Wahayu 18 - Anegisemee'm Mina Kapuge

Babeo okaa yoo me pisime-mbeaseke se mina da

¹ Kam waa ko ni'm waya se dena ko wa-nini epo wado mee to wai Siduga kaa kam endai se dema. Endai se deta mugo ndoe, me epo wado mee me me wa'm ebo tosi na se yaa mani da me ese asiyoo kam asiyoo ebo se yaa mani da se dema. Wa'm maa buboo ku ese ao da aoo. Wa'm ao da me ese wiki-wiki nai kumana maa en'ndo otuma uwo en'ndo otuma ese me ao da me aoo kidai, se dema.

^2-3 Ku demata mugo ndoe wai mina ese ebo mbeana se asina ko “Ese em'mbee Babeo okaa yoo me ko me mike embambi-pambi semapi se kota okaa yoo, se deo!” aseke. “Mbao kaa embambi-pambi semapi ee? Tau na, me kota okaa yoo em yadaao kan embambi-pambi semapi se deo,” aseke. “Dee, me okaa yoo me me, me mee en'ndo otuma maa en'ndo otuma bobo uwo maniwoo nai se ambii to wa'm sese mugo dodo se okaa yoo. Mee en'ndo otuma wa mesema tubaka awasi na bobo uwo maniwoo nai se ambii to mugo dodo se okaa yoo. Ku kaa kiyoo aii bage en'ndo otuma ku nuwa, maa waa wado ese ata emi tau ebo toke se bage waa ku nuwa, ku se ku Babeo okaa yoo mesema tubaka awawoo nakea se bage waa mugo dodo se deo. Ku kumana Babeo okaa yoo em yadaao kan mike embambi-pambi semapi se deo!” se asimi. “Kena ona me ko Babeo okaa yoo me nda togea bage waa ekii'm se-gai we-gai ku kaa dim peta semuu nakea ku nuwa, tubaka kaa dim peta semuu nakea ku nuwa, ku ese asiyoo wa-nini keo. Ku se ku, ku kaa dim petakea kumana se-gai we-gai edeke ku nde miya ese asiyoo wa-nini edita semuu siwoo sipea. Waya ku degea yako aii yoo maa kaa kam oto kao yaedisi na donaa nakea se bage waa ku nde miya ekii Babeo okaa yoo me kaa do-meta semuuna kipe oba awita semuu nakea. Ese sinowi kumapea. Ku kumana Babeo okaa yoo em yadaao kan mike embambi-pambi semapi ndeo!” se asimi. “Babeo okaa yoo embambi-pambi semapi kumana waya wadobo epoo bage keke ku mee tuma kaa bage se ku tau. Ku ese dimi peu se-mbaa we-mbaa ku nuwa, ese nao daa se-bido we-bido ku nuwa, ese eaa, nao daa se-emii we-emii ku nuwa, ku mugo kao ku ndo Babeo okaa yoo me nda ndemina ekemuku semana takea se deo,” se asimi. Ku mina kuwa ku ese abayai se depa se epo wado mee to wa'm mina ebo mbeana se mina enii, se dema.

^4-5 Se asemana ko ni waya se yena ko Anegisemee wai Siduga maa kaa kam mina enemaai se yema. Mina me se enemaana ko “Babeo okaa yoo togea bage ekii'm woo-woo se ku ese wa-nini keo se detaka,” aseke. “Ku dena ko ekii'm woo-woo se ku ebeabea da ebeabeake kipii kindo ese maa kaa kam ata kisee Siduga maa kaa kam miyo epopi da ku kisiu ebeabea da peu-pau awawoo nakea se detaka,” aseke. “Ekii'm peu-pau ku ni'm mike andibuu taao kana se kao waa kumana ku kaa mike em yadaanka deo. Ku mike em yadaanka kumana ni'm bage waa woe. Me okaa yoo me nda peu-pau awawoo nakea bage ekii mesema ekii mbaya si aneweae! Ekii'm sese ku si awasea na, mani mewee!” aseke. “Waya wada nda kiyoo togea bage ku kaa em yadaao kan mee buwaa mugo kao waa ku ekii kaa yaendaaniyaabuu taamba. Ku kindo ko ni'm yaendaaniyaabuu taamba kao ku eki kaa nde miya si meanisi na me okaa yoo me nda togea bage'm sese ku ogato damana yau kaa peaniwee,” se asimi.

