Edaseo Bage 12 - Anegisemee'm Mina Kapuge

Yakobusi mbatumana Petadusi peniyada ee nda domaamea se mina da

¹ Se awake se dodo me kaa ko ese ata emi tau ebo toke se mee to Hedodesi wa ko wai Yesiusi mbaya bage kaa ese peu, bodi se kao yaawaao gai kumana wa'm se asina ko “Yesiusi mbaya bage ebanaa ku yaa pineana peniyada ee nda domoo siwee,” se aseke. Se asemana ko wa'm tentada bage ekii'm se awagea.

² Se awagea se dodo me kaa ko wa'm waya se asina ko “Yohanesi wa'm yaamee, Yakobusi me me, me yado'm yambatumawee,” se aseke. Se asemana ko Yakobusi yambatumamea.

³ Yakobusi yambatumake se dena ko Yahudi bage'm ebo bage waa ekii gai. Ku ebo bage gai kigea ae se dei yako Hedodesi wai wa'm tentada bage waya yapeyaana Petadusi namba pi-yapamitana peniyada ee nda domaake. Petadusi wai yapamitake dodo me ko Yahudi bage ekii'm Kade-Pade se Edoondi Badii n'takea se dodo me kaa se yaa yapamitake.

⁴ Yaa yapamitana peniyada ee nda domaake. Peniyada ee nda domaana ko Hedodesi wai Petadusi dito sisi na se tentada bage waa, ekii 16 mugo mbeaseke. Ku 16 mugo ku ko ku buii wui yaake. Buii ona kaa tentada wui. Buii ona kaa tentada wui. Buii ona kaa tentada wui. Buii ona kaa tentada wui. Se mugo se mbeaseke. Se mbeaseke se dodo me kaa ko Hedodesi wa'm nigina ko “Petadusi mbatumaao kan Um Dona Badii dano kiyaana notake se dodo waa ko ni Petadusi bada madona Yahudi bage'm egi kaa pi-mbeasiita. Wa'm awami-awami mina waa ku kaa mina damana yambatumaao kan se awaata, ae,” se nigeke.

⁵ Hedodesi wa'm se nigeke kumana Petadusi peke sekii tau. Wai peniyada ee nda ndo se tutai. Peniyada ee nda ndo tutai koya ogiyoo Yesiusi mbaya bage waa ekii Petadusi kaa Anegisemee mbo ese oba yaasetoo siwoo nakea.

⁶ Kisena ndo waa ko ea na gapi, Hedodesi wa'm “Anikee Petadusi kaa mina daata ae,” se nigeke gapi ese ndeemaa to se dodo me kaa ko Petadusi wai onu omeke. Onu omeke se dodo me kaa ko naa tentada mee to, naa tentada mee to, ese epopi nda Petadusi. Kena besi one mugo naa yaa da epetai naa yaa da epetaina tentada wiya ku mesema omeke. Kena gine kaa dito se se tentada bage waa kiyoo miya aoo.

⁷ Ku koya abayai! Petadusi wai onu omitai se dodo ndoe, kuhai-kuhai Tuhani wa'm epo wado bage ona aoo kidai. Aoo kii yako peniyada dukune nda ese ao da kidai. Epo wado me to aoo kina ko wai Petadusi'm pame kaa mantai. Mantana anoweyaake. “Mani anowee! Mani anowee!” se aseke. Se asemai ndoe Petadusi yaa da kaa epetapea se besi one ku ekata-pata semana mbeaseke.

⁸ Ku semana ndo waa ko epo wado mee to wa'm Petadusi se asina ko “A'm duka kaa mbisine one ambe mataa,” aseke. “A'm sepatu namba mataa,” aseke. Ku matana ko waya se asina ko “A'm eduu se maawiya me miya mataa. Ni ogudi mee,” se aseke. Epo wado mee to wa'm Petadusi se aseke.

⁹ Se asemana Petadusi wa ko wai epo wado mee to wa ogudi peke. Wa ogudi peta mugo ndoe wa'm nigina ko “Epo wado mee to wa'm awai ku uwa da kaa awaan tau. Iya-iya ku ndo deo ae,” se nigeke.

