Wahayu 14 - Anegisemee'm Mina Kapuge

Dom'mba Yuwa mesema mee kooda waa 144.000 mugo mesema ku kaa mina da

¹ Kena ndo waa ko ni'm waya se dena ko Yedusedem okaa yoo kiyoo ndii ona aoo. Ndii ona me ekaa da ko Sion ndii. Kena Sion ndii me kaa deta mugo ndoe, Dom'mba Yuwa se mee to se dema. Dom'mba Yuwa me kiyoo inewena tomu nai se dema. Kena wa mesema tomu se se mee kooda waa 144.000 ku kisiu ku namba dema. Ku bage ku kaa deta mugo ndoe, ekii etu kaa kiyoo ekaa da wiya wudumapea ae se dema. Ona me ko Dom'mba Yuwa to wa ekaa da me ona. Ona me Dom'mba Yuwa wa'm Naamee ekaa da me ona. Ku ekaa da wiya ekii etu kaa wudumei-pai semapea se dema.

² Ken ndo waa ko mina yeke. Mina yeke ku ko ku ese em'mbee mamine kado kooda waa heu-mbeu siyaabuu nakea se mina mugo dodo se yema. Ku mina mbeedi se mina waa se ku tau. Ese em'mbee uwo mea nduu-puu se mina mugo dodo. Pasi maa kaa endaaneke se geemuu tayaa se mina mugo dodo. Se yeke koya mii'm awatakea se ku ni diin tau. Aii mina me ndo yema.

³ Kena waya wada nda ni'm se yena ko yipi se euu mina en'takea se yema. Yipi se euu mina en'takea ku ko ku 144.000 se bage waa kasipa kuwa, ku se ku yipi se euu mina en'takea se yema. Me ekii'm ndo epi kaao sekii se euu mina. Ogu bage'm epi kaao kana se euu mina. Se en'takea se yema. Ku mugo euu mina en'takea se dodo me kaa ese ata emi tau ebo toke se Anegisemee to wa'm egi kaa kiyoo en'takea. Kiyoo en'takea se dodo ndoe, iyaao takea se emii wui kuwa ku nuwa, kudoo-padoo se ebo bage waa ku nuwa, ku ekii'm egi kaa kiyoo nde miya euu mina en'takea, se yema. Dee, ku 144.000 se bage ku ko ku maa kaa togea se bage waa koya ekii'm woo-woo se ku otuma okaa gapemapi se bage waa se dema.

⁴ Aii se gapemapi se ku tau. Ku Anegisemee mesema Dom'mba Yuwa akaai kaa akaai tao gapemapi se bage waa kisi na. Ku akaai tao gapemapi bage kuwa ku oba aoo ko aoo koya mbeenaa ndo. Waya wadobo ese oba aoo kaasea. Ese oba aoo kaasea kumana Anegisemee mesema Dom'mba Yuwa to akaa'm nigina ko “O, ku mee tuma kaa bage kuwa ku anai tao ese amba mato kaa kiyoo ikiina ayuwee keke se dodo me kaa dawepea se poo-paa mugo dodo se bage waa. Kase enta mugo ndoe, ku mugo bage waya wadobo oba yagapei siwoo taata ae,” se nigeke. Ku 144.000 kooda waa kuwa ku Dom'mba Yuwa wa ogudi penaa nakea se bage waa. Ekii'm dimina ku ese Dom'mba Yuwa wa mbo kumana wa-nini kao yapapa se mbeenaa kaa miya awaan tau se bage waa. Kiyoo kam ese tubaka mugo mbeenaa kaa miya awaan tau se bage waa mugo dodo se dema.

⁵ Waya mbae da mina nde miya mbeenaa kaa miya asiin tau se bage waa se dema. Ku kaa kiyoo ekii kaa aseao kana se mina ku se de. “O, ekii'm si maaneke ku dee! Ku dee!” se mina kuwa ku ekii kaa mike aseao kana se mina waa se dema.

