Edaseo Bage 18 - Anegisemee'm Mina Kapuge

Kodintusi okaa yoo me kaa kiyoo Anegisemee'm mina pi-asei simi se mina da

¹ Ku semana ndo waa ko Paudusi wai Andena okaa yoo me kaa kam batana mu, mu, muuna ko Kodintusi okaa yoo me kaa pemake.

² Kodintusi okaa yoo me kaa pemana ko Yahudi bage ona aoo. Mee me ekaa da ko Akawida. Wa'm one dake yoo me ogiyoo Pon'tusi maa kaa kiyoo one yadamea. Wa'm ambii ekaa da ko Pedisikida. Mbeenaa eduga ko akaa bae Itadiya maa kaa tomea. Kiyoo toke se dodo me kaa ko Edoma bage'm ebo bage, Kaudiusi me me, wa'm asina ko “Yahudi bage en'ndo ku otuma Edoma okaa yoo kam batana pewee,” se asimi. Wa'm se asimi kumana Akawida bae Edoma okaa yoo batana Kodintusi okaa yoo pi-towee simea. Kiyoo pi-toweena ndo waa ko, Paudusi wai Kodintusi okaa yoo ukeke se dodo waa ko akaa bae mesema ade taao kan akaa mbo peke.

³ Akaa pi-ade semana ndo waa ko akaa mesema omita se. Paudusi wa'm epipina ko mee'm yaedisi na take ee meta se mee to. Kena akaa'm epipina ko dodo kumana akaa mbo omita se se dodo ndoe ekii ndepo take ee waa mewoo nakea.

⁴ Kiyoo omiwoo towoona ndo waa ko Hadi Seab'tu gapi daa se gapi toke kumana ku gapi en'ndo otuma Yahudi bage ekii'm andagatake ee ona me nda ndemina mina tupiwoo se. Yahudi bage mesema Yahudi tau se bage mesema ku Yesiusi kaa “Mike ae,” se nigisi na mina tupiwoo nai.

⁵ Kena ndo waa ko Sidasi mesema Timotiusi akaai Makedoniya maa kaa batana Paudusi mbo memake. Paudusi mbo memana dai kaa waa ko Anegisemee mina eniwoo se ku ndo awawoo nai. Ku ndo awake se dodo me kaa ko wai Yahudi bage mbo se enina ko “Anegisemee wa'm wa-nini wenimana yapeyaami se Keditusi me me, me Yesiusi,” se mina eniwoo nai.

⁶ Wa'm se eniwoo se koya tau. Yahudi bage waa ekii Paudusi yabeagea. Paudusi yabeana yawisinigea se dodo me kaa ko Paudusi wa'm se asina ko “Yai, Anegisemee'm em kadaasi yoo me ni'm peu-pau kaawaa yako em kadaasi se ku tau. Me eki'm awapea ku kaa kiyoo ndo em kadaasi sima,” se aseke. “Eki ni'm mina nayeao beagea kindo endo kam wado Yahudi tau se bage mbo donaa asinaa taamba,” aseke. Se asemai ndoe wa'm enipi mina ku desi na ebeabea da awake. Wa'm manaa se kao ku pisi-pisi aseke. Se awami.

⁷ Se awamana ko Paudusi wai ekii mbo kam batana Yahudi bage'm andagatake ee me yau kaa ee ona me nda pi-ndemeke. Me ee me ko me Yahudi tau se mee to, Titiusi Yusitusi, wa'm ee to. Wa ko wai ese Anegisemee kaa yapapa se mee to. Se.

⁸ Paudusi wa'm enipi mina yito sipea bage oba mugo “Mike ae,” se nigigea. Yahudi bage ekii'm andagatake ee ebo dito se mee to Kedisipusi me nuwa, Kedisipusi wa sepaao ku nuwa, Kodintusi okaa yoo togea bage ekii oba mugo ku nuwa, ku se ku Tuhani'm mina kaa “Mike ae,” se nigigea. “Mike ae,” se nigimana ko uwo ndoiba takumeweke ebeabea da yaawagea. Se.

⁹ Ea na gapi, daasiba se dodo me kaa ko Paudusi iya-iya kaa deke. Iya-iya kaa deke se dodo me kaa ko Tuhani wa'm Paudusi se asina ko “Endo kam wado si widaae. Koo si tomu taae. Ni'm mina ku si dan ndo eniwoo semuu taae,” se aseke.

¹⁰ “Kase enta mugo ndoe, ni a mbo towee naka. Kena nakayoo okaa yoo ni mbaya bage ku ese oba aoo. Ku kumana aii bage waa ekii'm si kayapamitaambea nde. Bodi se kao ku miya si kaawaambea nde,” se aseke.

