1 Tesalonaika 5 - Aria New Testament

Itapara ke alo ka Ida Puda bauluk me

¹ Sipmi. Imakaranga imosogo pelengon gesa ma palongo lumu ke oklou lange ka elio tonari ma polou kovok. Kesua imeile ine kovok.

² Umeile omur Ida Puda ila baulukngon ma suong polou langka gute panakongon ina me panako ke epmes alo ka osep aitno lisak mter ine kovok.

³ Ma osep tiwai langane. “Aitno lite epen pulu e itodong itau e itelim ke wan gesa kovok.” Deka suong paide wan ka due agegeng ke isak ma polou lisak langka apmang ka somugu namani mimi ngen iye. E ma tikaranga tiulou ke elio tonari kovok.

⁴ E sipmi umodong ke aivoro kovok ma umedigrik alo ka oklou tonari polou langka gute digrik langka iye vati gute panakongon ina me kovok.

⁵ Umu osep ka umodong ke oklou e ke bublongon. E itodong ke epmes e aivoro kovok.

⁶ E ngawaiki itodong langka osep epmes ina kovok. Tidong langka osep ka timunu kudung. Ngawaiki itodong langka amtada pal e itaplau ite itau.

⁷ Iteile osep ka timunu kudung timunu ke epmes e osep ka tinim aki dagar ma amtarsak balilu tidue langane ke epmes.

⁸ E itodong ke oklou deka ma iteile ite itau. Eriar langka gute ola ina kis ila osua dagar ma osua kading iye itau deka umekis dagar ke aitno lumu ila dagar e ke elio ka umu lana umu ke osep. E elio ka itapara ma Ida Tapolngon lua ite iye langka hat kapa ka kading gute ola ina otuk ine.

⁹ Ida Tapolngon rere ite ma itanamani aitno ila engil kovok. Iye rere ite ma Ida Puda Yesus Krais lua ite ke udo elio epmes ina.

¹⁰ Yesus mete ma lua ite ma itodong kap iye. Langka itodong koke itemete kodong alo ka iye bauluk me ma itodong kap iye.

¹¹ E umawai pelengon itau pulu ka due aitno lumu dong dagar e umolua pulu ine. Eriar langka eknikane umodue.

Pol babrum ila pelengon

¹² Sipmi. Imekel umu langane. Umodue anit ke osep ka tiboko kap umu. Ida Puda rere isak ma timgo ke umu e tiparere umu ke Ida Tapolngon ila pelengon.

¹³ Umodue anit ke isak e umu lana umu ke isak. Kesua urok bokongon lua umu pula. E aitno lumu dong epen pulu.

¹⁴ Sipmi. Imawai dagar ke umu ma umodue langane. Umawai ke osep ropo bitna ma tidue elio langane sakam e tiboko vala. E umolua osep leklou ka tilim ke wan bitna bitna ma tilim kovok. E umolua osep ka aitno lisak dau dagar kovok ma tipolou dagar. E umawai molil e umodue mada ke osep ka pula keniye.

¹⁵ Langka osep tidue elio soulu ke umu ma umokoli urok elio soulu batne kovok. Aling aling umodue elio itau pulu e umodue elio itau ke osep ka pula keniye.

¹⁶ Aling aling aitno lumu neser.

¹⁷ E aling aling umawai itau ke Ida Tapolngon.

¹⁸ Umeneklep ke Krais Yesus kodong deka Ida Tapolngon waiki umawai tenkyu ke iye ke wansua ka polou ke umu. Langka isak elio itau koke elio soulu.

¹⁹ Langka Ano Itau sruk aitno lumu koke osep leklou aitno lisak ke wan bitna bitna ma umodue wan gesa ka dangdang Ano Itau ine kovok.

²⁰ E langka Ida Tapolngon kar pelengon ke osep deka umepli urok pelengon kovok.

²¹ E umawade itau ke elio bitna bitna e pelengon bitna bitna ma umeile omur langka wan tonari itau koke aurou. E umodue wan ka itau vala.

²² E umopul dogur ke elio soulu ka pula keniye.

²³ Ngawaiki Ida Tapolngon ka due aitno lite epen due umu umopolou itau lokono. E ngawaiki iye kere anmu e aitno lumu e pampamu lumu ma umodong itau lokono. E ma elio soulu gesa vri ke umu kovok alo ka Ida Puda Yesus Krais bauluk me.

²⁴ Ida Tapolngon rere umu kodong deka iye ma due wan tonari polou ke umu. Kesua iye didi ila pelengon ka iye wai ine.

²⁵ Sipmi. Ma umepmi Ida Tapolngon ma iye lua imi.

²⁶ Alo ka umososon Ida Tapolngon ila osep leklou umawai “oklou itau” ke isak.

²⁷ Ngawai dagar ke umu ke Ida Puda angaine langane. Ma umeritim pas ane ke Ida Tapolngon ila osep ka pula keniye.

²⁸ E ngawaiki Ida Puda Yesus Krais ila makaingan dong kap umu.