Epo wado bage wido, ekii'm donaa asinaa nakea se mina waa

⁶ Ken ndo waa ko epo wado mee to ona wai ni'm moo wado maa wada petai se dema. Se deta mugo ndoe wa'm mina dopi me ko me maa kaa togea bage enii tao yeao gai se mina da eniwoo taao kan se doke. Ese mike ba-gamitaao kana se mina da doke. Me yeao gai se mina me me, me taii ona ndo ekii tao se mina se ku tau. Ku bage ona ndo ekii tao se mina se ku tau. Ku eba epo da ona ndo se bage ekii tao se mina se ku tau. Mina tuma ona ndo se bage ekii tao se mina se ku tau. Ku ese mike mee en'ndo otuma, maa en'ndo otuma ekii tao yeao gai se mina da.

⁷ Ku kindo ko ni'm dema se epo wado mee to wai mina ebo mbeana se enina ko “Endo se gumba me ko Anegisemee wai mee'm awamea-awamea ku otuma ndamana ‘Me daa. Me dau,’ se pikamoo se se gumba. Ku kindo ko Anegisemee kaa widaake bada. Wa kaa ebo yambeana ‘Paamee! Mataae’ se aseao ndo bada. Dee, epo nuwa, maa en'ndo otuma ku nuwa, maakaa uwo ku nuwa, uwo batu-batu en'ndo otuma ku nuwa, ku se ku Anegisemee wa'm anegi semami se-kao we-kao kumana wa ese ebo se Anegisemee to. Mem seta kaa wa kaa widaana yapapa siwoo taae!” se aseke. Epo wado mee to ona wa'm se enimi.

⁸ Se enimi se dodo me kaa ko wa ogudi mitai se epo wado mee to me nde miya ona dema. Me wiya aoo me se epo wado mee to me ko wa'm eneke mina me ko me se de. “Ese em'mbee Babeo kota okaa yoo me ko me mike embambi-pambi taasi se okaa yoo kumana endo nde miya embambi-pambi semapea se okaa yoo mugo dodo se deo!” aseke. “Dee, me okaa yoo me me, me mee en'ndo otuma maa en'ndo otuma bobo uwo manta se se ambii to wa'm sese mugo dodo se okaa yoo. Mee en'ndo otuma yuwe kiyaana wa mesema tubaka awasi na bobo uwo manta siwoo sipi mugo dodo se okaa yoo. Ku kumana Babeo okaa yoo me mike embambi-pambi semapea se okaa yoo mugo dodo se aseo!” se aseke. Epo wado mee to wiya aoo me wa'm se eniwoo nai.

⁹ Ku epo wado bage wiya ku pegea se dodo me kaa akaa ogudi mitai se epo wado mee to waya ona aoo. Me wido aoo me se epo wado mee to me ko wa namba mina ebo mbeana se enina ko “Dim peu se emii to wa kaa yapapa se bage ku kaa nuwa, wa'm sipi mugo mbato yapapa se bage ku kaa nuwa, wa'm ebeabea da me yaa da kaa ebeabea da wudumapea se bage ku kaa nuwa, etu kaa ebeabea da wudumapea se bage ku kaa nuwa,

¹⁰ ku mugo bage ku kaa Anegisemee wai ese yima kiki aoo. Ku kaa ese yima kiki kumana mike em yadaambi se bage waa sima,” se aseke. “Ku se ku em yadatai, em yadatai, em yadatai se dodo me kaa Dom'mba Yuwa wa namba dito nai. Kena Anegisemee'm daa yambeasimi se epo wado bage waa ku namba dito nakea. Ku se ku dito nakea se dodo me kaa bodi ababa siyaabuu nai ku se ene! Aii miga bidea me kaa nuwa, ese dibita eponu aoo se bidea me kaa nuwa, ku se ku ekii kaa yadotaa tana bodi ababa siyaabuu nai. Etaa kiyaake nde miya sekii tau.

