Edaseo Bage 27 - Anegisemee'm Mina Kapuge

Paudusi me Edoma okaa yoo pesi na uwo daii nda kuma da kaa yambeana yapeyaamea se mina da

¹ Tentada dito se mee to ona aoo. Wai ekaa da ko Yudiusi. Yudiusi wa ko wa mbaya tentada bage ekii aii tentada bage waa se ku tau. Ekii Kaiseda wa'm yape yaamasisi na tentada bage waa. Kena ea na gapi ebo bage ekii'm me Yudiusi me me se asina ko “Paudusi nuwa, peniyada ee nda mbembo simea se bage ebanaa ku nuwa, ku bada madona uwo daii nda kuma da kaa yapakaaniyaae,” aseke. “Uwo daii nda kuma da kaa pakaaniina ku a'm dama dito taae, ogiyoo Itadiya maa me kaa peembea nde,” se aseke.

² Se asemana kiyoo uwo daii nda kuma da ona aoo. Me Adedamitiumi maa kaa kam mepi se kuma da. Me kuma me Asiya maa kaa ii da kaa kuma pi-kawei se aoo se kota okaa yoo, kiyoo penaa taao kan sipi se kuma da. Ku kumana enii me kuma me kaa pakaaniina tomuna peke. Uwo daii nda peke se dodo me kaa ko enii mesema peke mee to wa ekaa da ko Adisitadakusi. Mee me me, me Makedoniya maa kaa kiyoo Teseadonika okaa yoo tomi se mee to.

³ Kena me uwo daii nda kuma da me nda petaina ko omai tukuma Sidoni okaa yoo me kaa pemake. Sidoni okaa yoo me kaa pemana ko Yudiusi wa'm gane kan Paudusi tao dama yaawake. Wa'm Paudusi se asina ko “Amugoi nakawa bage mbo pi-deweke bada o,” se aseke. “A'm maa kaa dama tosi na se kao ku kanesi na, ekii mbo pi-dewe o,” se aseke.

⁴ Pi-dewena kuma da kaa waya pakaaniina ndo waa ko maakaa uwo daii nda waya peke. Waya peta, peta mugo ndoe, enii'm peao kan sipea yoo Sipedusi epogo maa kaa miyo kiyoo bo pupu ku mbeenaa oyu kumana iyo. Nda peke sekii tau. Me nda peao kan sipea ku wisin'tana Sipedusi epogo maa wado bo pupu mbeenaa etaa kumana me nda taimidona peke.

⁵ Taimidona mu, mu, mu se dodo ndoe, mbeenaa asiyoo Kidikiya maa nuwa, Pamepidiya maa nuwa, ku maa ku dawaana aii maakaa uwo daii nda epopi nda peta se. Me nda peta, peta muuna ko Dikiya maa kaa kiyoo Mida okaa yoo me kaa pemake.

⁶ Me kaa pemana ndo waa ko Yudiusi wai wa-nini se kuma da deke. Me kuma me Adekiseadediya okaa yoo kam mepi se kuma da. Kena me kuma dota se bage kuwa ekii Itadiya maa kaa peao gai ae, se mina yeke. Itadiya maa kaa peao gai se mina yei yako Yudiusi wa ko wai bada namadona me kuma me kaa pakaaniina tomu se.

⁷ Me kuma me kaa tomu sita mugo ndoe uwo daii nda peta se. Peke ko peke koya bo pupu si namaaniyaake kumana mani peke sekii tau. Bo pupu si namaaniyaake kumana kuma dota se bage ku ese kinu-panu kan aii nigee ndo se dotaina onu oba mugo omana Kenidusi okaa yoo pasi kaa pemake. Kiyoo pemagea ndoe waya ndumbo ndo peao gai koya aii bada ndo. Bo pupu ku waya si namaaniyaake kumana iyo. Ku kindo ko enii'm peao kan sipea yoo wisin'tana ogiyoo Kedeta epogo maa bo etaa kii yato me nda peke. Kedeta epogo maa yau nda peta mugo ndoe Seaomone guiye apu mbeenaa pasi kaa dawaana peke.

⁸ Me nda peta mugo ndoe ii da pasi kaa peke koya mani tau. Bo pupu si namaaniyaake kumana kuma dota se bage ku ese kinu-panu kan nigee ndo doke. Nigee ndo dota, dota, dotaina Dasea okaa yoo dawaake. Dasea okaa yoo dawaana me kaa wado kam mbeenaa pasi se maa kaa pemake. Me maa me ekaa da ko Kuma Dama Edimisi na Kawei se Yoo. Se.

