Edaseo Bage 26 - Anegisemee'm Mina Kapuge

¹ Kena Agedipa wa'm Paudusi se asina ko “Endo ko a kaa to mina ene o,” se aseke. Se aseke kumana ko Paudusi wa'm peu-pau awaan tau ae se nigisi na mina ku aseao kan wa yaa da dotaana se asina ko

² “Ese ata emi tau ebo se Agedipa woe,” aseke. “Yahudi bage ekii'm ni kaa ‘Paudusi peu-pau awami,’ se mina se ku oba nasimea,” aseke. “Endo gapi ekii'm ni kaa nasimea mina ku kaa ‘Tau. Ku ni mike awaan tau se kao waa ae,’ se mina ku a mbo kaseao gai. A mbo mina dake me ni kaa dama nakiyaambi kao ae, se nigeo,” aseke.

³ “Dee a ko ai Yahudi bage enii'm sese otuma ese epi se mee to koena. Enii'm a-domoo naa-domoo se mina waa ku kaa nde miya otuma epi kee sima. Ku kindo ko a mbo mina dake me ni kaa dama se kao ae, se nigeo,” aseke. “Ku kumana ni'm kasiinka mina ku dama nayito taae,” se aseke.

⁴ “Ese eduga edugana ko ni yuwa mbeedi se dodo kam ata ni'm toma se maa kaa awama-awama se mina ku nde miya, Yedusedem okaa yoo me kaa toma se dodo awama-awama se mina ku nde miya ku mina se kuwa Yahudi bage en'ndo otuma si nige-neke baa,” aseke.

⁵ “Dee, eduga ko ni Padisi mbaya bage mesema anewena ekii'm sese awawoo sima se mee to. Ku Padisi bage kuwa ku Yahudi bage'm ese Anegisemee'm okaa mee tupisi na mina ese, ese oyu kan yaa mu-mu nakea se mbaya bage. Kena eduga ko ni namba kui. Ese eduga kam ata Yahudi bage naaepi kumana ekii gai kipii ‘Mike, eduga Paudusi wai Padisi mbaya bage sese ese oyu kan yaa mu-mu siwoo simi,’ se kasiyaa,” aseke.

⁶ “Ese eduga ko Anegisemee wai enii'm eedoo bage mbo ese okaa mina enimi. Ese okaa mina kuwa ku wa'm anikee waa mike awaasi se mina waa. Wa'm enimi mina ku kaa ni'm ‘Ku mike pi-pamaasi mina waa ae,’ se nigimana wa'm pi-pamiyaasi gapi dim pipi kan em'ndoo siwoo naka. Ku em'ndoo naka kumana ku dimi ku kaa Yahudi bage nabeatakea ku. Ku kaa em nadasi na endo gapi ni kaa mina dake aoo,” aseke.

⁷ “Ese ata emi tau ebo mee to woe. Yahudi bage ekii'm ni kaa nasina ko ‘Paudusi wai peu-pau awami. Ese peu-pau awami,’ se naatakea koya tau. Ni'm dim'mba nda em'ndoo naka se kao, kena nabeagea bage'm dim'mba nda em'ndoo nakea se kao ku dodo ndo,” aseke. “Dee, Yahudi bage en'ndo otuma, enii taii waa haas kumana bado kaa wiya kuwa, enii otuma omiyaa siyaa ku ndo dimina ona ndo kan Anegisemee yapapa semuu naka. Yapapa naka se dodo ndoya wa'm enimi mina pi-pamaasi yoo me em'ndoo nakea. Me ko ese ni'm em'ndoo naka mei!” se aseke.

⁸ “Anegisemee wai mee bota da maa poo yoo ndomaao sekii se mina me ko eki ebanaa ku mina kaa dimi wiya-wiya se aoo. Eki'm nigina ko ‘Abayai! Anegisemee wa mike sekii ee, tau ee?’ se nigitakea. Eki ebanaa se nigitakea koya kase koena? Mee bota da maa poo yoo ndomake me ko me Anegisemee wa'm awaao kana se kao baa,” aseke.

⁹ “Eduga ko ni namba se nigina ko ‘Naseadesi mee to, Yesiusi me me, wai ekaa da kaa mike ae se nigeke bage waa ku mbeedi mbeaseke bada, ae,’ se nigima. Ku kaa dimi wiya-wiya kaa miya emi tau kumana

¹⁰ ni'm Yedusedem okaa yoo awanaa sima kui. Ese ebo se imam bage waa ekii'm ‘Bada o. Awa o!’ se nasimea kumana Yesiusi mbaya bage oba ku yapamitana peniyada ee nda yadomoo-pamoo semama. Peniyada ee nda yadomoo-pamoo semana ndo waa ko ku mbatumagea se dodo me kaa ni'm nigina ko ‘Me bada. Mbatumas!’ se nigima,” aseke.

