Wahayu 6 - Anegisemee'm Mina Kapuge

Bibinimapi kapuge ekata-pata semai ndoe mee tuma kaa bage em yadasi na mina aoo kidai se mina da

¹ Ku semai ndoe ni waya se dena ko me Dom'mba Yuwa me ko me bibinimapi kapuge me kaa ndaginimapi kao ona me opitai se dema. Ona me opitai ndoe bidimi ku ndo ndigi se dema. Se dena ko iyaao takea se emii waa, wui kuwa, ona me ko wai mina ebo woeke. Wa'm mina ebo woepi me ko ese geemuu tayaa se mina mugo dodo se yema. Ese ebo keo. Kena wa'm mina ebo se woewena ko “Mee!” se mina, mina woeweke.

² Se mina woeweta mugo ndoe, abayai! Kuda kamino ona mitai se dema. Me kuda kamino wa'm iuu epoda ko pode da. Me mugo kuda kamino mitai se dodo ndoe, wa'm duwa da kaa animai mee to wai okaa namba yaatoo nai ae se dema. Kena mee me me wa'm moo kaa kiyoo wa tao yamatana ko ebo toke edaya mee to wa'm daikomiya manaa se kao mugo dodo se yamatai, se dema. Kena wa'm sese ko ese oyu, se ene! Ese yape bage waa mbeedi mbeaseao epi se mee to mugo dodo. Se deta mugo ndoe, yape bage mbeedi mbeaseao kan kiyoo kam batana petai se dema. Se.

³ Ken ndo waa ko Dom'mba Yuwa wai kapuge kaa ndaginimake kao wiya aoo me opitake. Opitana ko iyaao tai se emii to wiya aoo me me, wai “Mee!” se mina woeweke.

⁴ “Mee!” se mina woewena ko waya kuda kamino mitai se dema. Wa'm iuu epoda ko emo da. Ese bidea gida epoda mugo dodo se dema. Kena wa'm duwa da kaa animai mee to me namba aoo. Kena wa tao manina ko ese em'mbee yape yado da maneke. Se manina ko Anegisemee wa'm se asina ko “Me yape yado da dopeana maa kaa endaane! Maa en'ndo otuma widigi aoo se gumba yatoyaase nde maa yoo endaane. Maa kaa togea bage ku a-mbatume naa-mbatume se awasi nde me kaa endaane,” se aseke. Se asemai yako endiyaai.

⁵ Ken ndo waa ko Dom'mba Yuwa wai kapuge kaa ndaginimake kao wido aoo me opitake. Opitana ko iyaao tai se emii to wido aoo me me, wai “Mee!” se mina woeweke. “Mee!” se mina woeweta mugo ndoe, abayai! Iuu epoda tuku se kuda kamino dema. Kena wa'm duwa da kaa animai mee to wa'm yaa da kaa yaatoo nai se kao me edo etaa desi na kao, kido ebeabea da kao me me yaatoo nai se dema.

⁶ Se dema se dodo me kaa ko ambiyoo iyaao takea se emii wui kuwa, ekii mbo epopi nda kiyoo mugo mina, mina nai se yema. Mina, mina nai ndoe se yena ko “Namo apuu pi-meyaae. Kam waa ko namo apuu meyaape ku kaa kiyoo gan'dumi mugo payo nuwa, yedai mugo payo nuwa, ku adiga ebo kiyaase nde. Kase mugon adiga ebo ee? Tau. Mee ona wai masii maseke se dodo me kaa tukuma da kam kisee wataa da ndee mina taao pasi se dodo me kaa mbeaseke, ku kisiu masipi se masii kaa uwani kuwa ku gan'dumi mugo payo, kido ebeabea da ona ndo edeao sekii se mbeaseae. Kena yedai mugo payo kipii kindo ko kido ebeabea da wido ndo edeao sekii se kiyaae. Ku mugo namo apuu pi-meyaae,” aseke. “Ku mugo namo apuu pi-meyaae koya si yaayaa taae se kao wiya aoo. Ona me ko seaituni poo se piya waa. Ona me ko aniguda poo se one waa. Ku poo tuma wiya ku kaa uwo kuwa ku mani si dano keosi nde, ku se ku ndo si yaayaa taae, ku dama dito taae,” se aseke.

⁷ Ken ndo waa ko Dom'mba Yuwa wai kapuge kaa ndaginimake kao wui aoo me opitake. Opitana ko iyaao tai se emii to wui aoo me me, wai “Mee!” se mina woeweke.

⁸ “Mee!” se mina woeweta mugo ndoe, abayai! Iuu gitaba epoda se kuda kamino dema. Kena wa'm duwa da kaa animai mee to wa ekaa da ko “Mee Boyaabuu nai” se mee to. Kena Mee Boyaabuu nai se mee to wa ogudi mitai me ko me ekaa da ko “Mee bota-pata mbembo se yoo,” se mee to. Kena Anegisemee wa'm akaai se asina ko “Maa kaa togea bage ku ende-mbatumei taae,” se aseke. “Ku ende-mbatumei se koya otuma se ku tau. Ona yambatumake, wido mbeu. Ona yambatumake, wido mbeu. Kisee, maa en'ndo otuma kui,” se aseke. “Ku kita yambatumei-pai se dodo me kaa ko yado-yado, namo apuu - namo apuu, mee buwaa - mee buwaa, yóo se emii - yóo se emii, ku mugo kao ku kaa kiyoo mee tuma kaa bage pi-yambatumei siwee,” se aseke. Se asemana ko akaai pidoseomigea.