⁹ Me maa me kaa pemake se dodo me kaa ko ese mani tau. Ese nigee petaina me kaa pemake. Me kaa pemake se gumba me ko me ogiyoo Yahudi bage'm em'mbee Noke Kao Nao Daa se gapi tona dai kaa waa ko se gumba enii nakayoo pemake. Ese odibi bo yipi-yapi aoo se gumba dodo se dodo me kaa pemake. Me gumba me kaa kiyoo uwo daii nda penaa se kindo uwo biku-biku se ku ese mike ebata tau kumana nabibinimana nanaao sekii. Ku kaa nigimai yako Paudusi wa'm asina ko

¹⁰ “Eki mee waa woe. Ni'm nigina ko enii waya penaa se kipii kindo ko uwo daii nda kuma da me ma, me nda dopea se oto kao ku nuwa, ku otuma kawida-padana enii mesema uwo kaa peembea ae se nigeo,” aseke.

¹¹ Paudusi wa'm se aseke koya aii bada ndo. Kuma doke se mee to me nuwa, kuma epomee me nuwa, akaa'm “Tau de. Peke bada,” se aseke. Akaa'm mina yemana ko tentada bage dito se mee to, Yudiusi me me, wai akaa'm mina ku ndo yito se. Paudusi wa'm mina tau.

¹² Kena me kuma me nda penaa se bage ese oba mugo ku namba “Kuma da nda waya muuna peke bada,” se aseke. “Ogiyoo Penikisi okaa yoo me kaa odibi se gumba pi-tuwaao kan awa-deke bada,” se aseke. Dee, enii'm pemapea yoo me kaa odibi se gumba toke kipii kindo ko ese dim'mba tau. Si maaneke. Kena mbeenaa ogiyoo Kedeta epogo maa kaa kiyoo Penikisi okaa yoo aoo. Penikisi okaa yoo me ko odibi se gumba nde miya toke kindo dama se toke yoo. Uwo daii nda kuma da kawei se yoo dama. Bo pupu mei yato ku si deke se yoo kumana odibi se gumba aoo se dodo me kaa uwo daii nda kuma da kawei se yoo dama. Ku kumana enii mesema penaa sipea bage ku ekii oba mugo “Kiyoo peao kan awa-deke bada,” se aseke.

Bo yipi-yapi ku nda penaa simea se mina da

¹³ Ekii ogiyoo Penikisi okaa yoo peao gai kumana bo pupu ku dito se. Ku dito, dito, dito se dodo ndoya daamee wokumo yato kam ese tunaa se bo mugo mitai se degea. “O, endo ko maaneke ae,” se nigimagea yako kuma si pesi na besi gao-gao mbato ogindaa uwo ndoiba kusipimapi me me, me maseweao kan one wegeana kuma da kaa dotaake. Dotaana ko peke. Kedeta epogo maa ii da pasi nda petakea.

¹⁴ Mbeenaa ndo pedona ko ea na dembea ndoe ese em'mbee bo pupu aoo kidai. Me bo pupu me ko me ambiyoo epogo maa kaa kam mepi mei! Me bo me ekaa da aoo. Me ekaa da ko “Daamee Aweyaa yato Mbeenaa Ekiyaa Yato kam Mepi se Bo,” se ekaa aoo.

¹⁵ Ku bo pupu mena ko bo mitai yato me nda peke iyo. “Aii bada ae,” se nigimagea ndoe enii'm peao kan sipea nda wisin'tana ko bo'm kuma me nadona peyaake ndo.

¹⁶ Bo me aii nadoi, nadoi, nadoi ndoe mbeenaa mbeedi se epogo maa ona aoo. Me epogo maa me ekaa da ko Kauda epogo maa. Kena bo'm nadona Kauda epogo maa pasi kaa napeyaake. Kiyoo nadona peyaana ko bo pupu etaa kisi na epogo maa duwato peke. Epogo maa me duwato, bo mbeenaa etaa se yoo pemana ko enii'm penaa se kuma apuu yato kiyoo epetana ko mbeedi mbee se kuma mbee to aoo. Me kuma mbee to epetake yoo wegeana em'mbee kuma, enii'm tomu nakea se kuma me kaa dotaake. Ese mbeenaa aoo kumana waa ko yaataao kana koya tau. Ese wegeana enii'm tomu sipea yoo dotaagea.

¹⁷ Me kuma mbee to me em'mbee kuma da kaa dotaana ko em'mbee kuma da kawida taambi ae se nigeke kumana one waa masewena bamitake. Asindaa kam yugindaa uwo ndoiba waya asindaa kuma maa da otuma bamewena se bamitagea. Bamitana ko ekii'm nigina ko “Ogiyoo Siditisi maa pasi kaa ese uwo keo se yoo aoo. Uwo keo kumana uwo ndoiba maa nda nasimaambi ee? Tau ee? Widaa ndeo!” se nigeke. Se nigimana ku tau kisi na kuma da peyaasi na kaini bamitake. Bamitana ko peao kan sipea yoo wisin'tana aii bo me yima nda yadogea nda me nda peta se.

