1 Tesalonaika 4 - Aria New Testament

Ma itodue elio ka Ida Tapolngon aitno itau ine

¹ Sipmi. Ma imababrum limem pelengon ane. Oglou imaparere umu ke elio isuk isuk ka umodue ma Ida Tapolngon aitno itau ine. E umedidi elio tonari kodong. E eknikane imawai dagar ke umu ke Ida Puda Yesus angaine ma aling aling umodue elio langane lokono.

² Umeile pelengon ka imawai lumu ine kodong. Pelengon tonari Ida Puda Yesus ila pelengon.

³ Ida Tapolngon waiki umodue langane. Umodue elio itau vala e umodong itau e umoulou ke elio okwa.

⁴ Umu kenmu kenmu umodong itau kap lumu sasap e umodue elio itau ka Ida Tapolngon e osep blang aitno lisak itau ine.

⁵ Lama pampamu lumu e aitno lumu tipagei umu e umodue okwa langka osep ka tile Ida Tapolngon kovok tidue.

⁶ Umu ma umodue elio soulu ke sudo ka Kristen ke elio tonari kovok. Oglou imawai dagar ke umu ke elio tonari langane. Ida Puda ma koli batne ke osep ka tidue elio soulu langare.

⁷ Ida Tapolngon waiki ite ka ila osep itodue elio soulu kovok. Iye waiki itodue elio itau vala.

⁸ E gute ka pli pelengon ane iye langka pli osep urok pelengon vala kovok. Aurou. Iye pli Ida Tapolngon ka kar Ano Itau ke ite ila pelengon.

⁹ Ngong ma ngasogo pelengon silang blang ke umu ke elio ka umu lana umu ke supmu kovok. Kesua Ida Tapolngon parere umu kodong ke elio ka umu lana umu pulu.

¹⁰ E umodue elio langane kodong ke Ida Tapolngon ila osep ka tidong ke provins Masedonia. E sipmi imawai dagar ke umu ma aling aling umodue elio langane itau lokono.

¹¹ Umoboko engil ma aitno lumu dong epen e umotuk opmu pulu kap osep kovok. E aitno lumu mter ke lumu wan vala kovok. E aitno lumu mter ke osep leklou urok wan bitna bitna. Umoboko ma lumu wan bitna bitna tipolou langka oglou imawai ke umu ine.

¹² Umoboko langane deka lumu wan bitna bitna tidong e ma umepmi osep leklou ma tilua umu kovok. E silang blang osep ka tidong dogur ke sios ma tidue anit ke umu kesua lumu elio itau.

Mase Ida Puda Yesus ma me due ite

¹³ Sipmi. Imawaiki umeile omur ke wansua ka polou ke osep ka timete kodong. Kesua osep leklou tiwai osep ka timete kodong tipoga titito ke inarak denga kovok. E imawaiki aitno lumu kro ke osep ka timete kodong kovok. Aitno lumu kro kovok langka osep ka aitno lisak dagar ke Ida Tapolngon kovok e tipara ke mosongon ka dong vala dong kovok.

¹⁴ Aitno lite dagar langane. Yesus mete e mase iye poga tito e dong blang. Deka aitno lite dagar langane. Yesus ma me deka Ida Tapolngon ma due osep ka aitno lisak dagar ke Yesus ka timete kodong tipoga titito e tidong blang kap Yesus.

¹⁵ Imawai Ida Puda ila pelengon ke umu langane. Alo ka Ida Puda bauluk me ite ka dau itodong ke taklak ane ma itomgo ke osep ka timete kodong kovok.

¹⁶ Alo ari Ida Puda ma songon omur heven e duru ke sirva. E Ida Tapolngon ma daiku omba e ensel ka ila arit omba ma wai omba blang deka Ida Tapolngon ila kuliep ma wai. Deka osep ka aitno lisak dagar ke Yesus e timete kodong ma titito kla mgo.

¹⁷ E alo ari ite ka dau itodong ma itetito itala ke gaup ke sirva kap osep ka pula keniye ari. E ite ka pula keniye ma itososon Ida Puda are. Deka ma itodong kap Ida Puda dong vala dong.

¹⁸ Deka ngawai langane. Sipmi. Umawai pulu ke pelengon ane ma due aitno lumu dong dagar ine e aitno lumu kro kovok.