1 Jon 2 - Aria New Testament

Krais iye tona Ida Luangan

¹ Lou mimi daudeng. Ngasogo pas ane uti ke umu ma umodue elio epmes ina kovok. E dau langka gute gesa due elio epmes ina gute dong ka loulou ke ite ke Pmada. Iye Yesus Krais ka ila elio itau e osuk.

² Iye tona kli udo elio epmes ina. E iye kli ite tona udo elio epmes ina vala kovok. Aurou. Iye kli osep ka pula keniye ka tidong ke taklak urok elio epmes ina.

³ Langka iteini Ida Tapolngon ila pelengon dagar ka iye kare ke ite deka ma iteile omur langane. Iteile iye.

⁴ Langka gute gesa wai langane. “Ngaile iye.” E dau iye ini ila pelengon dagar kovok iye gute yakngan ina e pelengon ka lokono dong ke iye kovok.

⁵ E langka gute ini ila pelengon deka elio ka iye lana iye ke Ida Tapolngon polou lokono lokono kodong. Langka itodue elio langane deka iteile omur itodong kap iye.

⁶ Gute gesa ka wai iye dong kap Ida Tapolngon io wan ka itau ma iye due elio isuk isuk langka Yesus due alo ka iye dong ke taklak.

⁷ Lou saten. Ngong lana ngong ke umu e ngawai langane. Ngasogo pelengon dagar oku ina ke umu kovok. Aurou. Pelengon dagar ane pelengon dagar ka umeile ine kodong.

⁸ E dau ngasogo pelengon dagar oku ina ke umu blang ka la ke elio lokono ka oglou Yesus due. E elio tonari elio ka umu blang umodue. Kesua wan ka aivoro lila duru e mase yagos e bublongon ka lokono bublo kodong.

⁹ Langka gute gesa wai lang-ane. “Ngadong ke bublongon.” E dau aitno engil ke iye sisrok iye dau dong ke aivoro.

¹⁰ Gute ka iye lana iye ke iye sisrok dong ke bublongon e iye due elio isuk isuk ka due iye gene ke elio epmes ina kovok.

¹¹ E gute ka aitno engil ke iye sisrok dong ke aivoro e lila ke aivoro. E iye ile itau ke omur ka iye la ine kovok kesua iye dong ke aivoro e dong langka bitna evin.

¹² Lou mimi daudeng. Nga-sogo pelengon ke umu kesua Ida Tapolngon sak lumu elio epmes ina batne Krais dong.

¹³ E ngasogo pelengon ke umu ka ngongle kesua umeile kodong ke gute ka dong oglou oglou ari lila me ke eknikane. E ngasogo pelengon ke umu auram aitno e umu pasinga arang oku kesua umomole Satan kodong. E ngasogo pelengon ke umu mimi daudeng kesua umeile Pmada.

¹⁴ Ngasogo pelengon ke umu ngongle kesua umeile kodong ke gute ka dong oglou oglou ari lila me ke eknikane. E ngasogo pelengon ke umu auram aitno e umu pasinga arang oku kesua lumu arit dong e Ida Tapolngon ila pelengon dong ke aitno lumu e umomole Satan kodong.

Aitno lite la ke elio bitna bitna ke taklak kovok

¹⁵ Umu lana umu ke elio bitna bitna koke wan bitna bitna ka taklak ina kovok. Kesua gute ka iye lana iye ke elio bitna bitna ka taklak ina iye lana iye ke Pmada kovok.

¹⁶ Elio bitna bitna keniye ka taklak ina isak langane. Osep aitno lisak mter ke wan ka pampamu lisak waiki due e tingale wan bitna bitna ka tivatie e tiwaiki tikakai angainsak batne ke urok wan vala. Elio tonari batne ke Pmada kovok. Aurou. Batne ke elio ka osep taklak ina tidue vala.

¹⁷ Mase taklak ane e wan ka pula keniye ka taklak ina ma tipolou yagos. E gute ka didi Ida Tapolngon aitno ma dong vala dong.

Krais ina oul kene ina ma polou

¹⁸ Dirgu ngawai ke umu langane. Isuk boto wan ka pula keniye ina yagosngon ma polou. Umoklingen kodong Krais ina oul kene ina ma polou e oku ane osep pula ka isak Krais ina oul tipolou kodong. Elio ane langka nisngen ke wan ka pula keniye isuk boto yagos.

¹⁹ Oglou osep tonari tidong kap ite deka tisongon ite kesua isak udo osua lokono kovok. Langka tidong ke udo osua lokono deka isak dau tidong kap ite. E alo ka tisongon ite ane nisngen tidong ke udo osua lokono kovok.

²⁰ E Ida Tapolngon due Ano Itau sep ke aitno lumu kodong e umu keniye umeile pelengon ka lokono.

²¹ Ngasogo pelengon ane ke umu kovok kesua aitno lungong mter langka umeile pelengon ka lokono kovok. Aurou. Ngosogoe kesua umeile pelengon ka lokono kodong e umeile pelengon ka yakngan karanga polou ke pelengon ka lokono kovok.

²² Gute ka yakngan ina iye gute sei? Iye gute ka wai langane. “Yesus iye gute Krais ka Ida Tapolngon rere ma iye lua osep kovok.” Gute ka wai langane iye Krais ina oul kene ina e iye pul dogur ke Pmada e Ida Tapolngon Otno Arang.

²³ Gute ka pul dogur ke Ida Tapolngon Otno Arang iye dong kap Pmada kovok. E gute ka aitno dagar ke Otno Arang iye dong kap Pmada blang.

Ano Itau parere ite ke pelengon lokono

²⁴ Umekis dagar ke pelengon ka oglou umoklingen ine. Langka umodue langane ma umodong kap Pmada e Otno Arang blang.

²⁵ E Krais wai promis kodong ma iye kar mosongon ka dong vala dong ke ite.

²⁶ Ngasogo pelengon ke umu ma ngapalongo lumu ke osep ka tiwaiki tiyak umu.

²⁷ E Krais kar umu Ano Itau ka dong ke aitno lumu kodong. Deka Ano Itau parere umu ke wan keniye ke pelengon ka lokono e ila parerengen lokono e gesa yakngan kovok. Ano Itau parere umu e parerengen ane karanga ke umu. E gute gesa parere umu langane kovok. E eriar langka iye parere umu deka umodong kap Krais vala.

Itopolou Ida Tapolngon titno ite

²⁸ Deka dirgu umodong kap Krais ma alo ka iye polou malak umodong dagar ke iye e umu mnak umu ke bitna kovok.

²⁹ Umeile omur Krais dong itau e osuk. E osep ka tidue elio isuk isuk ka itau tipolou Ida Tapolngon ila osep kodong.