1 Teseadonika 5 - Anegisemee'm Mina Kapuge

Tuhani Yesiusi wa'm waya ukaasi yoo me mike pi-pamaasi kumana ku kaa dama dito taae, se mina da

^1-2 Yesiusi kaa eniikinaa bage waa woe. Tuhani wa kaina gado ukaasi ee? Kauu gumba ukaasi ee? Ku kaa mina ku eki'm eduga yemana dama masimamea se mina waa. Ku kumana ku kaa kawudumeke nde miya, si kawudumeke nde miya, tau. Eki'm yemana masimamea mina ku sekii. Dee, eki'm dama masimamea mina ku se de. Tuhani wa'm ebo se gapi me mee'm si nige-neke se gumba pi-pamaasi, ese oma maseke mee to wa'm sese oma maseao kan ndee nda ukeke sese mugo dodo se pi-pamaasi. Mee'm si dito nakea se gumba Tuhani wa ukaasi koena.

³ Waya wada nda wa'm ukaasi yoo me ko me se de. Anikee waa mee waa ekii'm se asina ko “Enii'm toke yoo widigi tau ndo togea. Nawidaa-widaa se kao ona kaa miya emi tau,” se asiisea. Ku mugo mina asiisea koya ku se ku asei sita mugo ndoe, mina wiya tau kumana ekii'm moo kaa si yamaaniyaake aya endaaniyaasi sima. Endaaniyaake se gado me kaa kiyoo oowaao sekii se mee to ona kaa miya emi tau kaasi. Dee, mina wiya tau kumana mani si yamaaniyaambi me ko me ese daba aoo se ambii to wa'm sese mugo dodo. Kase enta mugo ndoe, daba aoo se ambii to wai yuwa anei taao pasi se dodo ndoe, wa namba mina wiya tau kumana andine wandine se kidai. Me ambii me ooke sekii tau. Yuwa endaaniyaake ndo sekii. Se mugo yaa, Tuhani wa'm ukaasi yoo sese namba mei!

^4-5 Ebanaa bage ku ko ekii ndee nda togea se bage waa mugo dodo. Ku mugo bage ekii'm woo-woo se kaa ese emaa diyoo aoo koena. Ku kaa kiyoo Tuhani ukaasi se gumba ndoe ese ndugidi se aoo kaasea se bage waa. Ese oma maseke mee to ndee nda ukii yako epoo bage ndugidi siyaake mugo dodo kaasea. Ku koya eki Yesiusi kaa kinaa bage waa ku mugo ndugidi se si ndugidi taae. Eki ndee nda togea se bage waa baa. Eki'm sese ko ese dimina wadaniyaapi se bage waa kumana ese apikaa ao da nda togea bage waa mugo dodo. Ku kaa kiyoo Tuhani wa'm ukaasi yoo dito siwoona dei ndoe si ndugidi taae.

^6-8 Enii'm dimina nawadaniyaai yako ese apikaa togea se bage waa kumana ndee nda ndigi se bage ekii'm sese ku si awaae. Kase enta mugo ndoe, ndeemaa se dodo me kaa onu omaao gai se bage ku omeke ndo. Onu omigea yako yau-yau aoo kigea kao ku si nige-neke ndo. Aii si deke koena. Kena edidi kaao gai se bage ku nde miya ndeemaa se dodo me kaa bobo uwo nona edidi keke. Edidi kigea yako dim'mba tau se kao ku ndo awawoo nakea. Ku se ku ndee nda toke bage ekii'm sese koya enii ko tau. Enii ko apikaa toke se bage waa. Enii apikaa togea se bage waa kumana onu omitakea se bage ekii'm sese ku si awaae. On tomu se dimina me mbeana dimina wodoneke kan yau-yau aoo kigea kao ku kaa dama dito taae. Dimina andimata kan eki yimbi maniwoo taae. Eki yimbi maniwoo taao kan Anegisemee kaa “Mike ae,” se nigeke se dimina me nde miya yaa mu-mu taae, me ona. Kena ogu bage kaa yaembaawoo taae, me ona, wiya. Ku dimina wiya ku kaa kiyoo eki yimbi maniwoo nakea kipii kindo ko me enii kaa to edimisi na se dimina waa yaa mu-mu se mugo dodo. Ese tentada bage ekii kaa to edimaao kan egi kaa mbiseoo se duka da matake mugo dodo. Kena eki yimbi maniwoo taao kan se dimina ona me ko me Yesiusi kaa em'ndoo nakea se dimina da. Wa kaa em'ndoo se ku kaa kiyoo enii'm se yanigina ko “O, enii'm woo-woo se kaa si em nadana ndo dama natoyaasi yoo ku Yesiusi wa'm mike pi-naapamiyaasi kao ae,” se dimina da se nigimana em'ndoo nakea. Eki yimbi manina se nigiwoo nakea me ko me ese eki kaa to edimisi na besi se daikomiya matake mugo dodo. Ese tentada bage ekii kaa to edimaao kan besi daikomiya matake mugo dodo.