¹¹ “Kena ku Yesiusi mbaya bage em yadasi na ea oba mugo Yahudi bage ekii'm andagatake ee waa ku nda pi-ndem-pe sima. Pi-ndem-pena yapamitai ndoe, ni Yesiusi mbaya bage kaa ese oyu yima kiki aoo. Ese oyu kan se asina ko ‘Yesiusi yaekayaa taae! Yaekayaa taae!’ se mina ku asinaa sima,” aseke. “Ku Yesiusi mbaya bage ku mbeedi mbeaseao kan se dimina me ese me ndo kumana yau-yau nde miya Yahudi tau se bage'm kota okaa yoo waa kiyoo namba penaa siwoo sima. Penaa siwoo sita mugo ndoe, ku Yesiusi mbaya bage kaa ese peu ese bodi ababa siyaake kao yaawawoo sima,” aseke.

¹² “Kisena ndo waa ko ea na gapi, ku se ku awaao kan ese ebo se imam bage ekii'm nasina ko ‘Paudusi, enii'm ebo toke yoo ku yaa mani da kaneo nde. Enii'm ebo tuwaao kan se yaa mani da me kaa ogiyoo peae,’ se nasimea. Se nasimea kumana Damesiki okaa yoo peao kan pema,” aseke.

¹³ “Ese ebo toke se Agedipa woe. Me enda me nda petaina ese daamee epopi se dena ko ese epo wado kam maa kaa ao da aoo kidai. Daamee emaa misi deke me mbeedi. Ni'm dema me ko me ese ebo. Ni'm yau-yau nuwa, ni mesema penaa se bage ekii'm yau-yau nuwa, ku otuma ao da ndo se dema,” aseke.

¹⁴ “Se dena ko ese widaake kumana enii otuma maa nda mbato-mbata simea. Maa nda mbato-mbata se dodo me kaa mina yema. Ni'm yena ko Ibedani ebe kaa mina se nasina ko ‘Seaudusi woe. Seaudusi woe. A kase ni kaa ese peu ese bodi se kao naawanaa nae ee?’ se nasimi. ‘Mbeedi nambeaseao gai kindo ko ku kaa a kaa to bodi kiyaambe ndeo,’ se nasimi.

¹⁵ “Ni'm asina ko ‘Tuhani, a ko mii?’ asima. “Kena Tuhani wa'm nasina ko ‘Ni ko ni Yesiusi,’ se nasimi. ‘A'm ese peu ese bodi se kao naawanaa nae mee to me ni,’ se nasimi.

¹⁶ ‘Endo ko inewee! A bado ambuu inewee!’ se nasimi. ‘A ni tao ni'm gai-gai naa-awata se mee to se kambeaseao kan a mbo ukipa nde,’ se nasimi. ‘Kena a'm ni kaa nadepe mina ku nuwa, anikee waa kadeyaata kao waa ku nuwa, ku mina se kuwa mee mbo donaa asinaa sise na, a ko wa-nini kambeaseo,’ se nasimi.

^17-18 ‘Wa-nini kambeana kapeyaamba. Ni'm kapeyaake me ko a'm bage, Yahudi bage nuwa, Yahudi tau se bage nuwa, ku se ku ese emaa diyoo aoo. Ku emaa diyoo kuwa yawadaniyaabuu sise na kapeyaake, me ona. Ona me ko Ibedisi guna miyo toke bage ku yaa patatana yapeyaabuu sise na kapeyaake, me ona. Ona me ko ogu bage ku Anegisemee guna miyo yatoyaabuu sise na ekii mbo kapeyaake, me ona,’ se asimi. ‘Ekii mbo kapeyaana ko ekii ni kaa “Mike ae,” se nanigeke kipii kindo ko ekii'm woo-woo se ku otuma yaawise-mbeasiita. Ekii'm woo-woo se ku yaawise-mbeasita mugo ndoe, ku ni'm emaa misi kaa dimi ndumbo se bage waa yakiyaata,’ se nasimi. ‘Ku se ku awasi na ekii mbo kapeyaanka,’ se nasimi. ‘Kena Yahudi bage nuwa, Yahudi tau se bage nuwa, ekii mbo kapeyaana ko kabeake kipii, kambatumaao gai kipii, kindo tau. Ni'm kaedimana dama katoyaata ndeo,’ se nasimi. Tuhani wa'm se nasimi,” aseke.

¹⁹ Paudusi wai se asemana waya se asina ko “Ese ebo toke se Agedipa woe. Tuhani wa'm Siduga kaa kam iya-iya da kaa nasimi mina kuwa ku ni'm ona kaa miya tamaan tau,” aseke.

²⁰ “Ku si tamana ndo Tuhani wa'm mina yaadonaa asinaa sita mugo ndoe, ni'm se eniwoona ko ‘Ekii'm woo-woo se ku wisin'tawee! Anegisemee'm mina kaa ndo “Mike ae,” se nigiwoo siwee! Ku dimi ku deyaase na dama se kao ku ndo awawoo taa nde!’ se mina eniwoo sima,” aseke. “Ku mina kuwa donaa asinaa sita mugo ndoe, Damesiki okaa yoo kiyoo kita asei sima. Waya Yedusedem okaa yoo me nda pi-asinaa sima. Waya muuna Yudea maa en'ndo otuma penaa asinaa siwoo sima. Kam waa ko Yahudi tau se bage mbo nde miya penaa asinaa sima,” se aseke.

