2 Kodintusi 4 - Anegisemee'm Mina Kapuge

Anegisemee'm dama mina me mee'm dimina da waa yawadaniyaasi na se mina da

¹ Anegisemee wa'm aii se nagane se dimina da me kaa kiyoo kam wa'm yipi se okaa mina donaa asinaa sisi na se ndanda me enii'm yaa da kaa namatami. Wa'm se namatami kumana dim katu keke sekii tau.

² Waya na kiyaa Anegisemee nadito nai kumana wa'm mina ku ese ndumbo ndo eniwoo naka. Kena ogu bage ku ekii enii'm mina nayitona “O, Paudusi mesema wamugoi nakawaa mesema, ekii ese ndumbo mina ndo eniwoo sipea, ae,” se nanigi sisi na enii'm sese ku ko ku se de. Ona me ko si maaneke kan koo awake sese, ogu bage deke waa ego kiyaambi se sese kuwa ku mugo sese ku enii duwa matana mbeenaa kaa miya si awake, me ona. Kena ebanaa bage ku mee yadeba taao kan Anegisemee'm mina wa-nini kowiyaana eneke. Me mugo sese me enii'm ese awaao be se kao. Mee yadeba se ku enii'm ese awaao be se kao koena. Aii uwa pana ese ndumbo mike se mina ku ndo eniwoo taao gai, me ona.

³ Enii Anegisemee'm dama mina ku ese dama, ndumbo ndo eniwoo naka kumana ebanaa bage ekii “Si deo. Si deo. Masimaao kana!” se aseke kipii kindo ko ku mugo bage ku aii bage se ku tau. Ku okaa boyaasi na se enda da nda penaa nakea se bage waa ku ndo.

⁴ Dee, Keditusi kaa “Mike ae,” nigaan tau se bage ku ko ku emaa diyoo aoo se bage waa mugo dodo. Mbao kaa emaa diyoo aoo ee enta mugo ndoe, tau. Mee tuma da bage ekii'm yapapa nakea se mbae da se anegisemee to, maa en'ndo otuma ku wado ebo toi se Ibedisi wa ko, wai eki'm dimina da nda emaa diyoo aoo se dimina yakumamoo nai kumana enii dama se mina ku deao kana se yakiyaabuu nai. Dee, Keditusi wa ko wai Anegisemee wa'm sipi mugo ku uwa da kaa deyaabuu sisi na se mee to. Kena wa kaa dama mina me ese asiyoo kam asiyoo abayai se mina da. Ku kumana maa kaa togea bage ekii me mina me dama deke waa, ekii'm dimina yawadaniyaabuu siyaa. Ku kindo me mina me si desi na Ibedisi wai ekii'm dim'mba nda emaa diyoo se dimina yakumamoo nai.

^5-6 Ku koya Anegisemee wai Keditusi wa kaa kiyoo enii'm dimina nawadaniyaabuu taao sekii. Dee, ese eduga ko se-kao we-kao en'ndo otuma aoo kiyaan tau yoo otuma tuku ndo aoo. Kena ku tuku nda kiyoo “Ao da aoo kiyaae,” se enta mugo ndoe, ao da aoo kiyaami. Ku mugo yaa, Anegisemee wai enii'm dimina da nawadaniyaabuu nai. Mbao kaa nawadaniyaake ee, tau. Wai Yesiusi uwa da kaa nadeyaabuu semai yako wa kaa kiyoo enii'm se nigina ko “Yai, Anegisemee wai ese asiyoo kam asiyoo wa-nini se Anegisemee ae,” se nigeke. Enii ko enii aii bage ndo. Enii Yesiusi guna miyo tona eki Kodintusi bage tao masii kaamata sisi na se bage waa ndo. Ku kindo enii mee mbo mina eneke se dodo me kaa ko enii kaa to napapasi na se mina mbeenaa kaa miya si eneke. Yibanda kiyaa, Yesiusi kaa yapapa sisi na se mina ku ndo eniwoo naka. Ku taao kan enii se enina ko “Yesiusi Keditusi wa ko wai ese ebo toke se Tuhani,” se mina eniwoo naka.

Anegisemee'm ese abayai edeao kana se mina me ese maboo aoo se bage waa ekii yaa da kaa yamatami se mina da

⁷ Anegisemee wa'm dama mina me ko wa'm namatami se mina me me, me ese ebo edeao kana se mina mugo dodo. Ku mugo mina namatami koya enii oyu se bage waa se ku tau. Enii ese maboo aoo se bage waa. Ese mani kabiyaao sekii se mee'm ndagin'ta maa ndaginipea se maa awe da waa mugo dodo se bage waa. Ku kindo ko mbao awasi na edeao kana se mina masewena ese maboo se bage waa, enii kaa namatami naa ya? Tau. Me mina me ko me ese yai se yaa mani da aoo kiyaami se mina da. Me enii mbo kam aoo kiyaapea se yaa mani da se ku tau. Me Anegisemee wa mbo kam aoo kiyaami se yaa mani da. Ku wa'm ndo aoo kiyaabuu nai se yaa mani da ae se desi na wa'm dama mina ku ese maboo se bage enii, enii'm yaa da kaa namatami.

⁸ Ku kindo ko enii'm ese maboo sese waa ku ko ku se de. Ona me ko enii'm yau-yau widigi natoyaabuu nakea se-kao we-kao ku se ene. Ku mike ebata tau koya tau. Ku mbeedi nambeasiin tau, me ona. Ona me ko enii'm widigi aoo se yoo me kaa kiyoo “Mbao awai ndo naa bada kaambi ee?” se nigeke koya tau. Dim katu nakiyaan tau, me ona.