¹¹ Tuhani wa'm Paudusi se asipi kumana Paudusi wai mani si peke. Ao haas kumana bado kaa wagoo om'pi kam miyo kuwa si pen ndo kiyoo ndo Anegisemee'm mina tupiwoo nai.

¹² Paudusi wai Anegisemee'm mina tupiwoo nai se dodo me kaa ko Akaya maa kaa ebo toke mee to wai ekaa da ko Gadio. Me Gadio me me wai ebo toke se dodo me kaa ko ogiyoo Yahudi bage waa ekii dimina ona ndo kan ekii ndepo Paudusi yaa yapamitana yaa wedona Gadio mbo pi-yambeaseke. Wa'm awapi ku kaa mina damana em yadasi na Gadio mbo pi-yambeaseke.

¹³ Pi-yambeana ekii'm se asina ko “Me Paudusi me me wai ‘Anegisemee yapapa taae,’ se mina tupeke koya tau. Wa'm Anegisemee yapapa sisi na tupina mina kuwa ku ese wa-nini se yadetaka. Me enii'm okaa mee tupisi na mina tamana wa-nini yapapa siyaa sese mugo dodo se tupiwoo nai. Ku degea yako ku kaa mina daao kan mee me me a mbo mi-kambeaseo,” se aseke.

¹⁴ Se asemana ko Paudusi wai mina asiinki ae se dodo ndoe, Gadio wa kita wa'm Yahudi bage ku se asina ko “Yai, eki Yahudi bage'm nadeake se mina ku mbeenaa yeao be. Mike peu-pau se kao awapi waa, ese ebo se kao tamapi waa, eki'm mina yito se ‘Bada o,’ se kasiyaa,” aseke.

¹⁵ “Se kasiyaa koya tau. Eki'm nadeake mina ku wa-nini kaa nadeake se mina waa. Ku aii mina mbembadi ku kaa deake se mina waa. Ku aii mee'm ekaa waa ku kaa deake se mina waa. Kena Yahudi bage'm eki'm okaa mee tupisi na mina ku kaa ndo deake se mina waa. Ku mbembadi se mina ku kaa nadeake kumana eki'm ndo eki kaa to mina dawee o. Ni mbo tau,” se aseke.

¹⁶ “Ku kindo ko eki otuma pewee. Ni'm mee'm awapea ku ndamana mina dasi na yoo kiyoo kam, ka! Pewee!” se aseke.

¹⁷ Gadio wa'm ku Yahudi bage kuwa peyaake se dodo me kaa ko eki yima kiki kan Yahudi bage'm andagatake ee ebo dito se mee to em yadake. Kiyoo ee dito se mee wa ekaa da ko Seosetenes. Ese mee'm awapi ku ndamana mina dasi na yoo pasi kaa kiyoo em yadagea. Em yadata mugo ndoe Gadio namba dito se koya gane se dimina mbeenaa kaa miya si degea. Aii wisin'take ndo. Se.

Paudusi pedona An'diokiya okaa yoo waya pemami se mina da

¹⁸ Ku semana ndo waa ko Paudusi wai Kodintusi okaa yoo kam mani si peke. Kisena ndo waa ko Sidiya maa kaa peao gai kumana nakayoo togea Yesiusi mbaya bage ku batana peke. Peke se dodo me kaa ko Pedisikida mesema Akawida akaa bae namba wa mesema peke. Peta, peta, petaina Ken'kedea okaa yoo me kaa pemake. Ken'kedea okaa yoo pemana ko uu daii nda kuma da kaa pakaaniinki ae se dodo ndoe, wa'm edoyoo ku boeke. Wa'm edoyoo boeke se dodo me kaa aii se boeke se ku tau. Paudusi wa'm eduga wa kaa to tamaao eo se mina asimi. “Anegisemee woe, ni'm kasipa mina ku mike awaata ndeo,” se mina asimi kumana ku uwa pana desi na edoyoo boeke. Edoyoo boemana ndo waa ko wai Akawida bae mesema uu daii nda kuma da kaa pakaaniina peke.

¹⁹ Uu daii nda peta, peta, petaina Epesiusi okaa yoo me kaa pemake. Epesiusi okaa yoo me kaa pemana ko Paudusi wai Akawida bubee mesema enda awade semana peke. Pena ko Yahudi bage ekii'm andagatake ee nda pi-ndemina Yesiusi kaa mina “Mike ae,” nigisi na mina ku Yahudi bage mesema mina amoe-moe se.

²⁰ Mina amoe-moe se se dodo waa ko Yahudi bage ekii'm asina ko “A mani si peae. Enii mbo mbeenaa oba omiwee taae,” se aseke. Ekii'm se aseke koya “Tau, ni peenka,” aseke.

