Santiago 3 - Nuevo Testamento Tzeltal de Amatenango

Skꞌoplal te kakꞌtike

¹ Kermanotak, jaꞌ lek teme maꞌyuk bayalex te ya xꞌochex ta maestro. Yuꞌun anaꞌojikix te machꞌatik ya jnojpestike, anaꞌojik te ya xꞌilbot yaꞌtel yuꞌun Dios.

² Jpisiltik bayal ya xmulawotik. Teme ay machꞌa ni maꞌyuk ya xmulawe yuꞌun te tut ya yale, jaꞌ toj ta winikil stukel, sok ya xjuꞌ yuꞌun te ya stojutes spisil te stiꞌbalule.

³ Te kꞌalal ya kaꞌbetik skatsꞌ preno ta stiꞌ te kawuetik yuꞌun te ya xchꞌuunbotik jmantaltik ae, jich ya xkꞌay kuꞌuntik skojtol te stiꞌbalule.

⁴ Sok ila awilik jich euk te barkoetike: Aunke lom mukꞌik y manchuk me lom tulan ya xwetꞌot yuꞌun te ikꞌe, te japuyej-barkoetike ta jchꞌix nax xchꞌin teꞌel ya stojutesik te bayuk ya skꞌan xbajtike.

⁵ Jich mismo ya xkꞌot ekꞌa te kakꞌtike: Yal chꞌin te ay ta jtiꞌbalultike, pero ya xjuꞌ yuꞌun te mukꞌ ya jtoy jbajtik yuꞌune. Jaꞌ pajal sok te jun mukꞌul wits te ya xjuꞌ xkꞌajkꞌ ta skaj nax te jun chꞌin kꞌajkꞌe.

⁶ Y te kakꞌtike jachik tutꞌ jun kꞌajkꞌ. Bayal te tut ma lekuk te ya sjajchese. Ya yakꞌ ta mulil koꞌtantik sok jtiꞌbalultik. Jaꞌ yichꞌojbe skꞌajkꞌal te tilem tal ta infiernoe, y jaꞌ ya stilesot yuꞌun spisil te jkuxlejaltike.

⁷ Te gentee ya xjuꞌ ya skꞌajtates spisil ta jkaj te chanbalametike, te mutetike, te chanetike, y te chanbalametik te ay ta mare. Ay la yichꞌix kꞌajtatesel yuꞌun ta spisil.

⁸ Pero maꞌyuk machꞌa ya xjuꞌ yuꞌun te ya skꞌajtates te yakꞌe. Ma xjuꞌ ta komel te sbolile, y teꞌ nojel ta beneno te ya xlajinwane.

⁹ Jaꞌ sok te kakꞌtike, mismo ya kalbeytik slekilal a te Dios Tatile, y te ya jbol-kꞌoptaytik a te genteetik te pasbil yuꞌun Dios te slokꞌol stukele.

¹⁰ Mismo ta jtiꞌtik ya xlokꞌ a te lekil kꞌope y te ma lekuk kꞌope. Kermanotak, ma me jichuk skꞌan to.

¹¹ ¿Me spaswan te ta jun lokꞌi-jaꞌ te ya xlokꞌ tal te lekil jaꞌe y sok te chꞌaal jaꞌe?

¹² Kermanotak, jich tutꞌil jwol ikux ma xjuꞌ te ya yakꞌ aseitunae, ni jwoluk uba te ya xjuꞌ ya yakꞌ ikuxe; jich euk ma xjuꞌ ya yakꞌ lekil jaꞌ te jun lokꞌi-jaꞌ te ya yakꞌ chꞌaal jaꞌe.

Te batsꞌi pꞌijile

¹³ Teme ay apꞌijilike sok teme ay tut ya anaꞌik, jaꞌ ya xchiknaj a te lek te tut ya apasike. Chꞌunuluk me awoꞌtanik te tutꞌil ay te apꞌijilike.

¹⁴ Pero te jaꞌexe nojel ta awoꞌtanik te il-oꞌtantawanej, y te tutik ya apasike jaꞌ nax ya akontrain abaik a. Jich ma xjuꞌ te ya atoy abaike, porke jaꞌ ya asut ta lot te tut batsꞌi jiche.

¹⁵ Porke te pꞌijilil to ma jaꞌuk te ya xtal ta stojol te Diose, sino ke jaꞌ te pꞌijilil yuꞌun te liꞌ ba balmilale. Jaꞌ nax spensar te gentee, y jaꞌ yuꞌun mismo te pukuje.

¹⁶ Te ba ay te il-oꞌtantawaneje y te kontrainwaneje, ya xlijk kꞌop teꞌa y spisil ta jkaj te tut ma lekuke.

¹⁷ Pero te machꞌatik ay yuꞌun te pꞌijilil te ya xtal ta stojol te Diose, jaꞌ batsꞌi lek ay stukel. Jun yoꞌtanik y ay slekil yoꞌtanik, sok ay srason xlaj kꞌopojik. Sok ya xkꞌuxutaywanik, ma tsabiluk nax te machꞌa ya skoltay, sok ma xyanej yoꞌtanik, y jaꞌ ya spasik te tut leke.

¹⁸ Kꞌalal ya stsꞌun te butsꞌan kꞌinal te machꞌatik jun yoꞌtanike, jich ya xchiknaj te toj-oꞌtanile.