¹⁸ Bo'm nadopeana napeyaabuu sita mugo ndoe bo yipi-yapi ku ese oyu ese wa-nini kidai. Ese oyu se nadoke kumana omai tukuma uwo daii nda kuma da etaa kisi na me nda dotoo sipea se-kao we-kao ku ebanaa ku masewena uwo kaa wato-pato semagea.

¹⁹ Kena bo yipi-yapi meaniina dai kaa waa ko onu wiya omana wido aoo gapi me kaa kuma da doyaasi na kao waa, peyaasi na kaini - peyaasi na kaini, one-one, piya-piya, besi-besi, ku mugo kao ku namba masewena uwo kaa wato-pato semagea.

²⁰ Ku uwo kaa wato-pato semana ko kise, kise, kise onu oba mugo omapea kuwa bo yipi-yapi yai se taa se ndo. Ese dikanta ndo ese uwo buba maa buba ku otuma gayaa semai. Daamee nde miya, okude nde miya ku se ku ona kaa miya mani si deke kumana “Aa-oo, enii otuma mike buwaambea ae! Yai!” se nigeke.

²¹ Ku semai ndoe enii noke kao nona dai kaa waa ko waya mani si noke. Noke kao waya mani si noke se takea se dodo waa ko Paudusi wai ekii egi kaa inewena se asina ko “Eki mee waa woe. Ni'm eduga ‘Kedeta epogo maa kaa kam si peae,’ se kasima mina kuwa ku dama nayito taao daan sipea,” aseke. “Ni'm mina nayito se waa, me kuma me si kawida-pada siyaa. Se-kao we-kao ku uwo kaa si wato-patona si woo-woo siyaa,” aseke.

²² “Ku mike mina koya endo ko mbugu se dimi me mbeas! Me kuma me me mike kawida-pada taasi koya enii ko tau. Enii ko ona kaa miya uwo kaa si peembea ndeo,” aseke.

²³ “Ni'm yapapa naka se Anegisemee me ni'm epomee. Kena ndee se dodo me kaa ko me Anegisemee me me wa'm epo wado mee to ona ni mbo pasi kaa kiyoo inewena tai se depa,” aseke.

²⁴ “Se dena ko wa'm se nasina ko ‘Paudusi woe. Si widaae,’ se nasipi. ‘Ai Kaiseda mbo mike ukaase nde,’ se nasipi. ‘Ku kindo ko si widaae. Dee, Anegisemee wai a kaa a tao dama se kao kaawapi koena. Uwo daii nda kuma da nda a mesema penaa nakea se bage kuwa ona kaa miya uwo kaa si peembea ndeo,’ se nasipi,” aseke.

²⁵ “Anegisemee'm epo wado mee to wa'm se nasipi kumana ku mina ku kaa ni dimi wiya-wiya tau. Wa'm nasipi mina kui kaambi ae se ku ndo nigeo,” aseke. “Ku kumana ekii namba mbugu se dimina ku mbeana si widaae,” aseke.

²⁶ “Uwo kaa si peembea koya enii'm kuma me bo me nadona ogiyoo epogo maa me kaa nasimiyaambea nde,” aseke. Paudusi wa'm se asimi.

Uwo daii nda kuma da me epogo maa kaa nasimina ndo kawida-pada simi se mina da

²⁷ Bo yipi-yapi meaniina dai kaa waa ko onu haas kumana bado kaa wido omana bado kaa wui aoo gapi daasiba se dodo me kaa ko bo'm nadopeana Adediya maakaa uwo daii nda napeyaake. Bo'm nadopeana napeyaai ndoe kuma da dota se bage ekii'm dimina da nda se nigina ko “Ai, ai, maa pasi kii ae,” se nigeke.

²⁸ “Maa pasi kii, ae,” se nigimagea yako oma aoo se one da uwo ndoiba domaake. Uwo ndoiba domaana ogindaa maa kaa endaaneke se dembea ndoe uwo keo kii moo kii ebeabea da “40 mendede ebeabea da ae,” se degea. Mbeenaa tomuna ndo waa ko uwo keo kii moo kii ebeabea da waya ndamagea ndoe, “Oo, endo ko 30 mendede ebeabea da ae,” se degea.

²⁹ Uwo ku keo kii se degea yako “Yai, oma kaa nasimina kawida-pada, taada-paada semaanki, ae,” se nigeke. Ku kaa ese widaagea kumana kuma si pesi na se kao wui mugo ku one kaa uwo ndoiba wamaana ogindaa maa kaa domaake. Ku kuma apuu da kam domaai se dodo ndoe, “Aa-oo, apikaa kayoo? Mani awee!” se nigiwoo semuu nakea.