¹⁰ Se nigeke se dodo me kaa akaai peke. Tentada dito se bage buii ona nikaa dawaake. Waya se peke wiya aoo me buii nikaa dawoo se dodo okaa yoo peao kan besi se gine ona aoo. Besi se gine kaa ukita mugo ndoe, besi se gine to me wanigee wadimai. Wanigee wadimana ko gine wadita nda pidoseomina enda be kaa pemake. Enda be me nda pedona ambuu kaa mugo pemai ndoe epo wado mee to wai Petadusi mbo kam aii nda bontai yako egidai.

¹¹ Kiyoo egidai se dodo me kaa ko Petadusi wa'm asina ko “Ai, ai. Endo nigi seo ndeo. Onu kaa depa se ku tau. Uwa da kaa ae,” se nigeke. “Hedodesi wa'm yaa da naapatataao kan Tuhani wa'm epo wado mee to naameyaapi ae,” se nigeke. “Kena Yahudi bage ekii'm naawaao kan sipea ku si maanisi na ndo Tuhani wa'm se naawapi ae, se mina ku nigi seo,” se aseke.

¹² Ku se ku nige-neke se dodo waa ko pedona Madiya wa'm ee kaa pemake. Me Madiya me ko me Yohanesi wayoi. Me Yohanesi me me, wai ekaa wiya aoo. Ona Yohanesi. Ona Madakusi. Se. Kena Madiya wa'm ee nda kiyoo ekii kooda mugo andagatana Anegisemee asetoo nakea. Se awake se dodo me kaa ko Petadusi wa kiyoo pemake.

¹³ Kiyoo pemana ko eda ebe kaa gine aoo. Me gine me kaa yaa mbaku-mbaku se aseke. Yaa mbaku-mbaku se aseke se dodo me kaa ko esimba kiyoo masii mata se pane to ona aoo. Wai ekaa da ko Edoda. Me Edoda me me, me gine kaa mbaku-mbaku se mina yeke kumana gine wadeao kan meke.

¹⁴ Gine pasi kaa ukita mugo ndoe, Petadusi'm mina yeke. “Ai, ai. Me mina me ko me Petadusi mina yeo ae,” se nigeke. Se ku nigimai ndoe ese bani-bani se aoo. Ese bani-bani se kumana “Gine wadiinka ae,” se dimi si nigina ko mee kooda ekii mbo ndo aii oika peke. Oika pemana se asina ko “Petadusi ukipi. Wa gine kaa aoo,” se aseke.

¹⁵ Ku koya ekii'm asina ko “Mbeduwa! Ai yuwee keope se kadeo,” aseke. Ekii'm se aseke koya tau. Edoda wai “Petadusi ukipi, ukipi, ukipi” se ku ndo asitai kumana ko ekii'm asina ko “Ku kindo Petadusi yaedimeke se epo wado mee to me ndo ukipi sima,” se aseke.

¹⁶ Se aseke se dodo me kaa ogiyoo Petadusi wai gine kaa mbaku, mbaku, mbaku se awatai. Se awatai se dodo me kaa ko gine pi-wadeke. Gine pi-wadina Petadusi deke. Petadusi degea ndoe ese “Abayai!” se nigeke.

¹⁷ Ese “Abayai!” se nigeke se dodo me kaa ko ekii “Koo tomu taae,” se aseao kan Petadusi wai yaa da ane-ane se awake. Yaa da ane-ane se awamana ekii'm mina ku wisin'tagea se dodo me kaa ko Petadusi wai Tuhani wa'm peniyada ee kaa kam yaa patatana yapeyaake mina ku yanige-maneke. Ku yanige-manena ko Petadusi wa'm ekii se asina ko “Ni'm kasipa mina ku naadopeana ogiyoo Yakobusi nuwa, Yesiusi kaa kinaa bage waa ku nuwa, ekii mbo pi-naaseae,” aseke. Ku atana ko wai wa-nini yoo peao kan peke.

¹⁸ Omai tukuma ogiyoo peniyada ee nda dito se se tentada bage waa ekii ese ndugidina pana-pana se aoo. Petadusi'm pepi yoo si degea yako ese dimina gado kidai.

