Santiago 1 - Nuevo Testamento Tzeltal de Amatenango

Spajtil-oꞌtanil

¹ Joꞌon Santiagoon, jꞌaꞌtelon yuꞌun te Diose y sok te Kajwaltik Jesucristoe. Ya kalbe xkoltanuk te lajchaytijkꞌ stsꞌumbal Israele te pujkejemik ta spisil balmilale.

Te pꞌijilil te ya xtal ta stojol Diose

² Kermanotak, te jaꞌexe ya skꞌan te ben jun awoꞌtanik te kꞌalal ya xtal te skajal skaj prewaetik ta atojolike.

³ Yuꞌun anaꞌojikix te kꞌalal ya spasot ta prewa te xchꞌuunel awoꞌtanike, mas me ya sta spuersa awoꞌtanik a te jun awoꞌtan ya xkujch awuꞌunike.

⁴ Pero oꞌtantayaik te ya awichꞌik spuersa awoꞌtanik. Jich me tsꞌakal jun awoꞌtanik ya xkꞌoex a, sok ma me ayukix tut palta awuꞌunik a.

⁵ Teme ay machꞌaex a te maꞌyuk spꞌijil yoꞌtane, kꞌanbeyaik te Diose, y ya me yaꞌbeyex. Yuꞌun te Diose spisil ya yaꞌbe te machꞌa ya skꞌanbeye. Ma xatbiluk y maꞌyuk machꞌa ya spꞌaj.

⁶ Pero ya skꞌan ya akꞌanik sok xchꞌuunel awoꞌtanik; ma me ayuk tut xyal awoꞌtanik. Porke te machꞌa ay tut ya yal yoꞌtane, jachik tutꞌil xpukpun te mare te ya xchꞌojot ta jejch ta jejch yuꞌun te ikꞌe.

⁷ Te machꞌa jich aye ma me wakꞌ snaꞌ te ay tut ya xꞌaꞌbot yuꞌun te Kajwaltike.

⁸ Porke te ora to ay tut ya snop, y te pajele yanix a, y maꞌyuk tut lek te ya xjuꞌ ya spase.

⁹ Te hermano te pobre aye, ya skꞌan te lek ya yaꞌiy te jaꞌ ya smukꞌutesbot skꞌoplal yuꞌun te Diose.

¹⁰ Yan te jkꞌuleje ya skꞌan te lek ya yaꞌiy te jaꞌ ya xpekꞌutesbot skꞌoplal yuꞌun te Diose. Porke te jkꞌuleje jachꞌik tutꞌil wamal te ya yakꞌ xnich te ma xjalaje.

¹¹ Te kꞌalal ya xlokꞌ tal te kꞌajkꞌale te tulan ya xkꞌuxub tale, te wamale ya xtakej te xniche, ya xtꞌuxaj koel, y te stsaꞌamule ya xchꞌay. Jich me euk te jkꞌuleje ya me xchꞌay bael sok spisil te snegosioe.

Prewaetik y sujel ta muliletik

¹² Ben tsaꞌam slekil te machꞌa jun yoꞌtan ya xkujch yuꞌun te prewae, porke teme juꞌ yuꞌune, ya me yichꞌ smajtan korona, jaꞌ te kuxlejale te Dios yaloj te ya yaꞌbe te machꞌatik kꞌux ta yoꞌtanik te Diose.

¹³ Te kꞌalal ay machꞌa ya sujot ta spasel te tut ma lekuke, ma me xyal te jaꞌ ya sujot yuꞌun te Diose, porke te Diose ma sujot ta spasel te tut ma lekuke, sok maꞌyuk machꞌa ya sujot yuꞌune.

¹⁴ Jaꞌ ya sta sujel te machꞌa ya xchꞌuun te tut ya skꞌan yoꞌtan te ma lekuke, te jaꞌ ya xloꞌlayot yuꞌune.

¹⁵ Teꞌ ya xchiknaj a te mulile ta skuenta te tutik ma lekuk ya skꞌan te koꞌtantike. Y teme staojix spuersa te mulile, teꞌ ya xchiknaj a te lajele.

¹⁶ Kermanotak te ben kꞌuxex ta koꞌtane, ma me awakꞌ abaik ta loꞌlayel.

¹⁷ Spisil te tut lek y toje te ya yaꞌbelotike, jaꞌ ya xtal ta ajkꞌol. Jaꞌ ya yaꞌbotik te Diose, te la spas te tutik ya xtil ta chꞌulchane. Stalel ay te Diose y maꞌyuk tut ora ya yakꞌ te tut ma lekuke.

¹⁸ Jich ya skꞌan yoꞌtan te la yakꞌ chaꞌayinukotik ta skuenta te skꞌop te batsꞌi jiche, yuꞌun joꞌotik sba sitotik te yaꞌtel spasoje.

Te machꞌa lek xchꞌuunej te Diose

¹⁹ Naꞌaik me to kermanotak te ben kꞌuxex ta koꞌtane, ta apisilik te jaꞌexe chapalukex me yuꞌun ta yaꞌiyel te tut ya yichꞌ alele. Ma me kꞌopojanik ta ora, y ma me orauk ya xꞌilinex.

²⁰ Porke te machꞌa xꞌiline, ma jauk ya spas te tut lek ya yil te Diose.

²¹ Jich yuꞌun jilesaik me te jaꞌexe spisil te tut skuenta balmilale sok te ben bayal te tut ma lekuke. Junuk me awoꞌtan chꞌuunaik te skꞌop Dios te tsꞌunbilix ta awoꞌtanike, te jaꞌ ya xjuꞌ yuꞌun te ya skoltayexe.

²² Pero ma me jaꞌuk nax te ya awaꞌiyik te skꞌop Diose, ya me skꞌan ya anopik spasel. Yuꞌun teme ma ba ya apas te tut ya awaꞌiye, atukel nax mismo ya aloꞌlay aba.

²³ Te machꞌa jaꞌ nax ya yaꞌiy te skꞌop Diose y ma jichuk ya spase, jachik kꞌoem tutꞌil jtul winik te ya yil sba ta espejoe.

²⁴ Porke stukel mismo ya yil sba, pero te kꞌalal bajtix aye, te nax a ya xchꞌay ta yoꞌtan te tut yilele.

²⁵ Pero te machꞌa ma xchꞌay ta yoꞌtan te tut ya yaꞌiye, sino ke jaꞌ ya yakꞌ ta yoꞌtan te mantal te toje sok te ya yakꞌotik ta libree, y teme jun yoꞌtan ya xchꞌuun te tut ya yale, ben tsaꞌam slekil yuꞌun te tut ya spase.

²⁶ Teme ay machꞌa ya skuy sba te lek xchꞌuunej Diose, pero ma snaꞌ skomel te stiꞌe, stukel mismo sloꞌlayej sba, y te tut xchꞌuuneje ma baleuk a kꞌot a.

²⁷ Te tut ay ta chꞌuunel te maꞌyuk tut kapal a sok maꞌyuk yijkꞌal ta sit te Dios Tatile, jaꞌ te machꞌa xba yil te meꞌbaetike y sok te meꞌba antstik te kꞌalal ayik ta wokole, y makꞌ yixlan sba a te tut ma lekuk te skuenta balmilale.