³⁰ Kena ndo waa ko kuma da dota se bage waa ekii kaa to toyaao kan em'mbee kuma mbato kam koo oowaao gai kumana kuma mbee to me uwo daii nda domaake. Uwo daii nda domaana dim dake mina se asina ko “Tau, me kuma mbee to uwo kaa domaapea me me, me enii ogiyoo kuma moo kaa kiyoo kam kuma si pesi na kao waa uwo ndoiba domoo taao kan kuma mbee to domaapa nde,” aseke.

³¹ Ekii'm se aseke koya Paudusi wa'm Yudiusi nuwa, wa guna miyo tentada bage nuwa, ku mbo se asina ko “Ku tau de! Ku bage kuwa em'mbee kuma da batake waa, eki otuma toke ku sekii taa kiyaa,” se aseke.

³² Paudusi wa'm se asipi kumana ku bage ku si pesi na tentada bage ekii'm kuma mbee to me epetapea one waa ku data-patana kuma mbee to uwo kaa endaaniyaagea. Se.

³³ Kena ese iu-iu se dodo ndoe Paudusi wa'm asina ko “Endo ko noke kao ku naae,” se aseke. “Dee, onu haas kumana bado kaa wui omapea kuwa noke kao mbeenaa kaa miya naan tau. ‘Enii kase taambea ee?’ se ku ndo ese gigi kan nigi siwoo nakea kumana noke kao naan tau.

³⁴ Ku kumana eki otuma dama tosi na noke kao naae,” aseke. “Eki'm edoyoo ona kaa miya uwo kaa si peembea kumana si widaae. Noke kao nowee,” se aseke.

³⁵ Se asemana yaditokea se dodo me kaa edoondi masewena Anegisemee mbo “Paamee,” se asetaake. “Paamee,” se asetaana ko edoondi biseke. Noke.

^36-37 Ku dena ko uwo daii nda kuma da nda penaa se bage otuma, 276 kuwa, ku namba mbeenaa bani-bani se aoo kumana noke kao masewena nogea.

³⁸ Noke kao nom'tana bikeke se dodo me kaa ko me kuma da me etaa kisi na gan'dumi boo gemba-gemba masewena uwo kaa wato-pato semagea.

³⁹ Aweopi se dodo dembea ndoya asiyoo maa aoo ko aoo koya ekii'm eo se maa. Ekii'm eo se maa me ndamaata mugo ndoe, “Ai, ai. Me dee. Ea mbane-mbane aoo se ii da batu kiyoo aoo ae,” se nigeke. “Me bage ii da aoo kumana me nda enii'm dime nasime-deao nde. Me nda pi-nasime-di nde,” se aseke.

⁴⁰ Se asemana kuma da si pesi na kao ku uwo ndoiba data-pata semagea. Data-pata semana ko kuma da doi ndoe geniyaake kao ku ogitake. Ogitana ko kuma da em'mbee pesi na kaini asindaa dotaake. Bo'm dosi na. Ii da kaa peao kan bo'm doi, doi, doi ndoe

⁴¹ me kaa ukaan tau yoo epopi nda kiyoo uwo ogindaa ea mbane-mbane aoo se yoo me kaa nasimeke. Me kaa nasimina waya peke sekii tau. Ea mbane-mbane nda kusipemai yako iyo. Waya peao kana kindo ese uwo biku-biku ku kuma apuu me kaa pai, pai, pai andoya uwo daii nda kuma me kawida-pada taada-paada semai.

⁴² Ku semana ndo waa ko tentada bage waa ekii'm nigina ko “Yai, enii me yaa pineana dito nakea bage waa kuwa uwo kaa endaaniina uwo daii nda bedenani pena ata yau kaa pemana oowaambea sima. Ku si oosi na mbatumei taa nde,” se nigeke.

⁴³ Ekii'm se nigeke koya Yudiusi, tentada bage dito se mee me me wa'm Paudusi kaa dimi kan “Ku tau de! Ku si mbatumaae!” aseke. “Endo ko uwo daii nda endaaniina bedenani peao sekii se bage ku kita uwo ndoo nda widana endaanina ii da kaa pewee,” se aseke.

⁴⁴ “Eé, uwo daii nda bedenani peao eo se bage waa ku kuma da kaupi me uwo daii nda kade-made se piya kade-pade mugo kao ku yapamitana uwo daii nda maa wanda pewee,” se aseke. Se asemana ko enii otuma se awake. Otuma uwo daii nda pidoseomina ii da kaa pakaaneke. Enii ena kaa miya buwaan tau. Se awamea.