Santiago 5 - Nuevo Testamento Tzeltal de Amatenango

Konsejo ta stojol te jkꞌulejetike

¹ Aꞌiya awaꞌiyik to, jaꞌex te jkꞌulejexe: Okꞌanik y awunanik yuꞌun te ya xba ataik paltae sok te ya xba ata awokolike.

² Te akꞌulejalike kꞌaꞌemlanix; te akꞌuꞌ-apakꞌike lajemix ta jochꞌubel.

³ Te oro awuꞌunike y sok te aplata takꞌine laj tsaꞌanix. Y te tsaꞌanixe jaꞌ me ya yakꞌex ta kꞌabal, y ya me slajinbeyex atiꞌbalulik jachik tutꞌil kꞌajkꞌ. La atsobikix te akꞌulejalik te jayebix tal kꞌaale, te jaꞌix te slajibal kꞌaal ayotike.

⁴ Te stojol te ma la awaꞌbeyik te genteetik te aꞌtejik ta akosechaike, yipalik ta yalel te ma lekuk tut la apasike. Y te Kajwaltik te spisil ya xjuꞌ yuꞌune, la yaꞌiyix te skꞌopik te jꞌatꞌeletike.

⁵ Te jaꞌexe aꞌbil akuxlejalik yuꞌun slujoal balmilal te ben kontentoexe. Yipalex ta jujpꞌel jachik tutꞌil wakax te ya sta skꞌaalel te ya xba mileke.

⁶ Te jaꞌexe la awakꞌikix ta chꞌayel y ta milel te machꞌatik maꞌyuk smule, yuꞌun te stukelike maꞌ skoltay sbaik ta kꞌop.

Juꞌuk kuꞌuntik smaliyel y te skꞌoponel Diose

⁷ Pero te jaꞌexe, kermanotak, juꞌuk awuꞌunik smaliyel jaꞌto te ya xtal te Kajwaltike. Jich tutꞌil te jꞌatꞌel ta kꞌaltike ya smaliy te ya skaj te stsaꞌamul skosechae, puersa jun yoꞌtan ya smaliy te ya yakꞌ jaꞌale.

⁸ Te jaꞌexe jich ya skꞌan te jun awoꞌtanik ya amaliyik euk, sok te junuk me awoꞌtanik, porke xnopet me ya xtal te Kajwaltike.

⁹ Kermanotak, ma me tutiꞌ awalbey abaik ta juju-tul. Yuꞌun jich me mak ya yichꞌelex jkuenta ekꞌa, y te machꞌa ya xꞌichꞌawan jkuentae ayix ta tiꞌ puerta.

¹⁰ Kermanotak, naꞌaik me te jun yoꞌtan a stsꞌik te swokolik te jꞌalwanejetik te kꞌopojik ta skuenta te Diose.

¹¹ Yuꞌun te joꞌotike ya jnaꞌtik te jun yoꞌtanik a kujch yuꞌunik te wokole. Te jaꞌexe awaꞌiyejik tutiꞌ kujch yuꞌun swokol te Jobe. Sok anaꞌojik tutꞌil a xchap sok ta slajibal te Kajwaltike. Porke te Kajwaltike lom bayal skekil yoꞌtan y ya xkꞌuxutaywan.

¹² Kermanotak, tulan skꞌoplal te ma me tutiꞌ awakꞌik ta testigo, ni te chꞌulchane, ni te balmilale, ni tutikuk xan yan. Te kꞌalal ya awalik: “Jichuk”, yuꞌun batsꞌi jich. Y te kꞌalal ya awalik: “Ma jichuk”, yuꞌun batsꞌi ma jichuk. Yuꞌun jich me mak ya yakꞌex ta chꞌayel te Diose.

¹³ Teme ay jtulukex te ma junuk awoꞌtanike, a me skꞌopon Dios. Teme ay machꞌa kontentoe, a me skꞌayojin Dios.

¹⁴ Teme ay machꞌa ay ta chamele, a me yikꞌ te ansianoetik yuꞌun te tijk hermanoetike, yuꞌun ya skꞌoponbe Dios ta skuenta, y ta skuenta te Kajwaltike a me yaꞌbe aseite.

¹⁵ Y te kꞌalal ya skꞌoponik Dios sok te xchꞌuunel yoꞌtanike, te jchamele ya me xlekub y ya me xjajchesot yuꞌun te Kajwaltike. Y teme ay mulawene, ya me xꞌaꞌbot perdon.

¹⁶ Jaꞌ yuꞌun, albeya abaik ta jamal ta juju-tul te amulike. Y kꞌoponbeya abaik Dios ta juju-tul, yuꞌun jich me ya xlekubex a. Bayal tut ya xkꞌot ta pasel teme jun yoꞌtan ya skꞌopon Dios te machꞌa toj yoꞌtane.

¹⁷ Te jꞌalwanej jꞌEliase jachik winik tutiꞌ joꞌotike. Y te kꞌalal la skꞌopon Dios te la skꞌanbe te ma xyakꞌ jaꞌale, maꞌ yakꞌ jaꞌal ta balmilal te jalaj oxeb jaꞌbil sok olile.

¹⁸ Ta patil, te kꞌalal la skꞌopon xan te Diose, lijk yakꞌ xan te jaꞌale, y te balmilale la yakꞌ te kosechae.

¹⁹ Kermanotak, teme ay machꞌa ya yijkitay te tut batsꞌi jiche, ya skꞌan ya akoltay tal sujtel.

²⁰ Naꞌaik te jaꞌexe teme ya asujtesbe yoꞌtan te jmulawil te ma lekil beuk stamoje, ya akoltay ta lajel te xchꞌulele, y la me awakꞌikix ta chꞌayel bayal muliletik te pasbotix perdone.