1 Tesalonaika 2 - Aria New Testament

Pol ila bokongon ke armok Tesalonaika

¹ Sipmi. Umu tona umeile langane. Bokongon ka imodue alo ka imeme ke umu polou adai kovok kesua aitno lumu la dagar ke omon itau.

² Umeile alo ka imeme ke umu dau kovok imodong ke Filipai. E are osep tidue agegeng ke imi e tiwai soulu ke imi. E alo ka imeme ke umu osep pula tiwaiki tidangdang imi ma imanapapra Ida Tapolngon ila omon itau ke umu kovok. E dau Ida Tapolngon due aitno limi dagar lokono e imevri dagar e imanapapra omon itau ke umu.

³ E alo ka imawai ke umu imedidi pelengon yakngan kovok. E imodue elio soulu kovok e imayakyak umu kovok. Aurou.

⁴ E Ida Tapolngon tok imi deka aitno itau ke imi e iye kar imi bokongon ka imanapapra omon itau ke umu. E aitno limi langka imanapapra omon itau ma imodue osep ma aitno lisak itau ke imi kovok. Aurou. Ida Tapolngon wade aitno limi e imawaiki ma aitno itau ke limem bokongon vala.

⁵ Umeile langane kodong. E Ida Tapolngon ma palongo ine langane blang. Imawai pelengon langka dikngen ke umu kovok e silang blang imangale lumu wan deka imawai pelengon itau ke umu kovok.

⁶ E alo ka imoboko imawaiki umu koke osep leklou umakakai angainmi ine kovok. Aurou.

⁷ Lama imi Krais ila aposel leklou e imakaranga imepmi umu ma umolua imi ke wan bitna bitna alo ka imodong kap umu imodue langane kovok. Alo ari imodue mada ke umu. Imodong langka apmang ka kere titno itau.

⁸ Imi lana imi omba ke umu deka imawaiki imanapapra Ida Tapolngon ila omon itau ke umu. E silang blang langka osep tiwaiki tidue agegeng ke imi aitno limi kro ine kovok. Kesua aitno limi itau lokono ke umu.

⁹ Sipmi. Omtomu sisir ke bokongon engil ka imodue alo ka imodong kap umu. Imoboko engil lokono ke oklou e epmes ke wan ka imodue burong ine ma imakaranga imekli limem wan bitna bitna kesua imawaiki imodue elio ka opru umu kovok alo ka imanapapra Ida Tapolngon ila omon itau.

¹⁰ Umeile e Ida Tapolngon blang ile limem elio ka imodue ke umu ka aitno lumu dagar ke Krais. Imodue elio itau vala ke Ida Tapolngon bitna e imodue elio soulu ke umu kovok e gute gesa karanga sin elio soulu vri ke imi kovok.

¹¹ Umeile imodue elio itau ke umu kenmu kenmu eriar langka gute due ke titno. Imawai pelengon ka sruk aitno lumu e ka due aitno lumu dong itau. E imakar umu pelengon ma umodong itau.

¹² Ma umodue elio itau ka Ida Tapolngon aitno itau ine. Iye rere umu ila osep e waiki umodong ke omur ka iye plaue e umavati ila arit e ila bublongon ka omba e umodong ine.

¹³ Aling aling imawai tenkyu ke Ida Tapolngon ke wan bitna bitna ka iye due batne langane. Alo ka imanapapra Ida Tapolngon ila omon itau ke umu deka umodue e aitno lumu la dagar ine langka pelengon tonari gute gesa ila pelengon vala kovok. Aurou. Umodue langka iye Ida Tapolngon ila pelengon. E lokono pelengon ane Ida Tapolngon ila pelengon. E omon tonari lua umu ka aitno lumu dagar ke Krais ke lumu mosongon.

Osep tidue elio soulu ke Ida Tapolngon ila osep

¹⁴ Sipmi. Agegeng polou ke umu eriar langka polou ke Ida Tapolngon ila osep ka tineklep ke Yesus Krais ka tidong ke omur Judia. Lumu osua tidue agegeng ke umu langka osep Yuda ina tidue ke Ida Tapolngon ila osep ka tidong ke omur Judia.

¹⁵ Oglou osep Yuda ina timluk osep napaprangan ina ma timete kodong e silang blang timluk Ida Puda Yesus ma iye mete kodong blang. E tisapir imi ke omur tonari. E aling aling aitno lisak engil ke osep deka Ida Tapolngon aitno soulu lokono ke isak.

¹⁶ E tiwaiki tidangdang imi alo ka imawaiki imanapapra omon itau ke osep ka isak osep Yuda ina kovok. E umeile omon tonari karanga lua isak ke urok elio epmes ina. Deka aling aling osep tonari tidue elio epmes ina deka urok elio epmes ina res polou omba lokono. E eknikane Ida Tapolngon aitno ila engil polou lisak e ma ngen isak.

Pol waiki vati osep Tesalonaika ina blang

¹⁷ Sipmi. Imosongon umu isuk boto vala e aitno limi kro ke umu e imawaiki imavati umu blang. Deka imekrim ekreng ma imabauluk imala ke umu blang.

¹⁸ Imawaiki imala ke umu e aling pula ngong Pol ngawaiki ngala ke umu blang e Satan dangdang imi ine.

¹⁹ E itapara ke alo ka Ida Puda Yesus bauluk me. Alo ka iye bauluk me ma umodue imi ma imapara ke wan itau e imodue sandir ke iye. Umu vala langka limem nisngen ka imodue ila bokongon itau.

²⁰ E langane. Aitno limi itau lokono ke umu e umodue aitno limi neser omba.