Santiago 2 - Nuevo Testamento Tzeltal de Amatenango

Ma me tsabiluk nax te machꞌa lek ya awilike

¹ Te jaꞌex, kermanotak, te achꞌuunejik te Kajwaltik Jesucristo te bayal slekilal stukele, ma me apasik jich te ya atꞌujik te machꞌa lek ya awilike.

² Jich tutꞌil teme jun nax atsoboj abaike, y teme kꞌot jtul kꞌulej te ay xchꞌokob oro y tsaꞌam skꞌuꞌ-spakꞌe,

³ y teme lek la awikꞌ ochel te jkꞌuleje y ya awalbeyik: “Liꞌ xnaklat to ba ben tsaꞌam luware”, teme ya awute, y te nax a ya xkꞌot jtul meꞌba te lom kꞌaꞌix te skꞌuꞌ-spakꞌe y jich ya awalbeyik: “Te jaꞌate teꞌ nax xteklate o naklan te ba lume”, teme ya awute,

⁴ jich ya atꞌujik te machꞌa lek ya awilike. Ma tsaꞌamuk te tut ya anopike.

⁵ Kermanotak, te kꞌuxex ta koꞌtane, aꞌiya awaꞌiyik to: Te Dios la stsa te machꞌatik meꞌbaik liꞌ ba balmilale, yuꞌun jaꞌ me skꞌulejalik ya xkꞌot te xchꞌuunejik Diose sok te ya xba yichꞌik smajtanik te ba ay ta ajwalinel te Diose, te stukel yaloj ta skuenta te machꞌatik lek skꞌanojik te Diose.

⁶ Yan te jaꞌexe ya apꞌajik te meꞌbaetike. ¿Meꞌn ma jaꞌuk te jkꞌulejetik te machꞌatik ya spojbeyex te tut ay awuꞌunike? ¿Meꞌn ma jaꞌuk te machꞌatik ya sle amulik te ya yikꞌex bael ta stojol te juꞌeletike?

⁷ ¿Meꞌn ma jaꞌuk te machꞌatik ya yixta-kꞌoptayik te ben tsaꞌam sbiil te la yichꞌ alel ta akuentaike?

⁸ Te jaꞌex, lek ya apasik teme batsꞌi ya achꞌuunik te tulan mantal, jich tutꞌil la yal te tut tsibabil jilele: “Kꞌux me xꞌawaꞌiy te ajoy ta genteile jich tutꞌil te kꞌux ya awaꞌiy abae”, te xchie.

⁹ Yan teme ya nax atꞌujik te machꞌa lek ya awilike, mulawexix a y ya me awichꞌ kastigo yuꞌun la akꞌaxintay te smantal Diose.

¹⁰ Porke machꞌauk a te ya xchꞌuun spasel spisil te mantale pero teme la xkꞌaxintay jpꞌaluke, jich la xkꞌaxintay ta spisil te tut ya yal ta mantal te mantaliletike.

¹¹ Yuꞌun mismo te Dios la yal: “Ma me antsiwejan”, te xchie, sok la yal xan: “Ma me milawanan” te xchie. Jich yuꞌun teme ay machꞌa makꞌ sꞌantsiweje pero teme ya xmilawane, la xkꞌaxintayix a te mantaliletike.

¹² Ilaik me lek te tut ya awalik y ya apasik, porke Dios ya me yichꞌelex jkuenta yuꞌun te mantaliletik te ya yakꞌotik ta libree.

¹³ Yuꞌun te machꞌatik te maꞌyuk slekil yoꞌtan yuꞌun te yanetike, jich me maꞌyuk slekil-oꞌtanil yuꞌun Dios ya xꞌichꞌot jkuenta euk. Yan te machꞌatik ay slekil yoꞌtane, lek me ya xlaj lokꞌ kꞌoel te tut ora ya xꞌichꞌot jkuentae.

