2 Tesalonaika 1 - Aria New Testament

¹ Ngong Pol ngagosok Sailas e Timoti imosogo pas ane uti la ke umu ka umodong ke sios ke Tesalonaika. Umeneklep ke Ida Tapolngon ka Pmada e Ida Puda Yesus Krais.

² Ngawaiki Ida Tapol-ngon ka Pmada kap Ida Puda Yesus Krais urok makaingan la ke umu e due aitno lumu epen.

Osep Tesalonaika ina aitno lisak dagar ke Ida Tapolngon

³ Sipmi. Aling aling imawai tenkyu ke Ida Tapolngon e iye sruk aitno limi ma imawai itau ke umu. E elio ane ka itodue iye elio itau. Kesua aitno lumu ila dagar polou dagar lokono e umu lana umu pulu deka aling aling elio langane res polou omba lokono. E Ida Tapolngon waiki itodue elio langane. E ma imakakai Ida Tapolngon angaine tito la egim ine.

⁴ Ke batne langane imapalongo Ida Tapolngon ila osep ke sios kene kene ke lumu elio. Imawai ke elio ka umevri dagar e aitno lumu tidong dagar alo ka osep tidue agegeng ke umu e elio soulu bitna bitna tipolou ke umu ine.

Ida Tapolngon didi aitno e wade osep

⁵ Ke wan ka polou ke umu Ida Tapolngon nis ite langane. Iye didi elio itau vala e wade osep ine e ila wadengen osuk vala. E aitno itau ke umu langka aitno itau ke osep ka iye rere isak ma tikaranga tisep ke ila omur. Ke batne langane umanamani wan soulu bitna bitna.

⁶ E Ida Tapolngon ma due elio osuk langane. Iye ma koli batne ke osep ka tidue agegeng ke umu.

⁷ E ma iye due elio ka osep tidue agegeng ke umu e ke imi blang polou yagos. Ida Tapolngon ma lua ite langane alo ka Ida Puda Yesus kap ila ensel pula ka urok arit omba tisongon omur heven e tipolou malak. Deka iye ma polou ke eiou omba.

⁸ Deka ma iye due agegeng ke osep ka tipul dogur ke Ida Tapolngon e osep ka tididi omon itau ka la ke Ida Puda kovok.

⁹ Ida Tapolngon ma due pogle ke isak ka dong vala dong. E ma iye sapir isak ma tidong mawa ke Ida Puda e ila bublongon e ila arit ka itau lokono.

¹⁰ Alo ka Ida Puda me ila osep ma tidue anit ke iye e tikakai angaine tito la egim. Kesua aitno lite la dagar ke iye e aitno lite itau ke iye. E umu blang ma aitno lumu itau kesua aitno lumu la dagar ke limem pelengon ka imanapapra ke umu.

Pol waiki Ida Tapolngon lua osep Tesalonaika ina

¹¹ Aitno lumu la dagar ke Ida Tapolngon e aling aling imawai itau ke Ida Tapolngon ke umu. Imepmi iye ma iye due umu umakaranga umodue elio itau ka iye waiki umodue. Imawaiki iye lua umu ke ila arit ma umakaranga umodue elio itau keniye ka umawaiki umodue. Umawaiki umodue elio itau kesua aitno lumu la dagar ke Ida Tapolngon.

¹² Alo ka umodue elio langane umakakai Ida Puda Yesus angaine tito la egim. Deka Ida Tapolngon e Ida Puda Yesus Krais urok makaingan la ke umu e due angainmu tito la egim blang.