¹¹ Tau kiyaake nde miya sekii tau. Aii apikaa nde miya, ndeemaa nde miya, omiyaa siyaa ku ndo ese yai bodi ndo siwoo nakea. Ku kumana dim peu se emii to wa kaa yapapa se bage ku nuwa, wa'm sipi mbato yapapa se bage ku nuwa, wa'm ebeabea da wudumapea se bage ku nuwa, ku mugo bage em yadata siyaabuu siwoo nai se dodo me kiyoo kam onduu pudumitai ku nde miya tau kiyaake sekii tau. Aii pudumitai, pudumitai, pudumitai siwoo nai,” se aseke. Wido aoo me se epo wado mee to wa'm se eniwoo nai.

¹² Anegisemee wa'm wa-nini wenimake se bage waa woe. Ni'm kasipa se bage kuwa ku Anegisemee wa'm mike em yadaasi se bage waa kumana ku em yadaasi kam miyo eki dimina da oyu kaae. Ogu bage ekii'm peu-pau kaawawoo nakea se dodo me kaa nde miya dimi si katu kaae, ku Anegisemee'm em yadaasi bage koena. Ku mina ku kaa kiyoo aii kusipimana oyu kan takun ndo towoo taae. Waya wada nda Yesiusi kaa dim si wiya-wiya kaae. Wa kaa “Mike ae,” se nigi siwoo taae. Kena Anegisemee'm mina ku si taman ndo oyu kan yaa mu-mu taae. Ku se ku oyu kan yaa mu-mu sisea na “Peu-pau se bage ku mike em yadaasi de!” se kaseao kan sipa.

¹³ Ken ndo waa ko Siduga kam mina ona me se nasina ko “Endo kam wado Tuhani kaa ‘Mike ae,’ nigimana buwai-pai taasea se bage waa, ku mugo bage kuwa ku ese bani-bani taasea se bage waa,” aseke. “Ku kindo me mina me ko me kapuge kaa naawudumaae,” se aseke. Siduga kaa kam mina se nasimi. Se nasemana ko Anegisemee Dim'mba wa namba se asina ko “Mike na! Ku mugo bage ku ese mike dama yatoyaai yako bani-bani siwoo taasea se bage waa. Kase enta mugo ndoe, buwaan tau yoo ekii'm Anegisemee tao ndanda awamea-awamea ku ese kinu-panu kan yaawawoo simea se ndanda waa. Ese kinu-panu kan awawoo simea ndanda koya bona dai kaa waa ko yaa embewena dama towoo taasea. Waya wada nda ekii'm awamea-awamea ku andibuu se sekii tau. Ku otuma ku kaa Anegisemee wai nigi seke kumana dama aya yadotaa taasi sima. Ku kindo Tuhani kaa buwai-pai taasea se bage waa ku bani-bani siwoo taasea se bage waa mugo dodo,” se aseke. Anegisemee Dim'mba wa'm se aseke se yema.

Anegisemee wa'm maa en'ndo otuma mee en'ndo otuma pikamoo taasi sese, me kaa mina da

¹⁴ Ken ndo waa ko ni'm waya se dena ko mee yombai mugo mee to se dema. Wa'm tomu se yoo me pode da se sinu me kaa animana tomu nai se dema. Kena wa'm moo kaa matapi me ko me ese ebo toke se edaya mee to wa'm eamasi daikomiya mayaa mugo matapi se dema. Wa yaa kaa yaatoo nai me ko me ese uuda aoo se yado gudimita me mugo yado da yaatoo nai. Se dema.

¹⁵ Se dena ndo waa ko epo wado mee to ona wai Yahawee'm okaa ee me esimba nda kam mba yato yoo da kaa meanii se dema. Yoo da kaa meanina mina ebo se woena ko “Woe! Sinu me kaa animai se mee to woe! Endo se gumba ko me maa en'ndo otuma poo-paa ayuwee kan sibaweao sekii se gumba. Dee, maa kaa togea se-bage we-bage ku ese kapoo-kapoo se poo-paa mugo dodo kumana a'm yado gudimita me me ku sibambi-pambi taae,” se aseke.