⁶ Kena wa'm waya se enemaana ko “Babeo okaa yoo wa'm mee ogu kaa yaawawoo sipi ku kaa em yadake bada. Wa'm mee ogu kaa peu yaawawoo sipi ku miyo endigimana ese ebo mbeana em yadake bada. Kena wa'm mee kaa peu aya yadotaa sipi ku kisiu masewena peu aya wiya mugo yadotaana em yadake bada,” se aseke.

⁷ “Kase enta mugo ndoe, Babeo okaa yoo togea bage waa ekii'm si maaneke ku se de. Ekii'm si maaneke ona me ko me ese dim peu se ambii to mugo dodo se deta. Wa ko wai ese sinowi kumana wa'm dim peta sipi kao en'ndo otuma ku ndo awawoo nai, me ona. Kena ona me ko wa'm wa kaa to ebo mbeana dodo se mina eniwoo nai ku nde miya ese wa-nini keo. Wa kaa to dodo semai yako wa'm se enina ko ‘Ka! Ni ko ni kogaa ambii baa!’ se eneke. ‘Ni ko ni mee waa wado ese ata emi tau ebo towoo naka se ambii to. Ku kumana endo nde miya, anikee waa nde miya yee gumba ona kaa miya si yee taamba,’ se en'tai. Me ona. Yai, me mugo ambii to, Babeo okaa yoo me me, wai wa kaa to dodo se kumana, kena dim peke se dimina yaa mu-mu se kumana wa'm si maaneke se dimina ku kisiu masewena dodo ndo em yadaae. Wa'm dimina ku kaa dodo em yadaao kan bodi ababa se aya nuwa, dim dano-dano se aya nuwa, ku se ku yadotaana em yadaae,” aseke.

⁸ “Wa kaa em yadake se dodo me kaa ese oyu kam oyu se Tuhani Anegisemee wa'm em yadaambi kumana onu ona ndo se gumba ndoe yadano kiyaambi. Dee, wa'm em yadake me kaa kiyoo mee buwaa nuwa, dim bodi kan yee semuu se nuwa, namo apuu ku nuwa, ku se ku meaniyaana em yadaambi. Kam waa ko bidea kaa yaponoyaambi. Ese onu ona ndo mina wiya tau kumana ku otuma yadano kiyaabuu taambi! Ese oyu kam oyu se Tuhani Anegisemee wa'm em yadaambi koena,” se aseke. Ku mina kuwa ku ni'm Siduga maa kaa kam yema se mina waa.

^9-10 Babeo okaa yoo em yadana bidea kaa yaponoyaake se dodo me kaa mbeenaa bende kam dito nakea se bage waa aoo. Ku bage ku ko ku maa en'ndo otuma ku wado ebo togea se edaya bage waa. Ku bodi ababa taambea ku widaana bende kaa tomuna dito nakea se dema. Dee, ku ebo bage ku ko ku Babeo okaa yoo me mesema tubaka awawoo simea se ebo bage waa. Ku Babeo okaa yoo me mesema sinowi kan ekii'm dim peta simea - dim peta simea se kao ku ndo awawoo simea se ebo bage waa. Ku mugo ebo toke se edaya bage waa ekii bende kaa tomuna onduu pudumitai sese dito nakea. Ku dito sita mugo ndoe ese dim bodi kan yee se nde miya aoo. Ese mee bona waa, yee waa mato tamoo siyaa - tamoo siyaa en'takea mugo dodo se yee semuu nakea. Ekii'm yee gana-gana mina se enina ko “Aa-oo wai, wai, wai,” se enigea. “Babeo okaa yoo me ese abayai asiyoo kam asiyoo se kota okaa yoo. Me nda togea bage ku ese oyu se bage waa. Ku koya ese mani, yam ona ndo mugo dodo, ku kisiu em yadata mugo ndoe, ku otuma pisime-mbeasipi ae! Wai, wai, aa-oo!” se en'takea.

