2 Tesalonaika 2 - Aria New Testament

Ida Tapolngon ina oul kene ina

¹ Sipmi. Eknikane imawaiki imawai ke umu ke taim ka Ida Puda Yesus Krais ma bauluk me e itoduni pulu kap iye e itodong kap iye. Imawaiki umoklingen itau ke pelengon ka imawai ine e umekis dagar ine.

² Langka osep leklou tiwai Ida Puda ila oklou polou kodong aitno lumu la ke urok pelengon kovok. E anmu nesik sakam. Langka tiwai Ano Itau nis isak ine aitno lumu la ine kovok. Koke tiwai langka imawai ine koke imosogo pas ine aitno lumu la ine kovok.

³ Langka osep tiwaiki tiyak umu ke pelengon langane deka umoklingen ine kovok. Oklou tonari ma polou vala kovok. Aurou. Mgongon osep pula ma tipul dogur ke Ida Tapolngon deka gute ka Ida Tapolngon ina oul kene ina ma polou malak. E mase gute tonari ma kluk ke omur hel.

⁴ Ma iye wai soulu ke wan ka pula keniye ka osep aitno lisak la ine e tisir isak langka inarak tapolngon. Ma iye wai iye omba e isak wan adai vala. E iye ma la ke Ida Tapolngon ila ninu e dong ine e wai langane. “Ngong tona Upu Tapolngon.”

⁵ Oglou alo ka ngadong kap umu ngawai ke umu ke wan tonari. Lange? Omtomu uli ine kodong i?

⁶ E gute tonari polou dau kovok. Kesua wan ka umeile ine dangdang ila ekreng ma iye polou malak dau kovok. Iye ma polou malak alo ka Ida Tapolngon rere ma iye polou.

⁷ E eknikane osep pula tidue elio soulu eriar langka mase gute tonari ma due. E iye polou dau kovok. E mase wan ka dangdang ila ekreng ma dangdange kovok.

⁸ Alo ka wan ka dangdange la deka gute ka Ida Tapolngon ina oul kene ina ma polou malak. E Ida Puda ma bauluk me ke ila bublongon omba e ma iye mluk gute tonari ma iye mete.

⁹ Ida Tapolngon ina oul kene ina ma polou malak e Satan ma lua iye ke ila arit. E ke Satan ila arit iye due elio arit ina bitna bitna ka yakngan ina e ma iye yak osep pula ine.

¹⁰ E iye due elio yakngan ina ka soulu lokono ma iye yak osep pula ma timete deka tikluk ke omur hel. Osep tonari ma tikluk kesua alo ka tiklingen pelengon lokono ka karanga lua isak ke urok elio epmes ina aitno lisak itau ine kovok e la dagar ine kovok.

¹¹ Ke batne langane Ida Tapolngon pagolgol aitno lisak e aitno lisak la dagar ke pelengon yakngan vala.

¹² Deka osep tonari aitno lisak la dagar ke pelengon ka lokono kovok e aitno lisak neser ke elio epmes ina vala. E Ida Tapolngon ma wade isak ine.

Ida Tapolngon rere ite ma aitno lite la dagar ke iye

¹³ Deka sipmi Ida Puda lana iye ke umu e aling aling imawai tenkyu ke Ida Tapolngon ke umu. Ke oglou Ida Tapolngon rere umu ma iye lua umu ke lumu elio epmes ina e umopolou ila osep ka itau lokono. E Ano Itau due umu umopolou Ida Tapolngon ila osep e aitno lumu la dagar ke pelengon lokono vala.

¹⁴ Oglou Ida Tapolngon rere umu e imanapapra omon itau ke umu deka umopolou ila osep ine. Iye rere umu ila osep kesua iye waiki umodong kap iye e umaplau omur kap iye.

¹⁵ E sipmi umevri dagar e aitno lumu la dagar ke pelengon lokono ka imaparere umu ine. Pelengon ka imanapapra ke umu koke imosogoe ke pas ke umu kodong. Deka aling aling umekise dagar.

¹⁶ Ida Puda Yesus Krais iye tona kap Ida Tapolngon ka Pmada isak lana isak ke ite e timakai ite. E tisruk aitno lite ma itodong dagar e itodong itapara ke alo ka Ida Tapolngon ma due ite itodong itau kap iye.

¹⁷ E ngawaiki iye due aitno lumu tipolou dagar lokono e lua umu ma aling aling umodue elio isuk isuk ka itau e umawai pelengon ka itau vala.