⁹ Anegisemee wa'm enii tao dama natoyaabuu taasi yoo ku enii mike dama em'ndoo taao sekii se kao. Kase enta mugo ndoe, Anegisemee wa'm eduga aii dodo naambeasimi me ko me enii'm woo-woo se ku kaa yima kiki aya nadotaao kan naambeasimi se ku tau. Wai enii'm woo-woo se kaa si em nadan ndo omiwoo towoo natoyaao kan me ndo naambeasimi. Mbao kaa omiwoo towoo natoyaao sekii ee en ndoe, tau. Enii'm Tuhani, Yesiusi Keditusi me me, wai enii kaa enii tao naabomi kumana ku kaa kiyoo Anegisemee wai dama natoyaao sekii, ese wa'm aii dodo enii tao naambeasimi mina da kui.

¹⁰ Yesiusi wa'm enii tao naaboke me ko me aii se naabomi se ku tau. Anikee waa Yesiusi waya ukaasi se dodo me kaa enii wa mesema dama natoyaao kan enii tao naabomi. Buwaan tau se bage waa ku nde miya, bomea se bage waa ku nde miya, enii ndepo wa mesema tuwaasea sima.

¹¹ Ku kasipa mina kuwa ku ese mike pi-pamaasi mina waa kumana eki'm dimina etaa kakiyaasi na ku mina ku masewena a-kumamoo naa-kumamoo siwoo taae. Kena eki'm dimina ku Yesiusi kaa takuniyaasea na waya ku mina ku masewena a-koe naa-koe siwoo taae. Eki'm a-kumamoo naa-kumamoo se nuwa, a-koemoo naa-koemoo se nuwa, ku eki'm endo nde miya awawoo nakea sese mugo kui. Ku kindo me bage sese me si dan ndo waya wadobo nde miya awawoo taae, se kaseao kan sipa.

Paudusi wa'm ese takanu mina waa

^12-13 Yesiusi kaa eniikinaa bage waa woe, endo ko ni wa-nini mina kasiinka ndeo. Eki mbo kiyoo Tuhani mbaya bage ku wado dama kadito se bage waa aoo. Ku bage kuwa ekii eki tao ndanda ese oyu kan kaawawoo nakea se bage waa. Ku eki'm dimina kakoewoo nakea se bage waa. Ku bage kuwa eki ku mugo ndanda kaawawoo nakea kumana ku bage ku kaa dama se dimina ku ndo yanigiwoo taae. “O, ku enii dama nadito se bage waa ae,” se dimina ku ndo yanigiwoo taae. Ese yaembaake kan “O, ku enii tao maanisi na se bage waa, ae,” se nigimagea yako “Paamee. Mataae,” se dimina ku ndo yanigiwoo taae. Ku kasipa mina ku dama ndo awawoo taae. Ku Yesiusi mbaya bage wado dama dito se bage ku kaa se yaawawoo taae ku koya kadito se bage ku kaa kiyoo ndo se ku tau. Eki ogu bage ku nde miya si a-wisine naa-wisine semana dama widigi tau ndo towoo taae. Se.

¹⁴ Eniikinaa bage waa woe, endo ko enii'm oyu kan kakoeta taao gai se mina ku kasiinka ndeo. Yambayaa aoo se bage waa ku mbo pemana “A'm yambayaa ku tau de! Oyu kan masii masiwoo taae!” se mina se ku pi-yakoeta taae. Me ona. Kena dim mbugu aoo se bage waa ku mbo gane kan dim yatakuniyaabuu taae. Me ona. Kena maboo aoo se bage ku nde miya oyu yakiyaabuu taae. Me ona. Kena mee en'ndo otuma ku kaa mani si yagodeae. Aii tunaa ndo yaawawoo taae. Me ona.

¹⁵ Kena mee ona wai peu se kao kaawake se dodo me kaa ko wa'm peu kaawapi ku dodo abuu yamaseao gai se dimina da me si maaneke. Abuu maseao gai se mee to wa mbo “Ku tau de! Ku tau de!” se mina pi-aseae. Eki otuma me bage dimina wisin'tana ndo ogu bage kaa dama ndo yaawa-de siwoo taae. Yesiusi mbaya bage ku kaa nuwa, mee en'ndo otuma ku kaa nuwa, ekii tao dama ndo yaawawoo taae. Me ona.