¹¹ Kena Babeo okaa yoo me kaa yee semuu nakea se bage ku ebo bage ku ndo se ku tau. Oto kao ku yaaedisi na do-mewoo sipea se bage waa ku nde miya yee se aoo. Kase enta mugo ndoe, ekii'm dowoo sipea se-gai we-gai ku ediimbea se bage ona kaa miya emi tau kumapea kumana “Endo ko enii'm oto kao naediimbea bage waa ku kayoo? Ku ese ona kaa miya emi tau kii ae,” se nigimagea yako yee se aoo. Ese dim bodi kan yee semuu nakea.

¹² Ekii'm kipe kaa amane taao kan do-mewoo sipea se-kao we-kao ku ko ku eamasi oma ku nuwa, pedaki oma ku nuwa, edeao kana se oma waa ku nuwa, musiada oma mugo kaampo ku nuwa, ese tunaa se manaa se kao ku nuwa, ese tunaa se siuteda kaini ku nuwa, uuwou se kaini ku nuwa, ese emo da se kaini ku nuwa, dama eponu aoo se-piya we-piya ku nuwa, edeao kana se piya kam epipi semapea se-kao we-kao ku nuwa, gaya tuma se emii to wa'm yimauu kaa piyapoo ku kaa epipi semapea se-kao we-kao ku nuwa, tem'baga besi ku nuwa, aii miga besi ku nuwa, deao disi se puadami oma ku nuwa,

¹³ kayu manis se piya eba da ku nuwa, noke kao badii kisi na se-iye we-iye ku nuwa, eponu dama kisi na bidea kaa yitake se-kao we-kao ku nuwa, dama eponu aoo se muda odi ku nuwa, dama eponu aoo se piya ayaa ku nuwa, aniguda poo uwo ku nuwa, minaki uwo ku nuwa, gan'dumi boo gemba-gemba ku nuwa, ese edeao kana se gan'dumi boo gemba-gemba ku kaa nuwee ku nuwa, siapi egina ku nuwa, dom'mba egina ku nuwa, kuda kamino ku nuwa, kuda kamino donaa se se kuma da waa ku nuwa, ku se ku kipe kaa amane taao kan dowoo sipea se-kao we-kao. Kena mee tuma kaa bage ku nde miya yaa pineana mee mbo kipe kaa amane se aoo. Ku taao kan “Yaa pineana masii kaamasisi nde, a tao ee. Kipe nii,” se asiwoo sipea. Ku mugo bage ku namba oba aoo. Ku kasipa kuwa ku ekii'm kipe aweao kan dowoo sipea se-kao we-kao kui. Ku koya waya wadobo ediimbea se bage ku emi tau ae se ku nigimagea yako kana-kana se yee semuu se aoo.

