2 Tesalonaika 3 - Aria New Testament

Pol waiki osep Tesalonaika ina tiwai itau ke Ida Tapolngon ke iye

¹ Sipmi. Ngababrum lou pele-ngon langane. Ngawaiki umawai itau ke Ida Tapolngon ma iye lua imi. Ma Ida Puda ila omon itau kes lila suong ke omur omur. E osep aitno lisak la dagar ine eriar langka aitno lumu la dagar ine.

² E imawaiki umawai itau ke Ida Tapolngon ma iye lua imi ma osep soulu bitna tidue agegeng ke imi kovok. Kesua osep leklou aitno lisak dagar ke Yesus ila omon itau kovok.

³ E Ida Puda ila elio langane. Iye wai lokono deka iye didi ila pelengon. E iye ma due umu umevri dagar e plau umu ma Satan karanga due wan soulu ke umu kovok.

⁴ Ida Puda due imi ma imeile langane. Umodue elio ka pula keniye ka imawai ke umu ine ma umodue. E mase aling aling ma umodue langane blang.

⁵ Imawaiki ma Ida Puda lua umu ma umeile langane. Ma umeile omur ke elio ka Ida Tapolngon lana iye ke osep ka pula keniye. E umeile ke elio ka Krais vri dagar alo ka osep tidue elio soulu ke iye. E ma umakaranga umevri dagar ke elio langane blang.

Ida Tapolngon waiki osep ka pula keniye tiboko

⁶ Sipmi. Imedidi Ida Puda Yesus Krais aitno e imawai dagar ke umu langane. Langka sudo gesa tiwaiki tiboko kovok e tidong adai vala e tididi pelengon ka imakare ke isak kovok deka umodong kap isak kovok.

⁷ Umeile oglou alo ka imodong kap umu imoboko vala e imodong adai kovok. Deka umoboko eriar langka imoboko.

⁸ Oglou alo ka imodong kap umu imodue wan bitna bitna ke umu adai kovok. Imekli limem wan bitna bitna vala. Imoboko engil ke oklou e epmes ma imakaranga imekli ipem ngangon. Kesua imawaiki imodue wan gesa ka opru umu kovok.

⁹ Imakaranga imodue wan bitna bitna adai ke umu. E dau imawaiki imodue langane kovok kesua imawaiki imenis umu ke elio itau ma umakana limem elio.

¹⁰ Alo ka imodong kap umu imakar pelengon langane ke umu. Langka gute gesa waiki boko kovok ma iye karanga ngen kovok.

¹¹ E eknikane imeklingen omon ke supmu leklou tidue bokongon kovok e tidong adai vala. E tilila adai vala e tiwaiki tile ke osep leklou urok wan vala.

¹² Deka imedidi Ida Puda Yesus Krais aitno e imawai pelengon dagar ke osep tonari langane. Ma tidong itau e tidue bokongon vala. Deka ma tikaranga tidue inarak ngangon ke urok bokongon.

¹³ E sipmi imawaiki aling aling umodue elio itau vala e umodue ropo kovok.

¹⁴ Langka gute gesa pul dogur ke pelengon ka imosogo ke pas ane deka umavati iye e umeile itau ke iye e umodong mawa ke iye. Umodue langane ma iye mnak iye ke ila elio ka iye due.

¹⁵ E dau imawaiki aitno lumu mter langka gute tonari upu oul kovok. Aitno lumu mter iye langka sudo gesa. E umakar iye pelengon ka lua iye e mosi aitno.

¹⁶ Ngawaiki Ida Puda ka due aitno lite epen ma aling aling iye tona due aitno lumu dong epen ke wan bitna bitna keniye. Ngawaiki Ida Puda dong kap umu ka pula keniye.

¹⁷ Ngong Pol ngasogo angain ngong ke pas ane e ngawai “oklou itau” ke umu. Ngasogo langane ke pas ka pula keniye ka ngasogoe. Iye langka nisngen ke pas ka ngasogoe.

¹⁸ Ngawaiki Ida Puda Yesus Krais ila makaingan dong kap umu ka pula keniye.