¹⁹ Kena Hedodesi wa'm asina ko “Petadusi ebiwee. Ebiwee,” se aseke. Ebeke, ebeke, ebeke koya aii bada ndo. Petadusi si deke. Kena Hedodesi wa'm Petadusi dito sipea se tentada bage ku biseawi se mina se asina ko “Eki mbao awata sipea dodo Petadusi peyaapea naa ya?” aseke. “Ni'm wa-nini tentada bage mewee. Petadusi dito sipea se tentada ku yambatumei siwee,” aseke. Hedodesi wa'm asina. Kena ndo waa ko Hedodesi wai Yudea maa kaa batana Kaisedea okaa yoo mbeenaa pi-towee simi.

Hedodesi boyaake mina da

²⁰ Hedodesi wa ko wai Sidusi bage nuwa, Sidoni bage nuwa, ku kaa ese yima kiki kimi. Wai ekii kaa ese yima kiki kumana ko ekii'm nigina ko “Yai Hedodesi wa'm ebo toke maa me ko me enii'm noke kao masiwee se yoo dodo. Ku kindo wa'm yima kiki ku si ta keke waa, anikee waa namo apuu kaambea ee? Tau ee?” se nigeke. Namo apuu omeke ku kaa widaana “Mina dake bada ae,” se nigeke. Ku se ku nigimana ku mbaya bage ekii Hedodesi mesema mina data taao kan ukeke. Kiyoo ukimana ko eduga edugana ekii Bedasetusi mesema mina dake. Me Bedasetusi me me, me Hedodesi wa'm em'mbee ee yaadito se mee to. Me mbo pemana wa kita mina dake. Wa kita mina damana Bedasetusi wa namba ekii mbaya bage keke. Ekii mbaya kina ko “Hedodesi woe, a enii mesema apoeao kan mina daa nde,” se aseke.

²¹ Se asemana ko Hedodesi wai ku kaa mina daao kan mbutu maneke. Mbutu manina me gapi andagatagea se dodo ndoe, Hedodesi wa'm manaa se kao ku ese wa-nini. Ese ebo toke se sinowi mee to ae, se desi na se manaa se kao ku make. Ku matana wa'm ebo animana ta se yoo me kaa animake. Me kaa animana ko ku mee kooda waa ku'm emaa misi kaa ebo mina eneke. Ebo mina enei, enei, enei se dodo ko

²² ku yito se bage namba Hedodesi yapapa taao kan mina ebo woewoo nakea. Ekii'm mina ebo se asina ko “Yai, wa'm mina da me mee tuma kaa mee to mugo mina da tau se deo,” aseke. “Wa'm mina da me ese anegisemee mugo mina da dodo ae se deo,” aseke. Ku mugo mina woewoo nakea.

²³ Ku mee kooda waa ekii Hedodesi yapapa taao kan mina woewoo sita mugo ndoe, ku mina ku Hedodesi wa'm ese yeao gai se mina. Ku yeao gai kumana wa'm dim'mba nda Anegisemee wa kaa “Paamee,” se ku nigaan tau. Wai wa kaa to dodo se aoo. Wa kaa to dodo se kumana Tuhani wa'm epo wado mee to ona Hedodesi em yadake. Em yadai se dodo ndoe wa nduwawe ese omainaa ku otuma nom'take. Ku nom'tana ndoe me Hedodesi bota. Se.

²⁴ Me gumba me kaa ko Anegisemee'm mina ku mee waa ekii'm donaa asinaa kea yako ku kaa “Mike ae,” se nigeke bage ku ese oba kiwoo, agi kiwoo semuu nakea.

²⁵ Kena Banabasi mesema Seaudusi akaa'm Yedusedem okaa yoo awaao kan sipea ku dano kumana Yedusedem okaa yoo batana peke. Batana peta mugo ndoe Yohanesi Madakusi wa namba bada matana peke. Bada matana mi-ndagidi pedona waya An'diokiya okaa yoo me kaa waya pemake. Ekii'm se awamea.