^14-17 Dee, eduga ko ekii'm dowoo simea ku kaa Babeo okaa yoo me nda kiyoo kipe oba awewoo simea. Ku kumana Babeo okaa yoo em yadake se dodo me kaa ko se-gai we-gai donaa se bage ku ese widaagea yako bende kaa tomuna yee semuu nakea. Ese dim bodi kan mina ebo mbeana yee semuu, yee semuu, yee semuu nakea. Se yee semuu nakea se dodo me kaa ekii'm se asina ko “Aa-oo peeto!” aseke. “Me okaa yoo me ese abayai asiyoo kam asiyoo se okaa yoo. Me nda se-sinowi we-sinowi eneke sekii tau. Me nda toke se epoo bage ekii'm manaa se kao ku ese edeao kana se kaini manaa simea. Uuwou se kaini ku nuwa, ese emo da se kaini ku nuwa, ku se ku manaa simea. Waya wada nda ekii'm mataana ko eamasi nuwa, edeao kana se oma waa ku nuwa, musiada oma mugo kaampo ku nuwa, ku se ku namba manaa siwoo simea,” se aseke. “Ku koya ese mani, ese yam ona ndo mugo dodo ku kisiu tuta sita mugo ndoe, ku se-sinowi we-sinowi kuwa ku otuma pisime-mbeasipi,” aseke. “Wai, wai peeto!” aseke. “Endo ko ekii dimina da nda dim peta siwoo sipea se-gai we-gai ku otuma dano. Ekii'm se-sinowi we-sinowi ku nde miya otuma dano. Ese yai, deao disi se-kao we-kao ku nde miya otuma dano. Ku se ku mike dano. Anikee nde miya waya wadobo si diimbea se kao waa, ae,” se aseke. “Wai, wai, peeto,” se yee semuu nakea. Kipe aweao kan se-gai we-gai do-mewoo nakea se bage waa ekii'm se awatakea. Se awatakea se dodo me kaa ko waya ogu bende kaa dito nakea bage waa ku nde miya aoo. Ku bage ku ko ku uwo daii nda kuma da nda penaa se bage ku nuwa, uwo daii nda kuma da waa donaa se bage waa ku nuwa, uwo daii nda kuma da waa dito se bage ku nuwa, se-gai we-gai yaedisi na do-mepea se uwo daii nda kuma da waa penaa se bage ku nuwa, ku mugo bage ku nde miya bende kaa tomuna dito nakea se dema.

¹⁸ Bende kaa dito sita mugo ndoe, Babeo okaa yoo kiyoo kam onduu pudumitai ku dito nakea. Onduu pudumitai ku dito sita mugo ndoe, mina ebo mbeana se asina ko “Wai, wai! Ese eduga kam ata kise endo kam miyo me mugo okaa yoo, enii diin tau. Me Babeo okaa yoo me ndo ese abayai asiyoo kam asiyoo se okaa yoo. Kam tau!” se aseke.

¹⁹ Se asemana dimina dano-dano kan ekii kaa to ekii'm moo kaa maa nuwaa pato se. Ekii'm moo kaa maa nuwaa pato sita mugo ndoe yee se aoo. Ese mee bona yee waa mato tayaa mugo dodo tamoo nakea. Kum seta kaa mina ebo mbeana se asina ko “Aa-oo peeto!” aseke. “Kase enta mugo ndoe, me okaa yoo me ese asiyoo kam asiyoo se okaa yoo. Ese se-gai we-gai ku kaa sinowi se okaa yoo. Kum seta kaa uwo daii nda kuma da waa donaa nakea se bage waa ku nde miya sinowi kiyaamea. Me okaa yoo me nda se-gai we-gai ku kipe kaa a-mane naa-mane simea koena,” aseke. “Ku koya ese mani, ese yam ona ndo mugo dodo ku kisiu tuta sita mugo ndoe me okaa yoo me pisime-mbeasipi. Mike embambi-pambi semapi,” aseke. “Wai, wai peeto!” aseke. Uwo daii nda kuma da waa penaa nakea bage waa ku ekii'm se aseke.

Babeo okaa yoo mike pisime-mbeasipi kumana ku kaa kiyoo bani-bani taae, se mina da

²⁰ Kena ndo waa ko ni waya mina ona se yena ko “Siduga nda togea se bage waa woe! Bani-bani taae. Babeo okaa yoo mike em yadamapi kumana bani-bani taae. Kena Anegisemee wa'm bage waa nuwa, Edaseo bage waa nuwa, nabi bage waa nuwa, ku se ku nde miya bani-bani taae. Kase enta mugo ndoe, Babeo okaa yoo togea bage ku peu-pau kaawawoo simea koya tau. Ekii'm peu-pau kaawawoo simea ku kaa kiyoo Anegisemee wai abuu ku kaamasimai yako em kaadamapi. Ku kaa kiyoo bani-bani taae,” se mina yema.

