2 Jon 1 - Aria New Testament

¹ Ngong gute ka ngaplau Ida Tapolngon ila osep e ngasogo pas ane uti ke wom apmang ka Ida Tapolngon rere wom ila apmang e ngasogoe uti ke titim blang. Ngawai lokono langane. Ngong lana ngong ke wom. E osep leklou ka tile pelengon lokono isak lana isak ke wom blang.

² Itodue elio langane kesua pelengon lokono dong ke aitno lite e ma dong vala dong.

³ Ida Tapolngon ila makaingan e ila elio ka aitno due ite e ila elio ka due aitno lite epen dong kap ite. Elio tonari me ke Ida Tapolngon ka Pmada e ke Otno Arang Yesus Krais. Elio tonari batne ke pelengon lokono e ke ila elio ka due ite lana ite ke osep leklou.

Ma ite lana ite ke osep

⁴ Ngaklingen titim leklou tididi pelengon lokono langka Pmada wai dagar ine ma itodue. Ngaklingen langane deka aitno lungong neser omba ine.

⁵ Aiya. Ngawai dagar ke wom langane. Ite lana ite pulu. E pelengon dagar ka ngasogo ane iye pelengon dagar oku ina kovok. Aurou. Pelengon dagar ane pelengon dagar ka iteklingen ine kodong ke oglou lila me ke oku ane.

⁶ Elio ka ite lana ite pulu langane. Itedidi Ida Tapolngon ila pelengon dagar. E ila pelengon dagar ka iteklingen ine kodong langane. Itedidi elio ka ite lana ite pulu.

Ma itekis Ida Tapolngon ila pelengon dagar

⁷ Osep yakngan ina pula isak kla ke omur ka pula keniye ke taklak e tiwai langane. “Yesus Krais me polou langka itosep kovok.” Osep ka tiwai langane isak osep yakngan ina e isak Krais ina oul.

⁸ E umaplau umu itau lama wan ka imoboko engil ine imina ke umu. Umaplau umu itau ma umodue kerengen ka didi lumu bokongon.

⁹ Langka gute gesa kis Krais ila pelengon dagar kovok e didi pelengon silang iye dong kap Ida Tapolngon kovok. E gute ka kis Krais ila pelengon dagar vala dong kap Pmada e Otno Arang.

¹⁰ Langka gute gesa me ke umu e parere umu eriar langka ngaparere umu kovok deka umodue sep ke lumu ninu kovok. E umawai “oklou itau” ke iye kovok.

¹¹ Kesua gute ka wai “oklou itau” ke gute tonari lua iye ke ila elio soulu.

Jon waiki vati isak

¹² Ngawaiki ngawai pelengon pula leklou ke umu e dau ngawaiki ngasogoe ke pas kovok. Ngawaiki ngauti ke umu ma itakaranga itawai pulu. E ngawaiki aitno lite neser omba.

¹³ Ida Tapolngon rere olup iye ila apmang blang deka titno tiwaiki tiwai “oklou itau” ke wom.