Pasel ya skꞌan, maꞌ jauk nax alel

¹⁴ Kermanotak, ¿Tut ya xlokꞌ awuꞌunik a teme ay machꞌa ya yal te ay xchꞌuunel yoꞌtane, teme ma xchiknaj a ta skuenta te tut ya spase? ¿Me xjuꞌ wan ya xkol teme jich a te xchꞌuunel yoꞌtane?

¹⁵ Jich tutꞌil teme ay jtul hermano o hermana teme maꞌyuk skꞌuꞌ spakꞌ o te tut ya sweꞌ jujun kꞌaal te puersa yuꞌune,

¹⁶ teme ay jtulukex te jich ya awalike: “Junuk awoꞌtan xbaat. Kꞌixinan me y weꞌa me spisil te tut ya akꞌane”, teme ya awute, pero teme makꞌ ya awaꞌbeyik te tut puersa yuꞌun te stiꞌbalule, ¿tut ya xlokꞌ yuꞌun a te akꞌope?

¹⁷ Jich ya xkꞌot ta pasel teme jaꞌ nax ya awal te ay xchꞌuunel awoꞌtane. Teme ma chikanuk ta skuenta te tut ya apase, chamen kꞌoem te xchꞌuunel awoꞌtane.

¹⁸ Ay wan machꞌa jich ya yal: “Ay machꞌa ay xchꞌuunel yoꞌtan sok ay yan te ya yaꞌtelin spasel te tut leke”, xchi. ¿Pero tut ya awaꞌbon kil te xchꞌuunel awoꞌtan, te maꞌyuk tut lek ya apase? Te joꞌone ya kakꞌ awil te xchꞌuunel koꞌtane ta skuenta te tut juꞌem kuꞌun spasele.

¹⁹ Te jaꞌate ya achꞌuun te ay jtul nax te Diose. Jich mismo a te tutꞌil achꞌuuneje. Pero te pukujetike jich ya xchꞌuunik euk, y ya xmetot ta sik yuꞌun xiꞌel.

²⁰ Pꞌijanik me y naꞌa me te chamen kꞌoem te xchꞌuunel-oꞌtanil yuꞌun te machꞌa maꞌyuk tut juꞌem yuꞌun spasele.

²¹ Jich tutꞌil te jꞌAbraham, te antibo jmeꞌ-jtatike, jaꞌ lek a ilot yuꞌun Dios ta skuenta te tut la spase te kꞌalal kꞌan yakꞌ ta milbil smajtan Dios te xnichꞌane, jaꞌ te jꞌIsaake.

²² Teꞌ ya awil a te jꞌAbraham la yakꞌ ta ilel te xchꞌuunel yoꞌtan ta skuenta te tutiꞌ juꞌ yuꞌun spasele. Y ta skuenta te tutiꞌ juꞌ yuꞌun spasele, jich tsꞌakal kꞌot te xchꞌuunel yoꞌtane.

²³ Jicha kꞌot ta pasel te tut tsꞌibabil ta Sjun Dios te jich ya yale: “Te jAbrahame la xchꞌuun Dios, y jich a ilot yuꞌun Dios te tutꞌil toj aye. Y te jꞌAbrahame “yamigo Dios” kꞌot te sbiile.

²⁴ Jich chikan ya awilik te Diose ya yal ta jamal te toj ya xkꞌot te winik ta skuenta te tut juꞌem yuꞌun spasele, y ma jaꞌuk nax ta skuenta te xchꞌuunel yoꞌtane.

²⁵ Jich mismo te xRahab te jmulawil antse, toj a ilot yuꞌun Dios ta skuenta te tutiꞌ juꞌ yuꞌun spasele, porke la yakꞌ ta majanel sna yuꞌun te machꞌa tikolanbile, y la skoltaylan te lokꞌ bael te laj bajt ta yan bee.

²⁶ Jich tutꞌil chamen ay jun tiꞌbalulil teme maꞌyuk xchꞌulele, jich euk chamen te xchꞌuunel-oꞌtanile teme maꞌyuk te tut juꞌem yuꞌun spasele.