²¹ Se aseke koya peenki ae se dodo ndoe, “Anikee waa Anegisemee gai kipii kindo ko ni nakayoo waya memaata,” aseke. Paudusi wa'm se asin. Kena ndo waa ko uu daii nda kuma da kaa pakaaniina Epesiusi okaa yoo batana peke.

²² Uu daii nda kuma da nda petaina ko Kaisedea okaa yoo me kaa pemake. Me kaa pemana maa moo se pakedona Yedusedem okaa yoo me kaa pakemake. Kiyoo pakemana Yesiusi mbaya bage mesema ade se. Ade semana ndo waa ko endidona waya An'diokiya okaa yoo me kaa endemake. Se awami.

²³ Paudusi wai An'diokiya okaa yoo kiyoo mbeenaa oba towee simi. Me kaa oba toweena ndo waa ko waya pedona Gadasiya maa kaa nuwa, Pedigiya maa kaa nuwa, ku kaa penaa ominaa, penaa ominaa simi. Aii penaa se se ku tau. Yesiusi'm mina dito se bage waa ekii otuma dimina yatakuniyaabuu taao kan ku maa ku nda penaa simi. Se awami.

Apodosi, wa'm Epesiusi okaa yoo nuwa, Akaya maa me kaa nuwa, kiyoo awata simi se mina da

²⁴ Me gumba me kaa ko Yahudi bage ona aoo. Wa ekaa da ko Apodosi. Apodosi wa'm okaa yoo ko Adekiseadediya okaa yoo. Wai ese mina eneao epi se mee to. Ese Anegisemee'm kapuge mina ku otuma ese epi se mee to. Kena ea na gapi me Apodosi me me, wai Epesiusi okaa yoo me kaa ukimake.

²⁵ Me kaa ukimana ndo waa ko Yesiusi kaa mina tupita se. Wa'm tupita se mina ku ko ku ogu bage'm Tuhani kaa yanige-manemea mina waa ku tupita se. Ku koya Yesiusi kaa mina otuma eo kumana wa'm epi se mina Yohanesi wa'm uwo ndoiba takumiyaabuu se mina kuwa ku ndo tupita se. Ku kaa ndo tupita sita mugo ndoe, ego kaa miya emi tau. Ese dama ndumbo ndo enei se. Ese oyu kan ndo mina eniwoo nai.

²⁶ Kena wai Yahudi bage ekii'm andagatake ee nda ndemina mina eniwoo se. Ese mike dim mbugu tau kan mina eniwoo nai. Se eniwoo nai se dodo me kaa ko Akawida mesema Pedisikida akaa bae kuwa wa'm mina yito se. Wa'm mina yitona “Anegisemee'm mina otuma mbeenaa si nige-neke aoo ae,” se yanigeke kumana “Apodosi woe, endiyato mina ku mbeenaa kanige-maniimba nde. Ana mba nda meae,” se aseke. Se asemana yau kaa pemana ko akaai Anegisemee'm sese mina ku ese dama yatupeke. Apodosi me me Yesiusi kaa ese dama masimaasi na ese dama yatupemagea.

²⁷ Kena ndo waa ko Apodosi wa'm “Ni Akaya maa kaa peao gai,” se aseke kumana ko Epesiusi okaa yoo togea se Yesiusi kaa kinaa bage ekii'm asina ko “Bada o, ai ogiyoo peke bada,” se aseke. Se asemana ko wa kaa kapuge yaawudumeke. Ogiyoo bage ekii “Mee o. Aba, aba,” se yasisi na wa kaa kapuge yaawudumeke. Yaawudumemana ko me kapuge me wa'm dopeana ogiyoo Akaya maa me kaa pemake, Apodosi me ko. Akaya maa kaa pemana Anegisemee mbaya bage kiyoo aoo. Eduga ko Anegisemee wai ku bage ku tao aii se dama yatoyaami kumana ekii Yesiusi kaa “Mike ae,” se nigeke bage kimea. Ku mugo bage Apodosi mesema ade se. Ade semana ndo waa ko Apodosi wa'm awake-awake se kao kuwa ku bage tao dama yatoyaabuu nai se kao waa.

²⁸ Wa'm Yesiusi mbaya bage tao dama tosi na se kao ona me ko wai Yahudi bage mesema uwa da kaa ese oyu ndo a-mbemoo naa-mbemoo se. Mina a-mbemoo naa-mbemoo nai se dodo me kaa ko Anegisemee'm kapuge nda mina ndamana Yesiusi kaa mina tupita se. Wa'm se tupina ko “Ku kapuge nda mina ku dewee. Ku dewee. Yesiusi wai mike Anegisemee wa'm wa-nini yawenimana yapeyaami se Keditusi to ku dewee,” se mina kuwa tupita se. Apodosi wa'm se awata simi.