⁹ Ken ndo waa ko Dom'mba Yuwa wai kapuge kaa ndaginimake kao edibi aoo me opitake. Opitai se dembea ndoe mbeenaa eduu se bidea tuku dema. Me mesiba bidea tuku me me, me Anegisemee tao bidea kaa yaponoyaasi na se bidea tuku se dema. Kena me mesiba bidea tuku me ambamba kiyoo dena ko mee'm mbatumamea se Anegisemee mbaya bage waa, ekii'm dimina waa ku kiyoo aoo se dema. Dee, ku bage kuwa ekii Anegisemee'm mina “Mike ae,” nigimagea yako Yesiusi kaa mina dopeana mee mbo eniwoo simea kumana ku kaa kiyoo mee'm yambatumei-pai semamea. Ku kaa yambatumamea bage waa, ekii'm dimina waa ku kiyoo aoo se dema.

¹⁰ Ku deo ndoe ekii ko mina ebo woeke. Mina ebo se woena ko “O, ese ata emi tau ebo toi se Tuhani woe! A ko a ndo ese si maaneke ona kaa miya emi tau se Tuhani to. A ndo ese mike se Tuhani, kam tau. Ku kindo ko ku kaa kiyoo abuu naamaseke ku kaina gumba abuu naamasiimbe naa ya? Maa kaa togea bage ku nambatumana emu naogayaamea kumana ku kaa em yadaase yoo me pasi ee? Tau ee? Ku kaa naseae,” se asetoo nakea.

¹¹ Se asemana ko ekii tao manina ko ese eduu pode se maawiya maneke. Ku manemana se asina ko “Tau. Ku se ku em yadake yoo pasi ko pasi koya pemaan tau. Ku kindo ku kaa em'ndeke se dodo me kaa aii koo ndo em'ndiwoo taae,” se aseke. “Kase enta mugo ndoe, eki'm sese kambatumamea waya wadobo yambatumaambea bage waa ku oba ndigi. Ekimugoi nakawaa, ni tao ndanda naawanaa se bage kuwa, Yesiusi kaa ekiikinaa bage kuwa, ku se ku waya wadobo mbatumei siwoo taambea ku oba ndigi. Waya wadobo mbatumei taambea ku moo ndigi ee? Tau. Ni'm aii dodo se mbeasima ku kisiu pi-pam'dai se gumba ndoe abuu kaamasiimba nde. Ku kisiu mbatumaan tau yoo abuu si kaamasiimba,” se aseke.

¹² Ken ndo waa ko Dom'mba Yuwa wai kapuge kaa ndaginimake kao bidimi aoo me opitake. Opitai se dembea ndoe abayai! Ese maapui ebo meyaai. Daamee nde miya andagiseopi. Ese yai se tuku epoda mugo dodo kidai. Kena aumo nde miya otuma emu epoda mugo dodo kidai.

¹³ Kena okude waa ku epo kam maa yoo gimeana endaane-pane semagea se dema. Ese bo yipi-yapi kan mbuu se poo-paa beba siyaana piya kaa kam maa yoo gimeana endaane siyaabuu nai mugo dodo. Ku mugo yaa, okude waa ku maa yoo gimeana endaane-pane semagea se dema.

¹⁴ Kena epiyoo me nde miya egidaseopi. Ese kapuge bibinimana epomee'm koo manemake mugo mei! Me mugo yaa, epiyoo me bibinimai yako koo egidasiyaapi se dema. Kena ndii waa ku nuwa, epogo maa waa ku nuwa, ku otuma badewe-pawe semana wa-nini yoo waambi-paambi semapi se dema.

¹⁵ Kam waa ko maa kaa togea bage en'ndo otuma ese widaagea, se ene! Ebo toke se edaya bage waa ku nuwa, ogu ebo bage waa ku nuwa, tentada bage wado ebo dito se bage waa ku nuwa, sinowi se bage waa ku nuwa, ese yaa mani da aoo se bage waa ku nuwa, yaa pineana mee tao masii yaamata se se bage waa ku nuwa, aii bage waa ku nuwa, puu, mee en'ndo otuma ese widaagea. Ese widaagea yako oika pedona ndii waa aoo se yoo ku kaa pemagea. Ku kaa pemagea ndoe ebanaa ku oma yaga yiba waa ndemina bon'takea. Ebanaa ku em'mbee oma waa aoo se yoo ku ambamba bon'takea.

¹⁶ Kiyoo pi-bon'takea se dodo me kaa ekii otuma mina ebo se woena ko “Ndii da waa woe. Oma bea da waa woe. Ebo animana ta se yoo animai mee to wa'm nadiimbi kumana enii kaa deo endiyaana nabibinemaae. Yai, Dom'mba Yuwa to wa'm yima kiki enii'm moo kaa endaaniimbi kumana ndii nuwa, oma nuwa, ku mugo kao ku kita nabibinimake bada.

¹⁷ Kase enta mugo ndoe, mee'm woo-woo se kaa em nadagea se mbutu da pakemapi kumana widaa ndeo. Yai, Anegisemee mesema Dom'mba Yuwa akaa'm yima kiki kan em nadagea yoo ku kaa tukuu wemana kusipimaao kana. Mike nadotaambea kumana ndii waa nuwa, oma waa nuwa, ku mugo kao ku kita nabibinimake bada,” se mina woewoo nakea. Maa kaa togea bage waa eki otuma ku mugo mina woewoo nakea se yema.