1 Jon 1 - Aria New TestamentGute ka Ida Tapolngon Ila Pelengon polou malak 1 Imawai ke umu ke gute ka iye Ida Tapolngon Ila Pelengon ka ila mosongon dong ke iye. Gute tonari dong oglou oglou ari alo ka Ida Tapolngon tapol wan ka pula keniye. E imeklingen ke gute tonari e imavati iye e imakai iye. 2 Gute tonari polou malak e imavati iye deka imapalongo lumu ine. Imanapapra umu ke mosongon ka dong vala dong ka oglou dong ke Pmada e eknikane polou malak ke imi. 3 Wan keniye ka imeklingen ine e imavatie imanapapra ke umu ma aitno lumu kene pulu kap imi. E aitno limi kene pulu kap Pmada e Otno Arang Yesus Krais. 4 E imosogo pelengon ane ma elio ka aitno lite neser bon kap ite. Itelila ke Ida Tapolngon ila bublongon 5 Imapalongo lumu ke pele-ngon ka Yesus wai ke imi. Pelengon tonari langane. Ida Tapolngon iye tona bublongon e wan gesa ka aivoro dong ke iye kovok. 6 Langka itawai aitno lite kene pulu kap iye e dau itodue elio epmes ina bitna bitna deka itayak e itedidi pelengon ka lokono kovok. 7 E langka itodue elio itau vala deka itodong ke bublongon langka iye dong ke bublongon. Itodong ke bublongon deka aitno lite kene pulu e Otno Arang Yesus ina marau ris udo elio epmes ina la. 8 Langka itawai elio epmes ina dong ke ite kovok deka itayak ite tona e pelengon ka lokono dong ke ite kovok. 9 E langka itapalongo malak ke udo elio epmes ina deka Ida Tapolngon ma sak isak kla. Ida Tapolngon ila elio langane. Iye didi ila pelengon ka iye wai ine kodong e due elio itau vala. Ma itopolou itau e osuk ke bitna. 10 E langka itawai itodue elio epmes ina kovok ane langka itesir Ida Tapolngon gute yakngan ina e ila pelengon dong ke aitno lite kovok. |
copyright 2003 New Tribes Mission, Sanford, FL 32771
New Tribes Mission