⁹ Ona me ko mee waa ekii peu-pau naawawoo nakea koya tau. Anegisemee wa ko wai nagimitaan tau, me ona. Ona me ko mee waa ekii ese bodi naababa siyaabuu nakea koya tau. Ekii naboyaake sekii tau, me ona. Dee, enii ko enii maboo ko maboo koya naboyaan tau. Ku si naboyaai yako “Ai, ai. Anegisemee wa'm abayai se yaa mani da me ese asiyoo ae,” se deao sekii kidai.

^10-11 Eduga ko mee waa ekii Yesiusi yaboyaamea. Endo nde miya enii wa'm ndanda yaa-awanaa sita mugo ndoe ogu bage naboyaabuu si de siwoo nakea. Ndumbo kaseo! Enii toke ko toke koya Yesiusi tao ndanda yaa mu-mu naka kumana omiyaa siyaa ku ndo mbeenaa aoo kumana waa ko boyaa. Ku koya me nde miya me ese maaneke se kao. Dee, enii'm maa buboo ku mbeenaa aoo kumana waa ko boyaa koya iyaao takea ae se nadegea yako ogu bage ekii'm nigina ko “O, Yesiusi wa mike iyaao tai ae. O, ekii si boyaana ndo yatoyaabuu nai se mee to me Yesiusi ae,” se nigeke. Ku se ku nigi sisi na omiyaa siyaa ku ndo enii mbeenaa aoo kumana waa ko Yesiusi kaa yaaboyaa.

¹² Kiyoo kam ni'm kaseao kan sipa mina me ko me se de. Anegisemee'm dama mina me eniwoo naka se dodo me kaa enii'm moo wado kiyoo naboyaasi na se aya kiyoo aoo se deo. Ku koya enii mbo kam Anegisemee'm dama mina yemea kumana eki Kodintusi bage eki'm moo wado omiwoo towoo sisi na aya aoo ae se kadeo. Ku kindo bada kee kaabuwaao kan keo see, se nigeo.

¹³ Anegisemee'm mina kapuge me nda kiyoo mina ona me se wudumana ko “Ni Anegisemee kaa ‘Mike ae,’ nigeo kumana mina eniwoo sipa,” se wudumami. Me mina wudumami se mee to wa'm “Mike ae,” nigimi se dimina da me enii'm dimina da nda nigeke dodo. Enii namba Anegisemee kaa “Mike ae,” se yanigimaa yako Keditusi kaa mina ku si dan ndo eniwoo semuu naka.

¹⁴ Kase enta mugo ndoe, enii dimina ona ndo kan se nigina ko mee waa ekii enii naboyaao sekii ko sekii koya tau. Tuhani Yesiusi maa poo yoo yandomami se Anegisemee wa ko wai enii namba maa poo yoo nandomaasi. Enii Yesiusi nda nadipinimapi bage kumana enii, eki mesema maa poo yoo nandomei-pai semana wa mbo pake-natoyaabuu siyaasi. Me enii'm mike epi se mina kumana mina eniwoo naka.

¹⁵ Dee, enii bodi ababa semuu naka koya ku bodi ababa se ku eki tao maanisi na se kao. Kase enta mugo ndoe, enii'm bodi ababa se me kaa kiyoo Anegisemee wa'm aii se dama katoyaabuu taao gai se dimina, me kaa mina me mee mbo odeeniyaabuu siwoo nakea. Odeeniyaabuu sita mugo ndoe ku mina yepea bage waa ku oba kiwoo semuu nakea. Waya kiyoo kam Anegisemee ekaa da ebo mbeana “Paamee, mataae,” se eniwoo nakea mina me nde miya oba kiwoo agi kiwoo taambea.

¹⁶ Ku se ku aoo kaambea kumana enii ko enii dim katu keke sekii tau. Enii'm maa buboo ku maboo kiwoo, yanu kiwoo semuu naka koya tau. Omiyaa siyaa ku ndo Anegisemee wa ko wai enii'm dimina ogindaa kiyoo oyu se dimina guu nandemita siwoo nai.

¹⁷ Enii'm dimina guu nandemita siwoo nai kumana enii'm se nigina ko “Ai, ai, endo se gumba bodi ababa se aoo ko aoo koya ku mbeedi. Ku anikee waa dano kaasi se kao,” se nigaao sekii. Waya wada nda enii'm bodi ababa se aoo kiyaake kao ku ebata tau. Kase enta mugo ndoe, Anegisemee wai enii'm bodi yaa-ababa se ku nadei yako ku kaa kiyoo kam dama tosi na aya naa-epipi semuu nai. Ese asiyoo kam asiyoo abayai se nigi taao kana se kao waa. Ku ese si dan ndo taa kiyaao kana se kao waa. Ku mugo dama tosi na aya naa-epipi semuu nai.

¹⁸ Kum seta kaa, mee'm naawawoo nakea ku deao sekii koya enii'm emaa misi kaa deao sekii se kao ku dito taao be. Enii'm deao sekii se kao ku dano kaasea se kao waa koena. Yibanda kiyaa, deao kana se kao waa, Anegisemee'm enii tao naa-epipi nai se kao kuwa ku ndo dito taao gai. Enii'm deao kana se kao ku taa kaao kana kaasea kao waa koena. Ku kindo ku ndo dito siwoo naka.