1 Timoti 3 - Aria New Testament

Osep ka tiplau Ida Tapolngon ila osep

¹ Pelengon ane lokono. Lang-ka gute waiki polou sios ina plaungan iye waiki due elio itau lokono.

² Gute ka waiki dong sios ina plaungan ma iye didi elio itau vala ma osep tivati elio soulu gesa vri ke iye kovok. E ma esna kene vala. Ma iye dong itau e didi elio itau vala e plau iye itau. E ma iye kere osep kaulei ka time ke ila ninu. E ma iye karanga parere osep ke Ida Tapolngon ila pelengon.

³ E ma iye inim aki dagar ma bitna balilu kovok. Silang blang ma aitno nevlik e due evlei ke osep kovok. E ma aitno itau ke isak e due mada lisak. Ma aitno la ke mani kovok.

⁴ E ma iye plau esna e titno itau ma tiklingen ila pelengon e tinie e tidue anit ke iye.

⁵ Langka gute karanga plau esna e titno kovok ina lange iye karanga plau Ida Tapolngon ila osep?

⁶ Gute ka Kristen oku iye karanga polou sios ina plaungan kovok. Lama aitno mter langka iye gute ka itau lokono e tala kovok. Langka Satan ka tala klingen kovok. Deka ma Ida Tapolngon mulu iye langka iye mulu Satan.

⁷ Langka osep ka tidong ke dogur aitno lisak itau ke gute gesa iye karanga polou plaungan gesa. E langka gute dong langane kovok ane langka iye sin ke Satan ila omdu e ina mnakngan omba.

Osep ka tilua Ida Tapolngon ila osep

⁸ E osep ka titongo ngangon ke osep e tilua isak ke bokongon bitna bitna ma urok elio isuk isuk itau e tiwai pelengon yakngan kovok. Ma tiwai pelengon lokono vala. E tinim aki dagar ma amtarsak balilu kovok. E tidong langka tiwaiki tingale gute silang ila mani kovok.

⁹ E tikis Ida Tapolngon ila pelengon dagar ka nis ite ke aitno lite ila dagar. E ma tile elio ka itau e elio ka soulu e tidue elio ka itau vala.

¹⁰ Mgo ma itawade urok elio isuk isuk. Deka langka urok elio isuk isuk itau ma tikaranga tiboko ke sios.

¹¹ Gute tonari esna blang ma aitno mter ke elio itau ma iye due. E iye due adis e kopuk gute silang dogurne kovok. Iye inim aki dagar ma bitna balilu kovok e boko itau ke wan keniye ka iye due.

¹² Gute ka boko ke sios esna kene vala e ma iye plau esna e titno itau.

¹³ Gute ka boko ke sios e due ila bokongon itau ma osep tidue anit ke iye. E ma iye lim alo ka iye palongo osep ke aitno ila dagar ka la ke Krais Yesus kovok.

Pelengon omba ane la ke aitno lite ila dagar

¹⁴ Ngawaiki ngame ma ngavati wom. E ngaile kovok langka nga-karanga ngame koke aurou deka ngasogo pas ane uti ke wom.

¹⁵ E langka ngame paide kovok amvati pelengon ka ngasogoe ma emile elio itau ka ite ka Ida Tapolngon ila osep itedidie. Ite ka Ida Tapolngon ila osep itodong langka Ida Tapolngon ka dong vala dong ila sios. E sios langka kadanga komdungo ina ka dagar e kis dagar ke Ida Tapolngon ila pelengon.

¹⁶ E iteile langane. Ida Tapolngon ila pelengon langka wan ka omba lokono. Ida Tapolngon nis ite ine langane. Krais polou langka itosep e osep pula tivati iye. E Ano Itau nis ine langane. Ila elio keniye itau lokono e ensel tivati iye. Osep kla tipalongo ila ke osep pula ke omur omur. Deka osep ka taklak ina aitno lisak la dagar ke iye. E Ida Tapolngon due bauluk tito la ke omur Heven e iye dong kap Ida Tapolngon.