¹⁶ Se asemai yako sinu kaa animana tai se mee to wai wa'm yado gudimita to me masewena maa en'ndo otuma ku asiyoo kam sibawei se dema. Asiyoo kam sibawena ndo waa ko kapoo en'ndo otuma masiweyu. Dano.

¹⁷ Ku semana ndo waa ko Siduga kaa kiyoo waya wa-nini epo wado mee to ona wai Yahawee wa'm okaa ee me esimba nda kam mba yato yoo da kaa memai se dema. Wa namba ese uuda aoo se yado gudimita dapeasi yako mba yato meanii se dema.

¹⁸ Kena wa-nini epo wado mee to ona aoo. Me epo wado mee me me, wai Yahawee tao bidea kaa yaponoyaasi na yoo, mesiba bidea tuku me me, kiyoo pasi kaa tomu nai se epo wado mee to. Aii se tomu nai se ku tau. Mesiba bidea tuku me nda bidea ku wa'm guna miyo dito nai se bidea se dema. Se dena ko wai mesiba bidea tuku me kaa kam batana mitai se dema. Memana mina ebo mbeana se asina ko “Uuda aoo se yado gudimita yaatoo nai se epo wado mee to woe! Maa en'ndo otuma ku dee. Ku maa kuwa ku aniguda poo andoo da mugo dodo. Kena maa kaa togea bage waa ku ese kapoo-kapoo se aniguda poo oku da waa mugo dodo. Ku kindo ko ku se ku pi-daweke bada. A'm yado gudimita'm dawena maseae,” se aseke.

¹⁹ Se asemai yako yado gudimita yaatoo nai se epo wado mee to wai pedona maa kaa aniguda poo waa ku dawena moei se. Moei, moei semuuna poo uwo odi maseao kan nduwei sisi na se awe da me nda wamoo se. Me nda wamoo-pamoo semana bado'm nduwei-pai se. Nduwei-pai semata mugo ndoe poo uwo odi petakea se dema. Ku se ku deke ko deke koya ku mina ebeabea da ndo. Kase enta mugo ndoe, aniguda poo dapi kuwa ku maa kaa togea se bage waa mugo dodo. Kena bado'm nduwei se yoo me nda wamoo se kuwa ku Anegisemee wa'm yima kiki kan em yadake yoo wamoo se mugo dodo. Kena aniguda poo uwo odi peyaabuu nai ku ko ku mee'm woo-woo se kaa em yadana ekii'm emu yaogayaabuu nai mugo dodo. Anegisemee wa'm yima kiki kan em dake yoo ku ese yai, eneke sekii tau koena. Ku kaa mina ebeabea da mugo dodo.

²⁰ Ku kindo ko moei pai semana mbeasipi se bage ku em yadake se dodo me kaa Yedusedem okaa yoo me yau kaa kiyoo em yadake. Yau kaa em yadatai, em yadatai ndoe ekii'm emu yaogayaabuu nai ku eneke sekii tau. Ese em'mbee uwo kaada endiyaai mugo dodo se dema. Emu uwo ndoiba okuneke ebeabea da me ko me bado kam ata moo to kam miyo epopi nda ku kisiu okuneke ebeabea da deke. Kena tapoo kaa kam batu kaa ebeabea da me ko me yai, maa ebo. Enii'm maa moo peke waa, tapoo kam batu kaa pakemai ndoe onu mee oto kumana mee na kaa haas ku kisiu omiyaa. Kidomendede ebeabea da kipii kindo ko, 300 kidomendede ebeabea da mugo dodo. Ku kisiu tapoo kam batu kaa ebeabea da se dema. Ku mugo emu uwo kaada endiyaai se dema. Se.