²¹ “Ku mina ku donaa asinaa naka kumana ea na gapi Yahawee'm ee yoo da kaa tomu se se dodo me kaa ko Yahudi bage ekii nambatumaao kan yaa nayapamitamea,” aseke. “Yaa napamitana nambatumaao kan sipea

²² koya tau. Anegisemee wai ni kaa dama naedimeke kumana, tau. Kisena ndo waa ko endo gapi nde miya wai dama nadito nai kumana ni nakayoo tomuna ebo bage mesema mbeedi se bage mesema eki mbo Yesiusi kaa mina kasei taao sekii,” aseke. “Kena ni'm kasei se mina kuwa ku yipi se mina tau. Ku nabi se bage waa ku nuwa, Musia nuwa, ekii'm enimea mina dodo se kaseo. Dee, eduga ko ekii'm se enina ko ‘Anikee waa

²³ Keditusi wa ko wai ese bodi ababa semana buwaasi. Buwaasi ko boke koya ese eduga edugana maa poo yoo ndomaasi mee me me, me Keditusi se mee to mei! Kena wa kita maa poo yoo ndomana dai kaa waa ko wai Yahudi bage mbo nuwa, Yahudi tau se bage mbo nuwa, ekii'm emaa diyoo ku yawadaniyaao kan mina eniwoo taasi,’ se enimea. Musia mesema nabi bage waa ekii'm Keditusi kaa mina se enimea. Ese ni'm tupita sima se mina waa kui,” se aseke.

²⁴ Paudusi wa'm se aseke se dodo me kaa ko Pesetusi wa'm mina ebo mbeana se asina ko “Abayai! Paudusi ai ese yuwee meanipe se mee to se kadeo,” aseke. “Ai kapuge oba ndamatai nae kumana a'm dimina da ese mike dim'mba tau kiyaape se kadeo,” aseke.

²⁵ Kena Paudusi wa'm asina ko “O, ese asiyoo se Pesetusi woe, ku se ku tau de,” aseke. “Ni ko ni yuwee se mee to se ku tau. Ni'm kasipa mina kuwa ku ese ndumbo se mina waa. Ku ese yeao sekii se mina waa. Ku mugo mina ku ndo kasipa,” aseke.

²⁶ “Ni'm kasipa mina kuwa ku ese ata emi tau se Agedipa wa'm epi se mina waa ae se nigeo. Ku mee'm deao kana se yoo koo awamea se kao ku tau koena. Ku se ku Agedipa epi kumana ku kaa mina wa mbo aseao widaa tau. Ese ndumbo ndo aseao sekii ae se nigeo,” aseke.

²⁷ “Ese ata emi tau ebo se Agedipa woe. Nabi bage ekii'm enimea mina ku mike mina ee? Mbae da ee? A kase nigeke? Ni'm kadena ko ai nabi bage'm enimea mina ku kaa ‘Mike ae,’ se nigeke mee to se kadeo,” aseke.

²⁸ Kena Agedipa wa'm Paudusi asina ko “Ni a'm mina mbeenaa yemana Keditusi mbaya bage mani nakiyaao sekii baa!” aseke.

²⁹ Paudusi wa'm asina ko “Tau na. Mbeenaa ndo yito se nde miya, oba yito se nde miya, a namba Keditusi mbaya bage kee waa bada ae se kanigeo,” aseke. “Ku kumana a mesema ni'm mina nayito nakea bage ku mesema eki otuma ni'm sipa mugo kisea na Anegisemee mbo kaasetoo naka,” aseke. “Ni'm sipa me ko me besi one pai nawetake ae se nigeke se ku tau. Ni'm Yesiusi kaa ‘Mike ae,’ se nigeke dimina me ekii namba ‘Mike ae,’ nigisea na Anegisemee mbo kaasetoo naka,” aseke. Paudusi wa'm se aseke.

³⁰ Se asemana ko ese ata emi tau ebo se Agedipa wai ineweke. Inewena peke. Maa dito se ebo se Pesetusi me ma, Bedinike me ma, ekii mesema animana tomu sipea bage ku nuwa, ekii otuma Agedipa mba nda

³¹ me dukune me kaa kam batana pegea. Batana pegea ndoe mina amoe-moe nakea Ekii'm mina amoe-moe nakea me ko me se de. “Mee me me wa'm awake-awake ku kaa yambatumaao sekii se kao waa baa. Ku awapi ku kaa peniyada ee nda nde miya domaao sekii se kao baa. Ku tau ko,” se mina ku kaa amoe-moe nakea.

³² Kena Agedipa wa'm Pesetusi se asina ko “Eduga ko mee me ko wa'm se asina ko ‘Ni'm awama-awama ku ese ata emi tau ebo toke Kaiseda wa'm ndo naandamaasi na wa mbo napeyaae,’ se asimi. Me mina me asiin tau waa, se waa ko yaekatana yapeyaao sekii kiyaa,” se aseke. Agedipa wa'm se asimi.