blang.

⁵ Ngaile omur aitno lugom dagar ke Yesus e aitno lugom orwo ine kovok. Aitno lugom dagar ke Yesus eriar langka lem apa Lois e aiya Yunis.

⁶ E ke batne langane ngawaiki ngawai ke wom ke kerengen ka Ida Tapolngon due dong ke aitno lugom alo ka oglou lungu duru munu ke epem. Ngawaiki omboko dagar ke kerengen tonari ma res polou omba langka gute ipu eiou deka eiou polou omba.

⁷ Emile omur Ida Tapolngon tuktuk Ano Itau me dong ke aitno lite. E ila arit due aitno lite ma itoulou tarna lite ke wan bitna bitna kovok. E ila arit due aitno lite ma ite lana ite ke osep leklou e itaplau ite itau.

⁸ Wom mnak wom ke Ida Puda ila pelengon kovok. Aurou. Amnapapra ine vala. E silang blang wom mnak wom ke elio ka ngadong ke kalabus kovok. Ngadong ke kalabus batne ngapalongo osep ke Ida Puda. E itorwo udo bokongon eriar e langka osep tidue agegeng ke ngong ma tidue langane ke wom blang. E dau Ida Tapolngon ila arit ma lua wom ke lem bokongon.

⁹ Ida Tapolngon lua ite ke udo elio epmes ina kodong e rere ite itodong ila osep ka itau lokono. Iye due langane batne ke elio gesa ka itakaranga itodue kovok. Aurou. Oglou alo ka iye dau tapol wan gesa kovok iye didi aitno e didi ila makaingan e rere ite ma aitno lite la dagar ke Krais Yesus.

¹⁰ Eknikane ila makaingan polou malak lokono batne Ida Luangan Krais Yesus me polou ke ite kodong. E osep ka tiklingen Ida Tapolngon ila omon itau e aitno lisak dagar ine ma metengen mole isak kovok e ma tidue mosongon ka dong vala dong.

¹¹ Ida Tapolngon rere ngong ila aposel gesa ma nganapapra ila omon itau e ngaparere osep ine.

¹² Ngadue bokongon tonari deka ke batne langane osep tidue agegeng ke ngong. E ngong mnak ngong ke bokongon tonari kovok. Kesua ngaile omur ke Ida Luangan ka aitno lungong dagar ke iye. Ngaile omur iye ma plau ila pelengon ka iye kare ke ngong itau lokono la lama iding ke oklou ka wan ka pula keniye yagos.

¹³ Emkis dagar ke pelengon ka ngaparere wom ine e amkana lou elio. Aitno lugom dagar ke Krais Yesus kodong e ngawaiki omdong dagar ine. E ngawaiki wom lana wom ke Ida Tapolngon e ila osep blang.

¹⁴ Ida Tapolngon rere wom ma amnapapra ila omon itau ke osep deka wom amplau omon tonari itau. Ano Itau ka dong ke aitno lite ma lua wom ine blang.

¹⁵ Emile omur osep ka pula keniye ka tidong ke provins Esia tisongon ngong kodong. E gute Figelus e gute Hermogenes tisongon ngong blang.

¹⁶ Ngawaiki Ida Puda due mada ke gute Onesiforus kap ila osua kesua aling pula iye lua ngong e due aitno lungong dong itau. E silang blang ngadong ke kalabus e iye mnak iye ke ngong kovok.

¹⁷ E alo ka iye me ke armok Rom iye krim ke ngong la lama iye pado ngong.

¹⁸ Ngawaiki ma Ida Puda makai iye ke oklou ka Ida Puda wade osep ka pula keniye ine. E emile omur oglou alo ka ngadong ke armok Efesus iye lua ngong itau lokono.