²¹ Kena ndo waa ko ni'm se dena ko ese oyu se epo wado mee to ona wai ese em'mbee se oma mbato ona yaataana maakaa uwo ndoiba me nda wamaai se dema. Se dena ko me epo wado mee to wa'm se asina ko “Ese em'mbee Babeo okaa yoo me ni'm wamaapa se oma mugo dodo kaasi. Kase enta mugo ndoe, me okaa yoo me nde miya oyu kan pai ata mugo ndoe waya wadobo epipi mbee to mbeenaa kaa miya si diimbea sima!” se asimi.

²² “Kum seta kaa me okaa yoo me nda waya wadobo si yiimbea se mina waa ku se de. Euu mina en'takea ku nuwa, mamine kado mugo kao ku nuwa, sedudin tuwoo-tuwoo awe da ku nuwa, sean'kakada tuwoo-tuwoo awe da ku nuwa, ku mugo minasiyaake ku nde miya mike emi tau kaasi. Ku mike waya wadobo si yiimbea se mina waa,” se asimi. “Kena gan'dumi boo gemba-gemba ku yemei taao kan yemei se se dodo me kaa yeke se mugo mina mbee ku nde miya me okaa yoo me nda waya wadobo si yiimbea se mina. Se-ndanda we-ndanda epi se bage ku nde miya me okaa yoo me nda waya wadobo si diimbea se bage waa,” se asimi.

²³ “Kena me okaa yoo me nda togea bage ku ona kaa miya em tau kaambea kumana osee ao da mugo waya wadobo mbeenaa kaa miya si diimbea. Kena eduga ko mbayuwaa ku ambii maseke se dodo me kaa ko bani-bani se aoo. Eduga ku kaa bani-bani se aoo koya waya wadobo emi tau kaambea. Me okaa yoo me nda togea bage emi tau koena. Babeo okaa yoo em yadake se dodo me kaa ku kasipa kuwa ku mike emi tau kaambea,” se asimi. “Babeo okaa yoo em yadake se dodo me kaa mbao kaa em yadake ee? Tau na. Ona me ko Babeo okaa yoo togea bage ebanaa ku ko ekii kipe aweao kan se-gai we-gai a-mane naa-mane simea. Ese kipe badeao epi kumana ekii kaa to dodo se ku ese asiyoo wa-nini kidai. Ekii kaa to dodo se kan se nigina ko ‘Enii ko ebo. Ogu bage en'ndo otuma mbeedi,’ se nigiwoo simea. Ekii'm se nigiwoo simea kumana Babeo okaa yoo em yadake. Me ona. “Ona me ko Babeo okaa yoo nda togea bage ekii'm mbaa wanewoo simea ku ese wa-nini kumana mee en'ndo maa en'ndo otuma yadeba siwoo simea. Ku kaa kiyoo nde miya em yadake. Me ona, wiya.

²⁴ “Kena ona me ko Babeo okaa yoo nda togea se bage ekii'm yambatumei-pai simea se bage waa ku eneke sekii tau. Anegisemee'm ebe kaa mina yaa-enei se bage waa ku nuwa, ogu Anegisemee mbaya bage waa ku nuwa, maa en'ndo otuma mee en'ndo otuma se bage waa ku nuwa, ku se ku mbatumei-paina emu ogayaabuu simea se bage waa. Ku kumana Anegisemee wai Babeo okaa yoo togea bage waa em yadake. Me ona, wido. Ku wido ku kaa kiyoo Babeo okaa yoo em yadana yapisime-mbeasiisi,” se asimi. Ese oyu se epo wado mee to wa'm se asimi.