Santiago 4 - Nuevo Testamento Tzeltal de Amatenango

Te machꞌatik ayik ta skuenta te balmilale

¹ ¿Ba ya xtal te pletoe y te ya awut abaike? ¿Meꞌn ma jaꞌuk te tutik ma lekuk ya skꞌan awoꞌtanike te sil tiempo yipal ya sujexe?

² Te jaꞌexe, teme ay tut ya akꞌanik y teme maꞌyuk awuꞌunike, ya xmilawanex. Sok ay tut ya akꞌupinike, y ta skaj ma xꞌataik, ya xlijk awaꞌbe abaik pleto yuꞌun. Ma xꞌataik te tut ya akꞌanike, porke makꞌ ya akꞌanik ta stojol te Diose.

³ Ya akꞌanik pero ma xꞌataik, porke ma sluwariluk ya akꞌanik, yuꞌun ya akꞌanik ta slajinel nax te tut skꞌan skꞌupin te atiꞌbalulike.

⁴ ¡Jaꞌex genteetik te ma junuk awoꞌtanike! ¿Meꞌn ma anaꞌojikuk te machꞌatik jun yoꞌtan sba sok te balmilale, jaꞌ skontrainejik te Diose? Machꞌauk a te ya skꞌan te jun yoꞌtan sba sok te balmilale, jaꞌ ya skontrain te Diose.

⁵ Jaꞌ sluwaril te ya yal te Sjun Diose: “Lek kꞌanbil yuꞌun Dios te Espíritu te yakꞌoj nainuk ta koꞌtantike”, xchi me.

⁶ Pero Dios ya skoltayotik ta mas sok te slekil yoꞌtane. Yuꞌun jich ya yal te Sjun Diose: “Dios skontrainej te machꞌatik ya stoy sbaike, pero te machꞌatik chꞌunulike, ya skoltay ta slekil yoꞌtan”, xchi me.

⁷ Jaꞌ yuꞌun, aꞌ me abaik ta skꞌab te Diose. Pꞌajaik me te pukuje, y ya me xlok bael ta anel ta atojolik.

⁸ Tijilajanik ta stojol Dios, y ya me xtijilaj tal ta atojolik. Sakutesa te akꞌabike, jmulawiletik. Lekutesa te awoꞌtanike, jaꞌex te lom xchebet awoꞌtanike.

⁹ Ayuk me yajtal awoꞌtanik. Okꞌetay abaik y mala yaꞌlel asitik. Te atseꞌejike aꞌ kꞌajtajuk ta okꞌel, y te butsꞌan kꞌinale aꞌ sujtuk ta ajtal-oꞌtan.

¹⁰ Chꞌin xꞌawakꞌ abaik ta sit te Kajwaltike, y jaꞌ me ya stoyes akꞌoplalik.

Ma me xꞌawalbey skꞌoplal te yane

¹¹ Kermanotak, ma me awalbeyik ma lekuk skꞌoplal te yanetike. Te machꞌa ma lekuk ya yalbe skꞌoplal te yermanoe o teme ya yichꞌ jkuentae, jaꞌ ma lekuk skꞌoplal ya yalbe te mantaliletike. Y teme kajal ya awakꞌ aba yuꞌun te mantaliletike, jich ya awakꞌ aba tutꞌil alkal en bes te la achꞌuun spasele.

¹² Jaꞌ nax Dios te yakꞌoj te mantaliletike, y mismo tiempo a jaꞌ ya yichꞌ jkuenta. Y stukel ya xjuꞌ ya xkoltawan o ya xꞌakꞌawan bael ta chꞌayel. Te jaꞌate, ¿machꞌa ya akuy aba a te ya awichꞌ jkuenta te ajoy ta genteile?

Ma me jnaꞌtik tutꞌil te pajele

¹³ Te ora to aꞌiyaik to: te jaꞌexe ya awalik: “Te ora to o pajel teꞌ xbootik ta mukꞌul jtejklum, y ya xkꞌax kuꞌuntik jun jaꞌbil teꞌa. Ya jpas jchonbajeltik y ya jtajtik takꞌin a”, ya awutik.

¹⁴ Y ni ma xꞌanaꞌik tutꞌil ay te akuxlejalik te pajele. Te jaꞌexe jachikex tutꞌil jun sab jaꞌ te jtsꞌin nax ya xchiknaj, y te nax a ya xchꞌay bael.

¹⁵ Te tut ya skꞌan ya awalike, jaꞌ bi: “Teme jich ya skꞌan te Kajwaltik, sok teme kuxulotike, ya me jpastik to”, te ya awutike.

¹⁶ Yan te jaꞌexe ya nax atoy abaik sok te akopike, pero ma lekuk spisil ta jkaj te toybaele.

¹⁷ Te machꞌa ya snaꞌ spasel te tut leke y makꞌ ya spas, la sleix smul abi.