¹⁶ Ona me ko dama toke nde miya, peu toke nde miya omiyaa siyaa ku si dan ndo bani-bani siwoo taae. Me ona.

¹⁷ Kena ona me ko Anegisemee mbo asetaake ku nde miya si dan ndo asetoo siwoo taae. Me ona.

¹⁸ Kena ona me ko Anegisemee wa'm gai kan se kaambeana ko “Keditusi Yesiusi nda dipinimapi se bage en'ndo otuma eki'm toke yoo, ku peu toke nde miya, dama toke nde miya, ku en'ndo otuma ku kaa ‘Paamee! Aii!’ se naseao ndo bada,” se kaambeasipi. Ku kaa kiyoo eki wa kaa si dan ndo “Paamee! Aii!” se ku ndo asiwoo taae.

¹⁹ Kena ona me ko Anegisemee Dim'mba wa'm kakumamoo nai ku si dapimana si deoyaae.

²⁰ Kena agu bage ekii “Anegisemee Dim'mba wa'm nakumapi se mina ku aoo,” se aseke se dodo me kaa ko ku mina ku kaa duwa matana “Ka! Ku ni be! Me kase bage mina?” se ku aseke me si maaneke. Ku si awaae.

²¹ Ese maaneke me ko wa'm mina ku dama yitona pikamoo se bada. “Wa'm enipi mina ku mike Anegisemee Dim'mba'm yakumapi mina ee? Mee nigita kaa mina ee?” se pikamoo taae. Se pikamoona ndo waa ko ku mike Anegisemee Dim'mba'm yakumapi mina kipii kindo ko ku ese dama se mina kumana ku dama yaa mu-mu taae.

²² Eé, ku wa'm mina tau kipii kindo tau. “Ku mbae da mina ae,” se nigimana mbeenaa kaa miya si dito taae. Ku kasipa mina kuwa ku enii'm oyu kan kakoeta taao gai se mina waa kumana ku se ku dama ndo yaa mu-mu taae. Se kaseao kan sipa.

²³ Anegisemee wa ko wai widigi tau se dimina da nakumawoo nai se Anegisemee to. Kena me Anegisemee me me, wa'm eki tao waya wadobo “Se kaawai waa bada ae,” se mina me se de. Endo kam wado kise Yesiusi ukaasi kam miyo epopi nda kuwa ku Anegisemee wa'm eki tao kakiyaana ko woo-woo se mbeenaa kaa miya emi tau se bage waa se kakiyaai waa bada ae, se nigeo. Waya ku kaa kiyoo eki'm “Oowoo,” se nigeke ku nuwa, eki'm nigeke-nigeke ku nuwa, eki'm awake-awake ku nuwa, ku en'ndo otuma ese wa-nini woo-woo se mbeenaa kaa miya emi tau se kakiyaai waa bada ae se nigeo. Mbao awasi na wa-nini kakiyaabuu nai waa bada ae se enta mugo ndoe, tau. Anikee waa Tuhani Yesiusi Keditusi wa waya ukaasi se dodo me kaa ko “O, eki dimina ndumbo se bage waa ae. Woo-woo se emi tau ae,” se kadesi na Anegisemee wai eki'm dimina waa ku dama kakiyaabuu nai waa bada ae, se nigeo.

²⁴ Anegisemee wai wa'm amanimami mina en'ndo otuma pi-pamiyaabuu taasi ndo. Kena wa'm eduga se naamanimami mina ona me ko “Ni mbaya bage kaae. Dim ndumbo se bage waa kakiyaabuu taamba nde,” se naamanimami. Wa'm se naamanimami kumana ba-gamitake sekii tau. Ku mina kuwa ku wa'm mike pi-naapamiyaasi mina waa sima! Ku kaa ni dimi wiya-wiya se ona kaa miya emi tau.

²⁵ Eniikinaa bage waa woe, enii kaa enii tao naasetoo taae.

²⁶ Kena Yesiusi kaa eniikinaa bage mesema ade se se dodo me kaa ko “Aba, aba,” aseao kan ku otuma yaembaake kan poko kaa ebe a-dudu taae.

²⁷ Tuhani wa'm emaa misi kaa ese tamaao eo se mina kadotaa taanka ndeo. Ni'm kadotaa taanka mina me ko me se de. Me kaawudumapa kapuge me me, me dopeana Yesiusi kaa eniikinaa bage mbo en'ndo otuma uwa da kaa ndamanaa siwoo taae. Me kapuge me se ndamasea na se kadotaapa.

²⁸ Enii'm Tuhani Yesiusi Keditusi wa ko wa'm aii se dama katoyaake kuwa ku waya wadobo aii se dama katoyaabuu siwoo nai waa bada ae, se kaanigeo! Ni, Paudusi, ni'm mina se naa aoo.