Romanos 9 - Nuevo Testamento Tzeltal de Amatenango

Tsabilix yuꞌun Dios te israeletike

¹ Batsꞌi jich te tut ya kal ta skuenta te Cristoe, ma jlotuk. Sok jaꞌ ya yalbon ta koꞌtan te Chꞌul Espíritu te ma jlotuk te tut ya kale.

² Bayal ayon ta ajtal-oꞌtan, sok ay tut lom kꞌux ta koꞌtan ya kaꞌiy sil tiempo,

³ yuꞌun koꞌtanuk joꞌon mismo jtukel te ya kichꞌ pꞌajel ta skuenta Cristo, te jichuk ya staik koltayel te kermanotak te jun nax jtsꞌumbal soke.

⁴ Jaꞌ stsꞌumbalik te Israele, y Dios la yikꞌtalan jich tutꞌil xnichꞌnab. Dios ay ta yolilik sok stsaꞌamul slekilal, y la yakꞌtalanbe te trateetike sok te mantaliletik yuꞌun te jMoisese. Sok la yalbe te tutꞌil ya skꞌan ya yichꞌ chꞌuunel te Diose sok te tutꞌil ya yichꞌik koltayel yuꞌune.

⁵ Jaꞌ stsꞌumbalik te antibo jmeꞌ-jtatike, sok jaꞌ stsꞌumbal yuꞌunik te Cristo te tal ta balmilal jich tutꞌil winik, te jaꞌ Dios stukel, te toyol ay yuꞌun spisil te tutik aye. Jaꞌ nax ay ta akꞌel ta jkuenta stukel ta sbajtel kꞌinal. Jichuk.

⁶ Pero ma yuꞌunuk ma kꞌot ta pasel te tut sjapoj te Dios ta skuenta te Israele. Yuꞌun ma spisiluk batsꞌi stsꞌumbal Israel te jtejklum Israele.

⁷ Ma spisiluk jaꞌ batsꞌi stsꞌumbal te jꞌAbrahame te jaꞌ xnichꞌnabe. Yuꞌun jich albil yuꞌun te Diose: “Te atsꞌumbale ya xtal ta skuenta Isaac”, xchi me.

⁸ Jaꞌ ya yaꞌbotik jnaꞌtik te maꞌyuk machꞌa xnichꞌan Dios ya xkꞌot ta skaj nax te stsꞌumbale. Jaꞌ nax batsꞌi xnichꞌan Dios te machꞌatik ayinik ta skuenta te tut sjapoj te Diose.

⁹ Porke jaꞌto te sjapoj Dios ta skuenta te jꞌAbrahame: “Jich ora tut ora to ya sujton tal, y te Sarae ya me xꞌayin jtul xchꞌin yal” te xꞌutote.

¹⁰ Y ma jaꞌuk nax to. Te xchaꞌtulul yal te xRebecae, jun nax te state, jaꞌ te antibo jtatik Isaac.

^11-13 Y antes te ma to xla ayin ae, te kꞌalal maꞌyuk tut spasojik, ni lek ni ma lekuk, Dios a albot yuꞌun te xRebecae: “Te bankilale jaꞌ me ya yaj-aꞌtelin te ijtsꞌinale”, te xꞌutote. Jaꞌ pajal sok te tutꞌil jich tsꞌibabil jilel ta Sjun Diose: “Kꞌux ya kaꞌiy ta koꞌtan te Jacobe; y te jꞌEsaue ma kꞌuxuk ta koꞌtan ya kaꞌiy stukel”, xchi me. Jich chikan ta jamal te tutꞌil stukel ay ta skuenta stsael te Diose te machꞌa ya yikꞌe sok te tut snopoj ta yoꞌtane. Ma jaꞌuk ya snaꞌbe te tut spasojike.

¹⁴ ¿Me jich wan ya kaltik te ma tojuk te Diose? ¡Ma jichuk!

¹⁵ Porke te Diose la yalbe te jMoisese: “Ya jkꞌuxutay te machꞌa ya jkꞌane, y ya xpichꞌin koꞌtan euk te machꞌa ya jkꞌane”, te xꞌutote.

¹⁶ Jich yuꞌun, ma jaꞌuk ya yichꞌ naꞌel tut ya skꞌan te winike ni ma jaꞌuk te yaꞌtele. Jaꞌ nax ya snop stukel Dios teme ya xkꞌuxutayotike.

¹⁷ Yuꞌun tsꞌibabil ta Sjun Dios te jicha albot yuꞌun Dios te rey yuꞌun Egiptoe: “La kakꞌat ta rey skuenta yuꞌun jich ya kakꞌ ta ilel te jpodere y yuꞌun jich me ya snaꞌonik a spisil te balmilale”, xchi me.

¹⁸ Jaꞌ yuꞌun, te Diose jaꞌ chikan yoꞌtan stukel te machꞌa ay xkꞌuxul yoꞌtan ta stojol. Sok jaꞌ chikan yoꞌtan euk te machꞌa ya stulantes te yoꞌtane.

¹⁹ Pero ya awalbikon: “¿Tuꞌun te Dios ya yaꞌbe xkuch smul te winike, teme jaꞌ ya yaꞌbotik jpastik te tut ya skꞌan yoꞌtan stukele?” teme xchaexe.

²⁰ Y jaꞌat winik, ¿Machꞌa akuyoj aba a te ya awichꞌ jkuenta te Diose? Jich tutꞌil te pꞌin te pasbil ta lume, ¿me ya wan yalbe te machꞌa pasot yuꞌune: “¿Tuꞌun te jich la apasone?” te xchiuke?

²¹ Te jpas-pꞌine ya xjuꞌ yuꞌun spasel te tut ya skꞌan spas a te lume. Y mismo te lume ya xjuꞌ ya spas jun pꞌin te ben lek ya xtuun yuꞌune y sok te ma xtuun lek yuꞌune.

²² Jachik nix te Diose, ya skꞌan ya yakꞌ jun seña tutꞌil ay te kastigoe y sok ya yakꞌ ta ilel te spodere. Juꞌ yuꞌun bayal kꞌaal ta smaliyel te machꞌatik ya skꞌanik te kastigo te teꞌ ya xla lajik aye.

²³ Sok jich a yakꞌ ta naꞌel ta jtojoltik te smukꞌul slekilale. Yuꞌun la xpichꞌinotik yoꞌtan y la xchapotik ta antes yuꞌun ya kichꞌbetik te slekilale.

²⁴ Jich te Diose la yikꞌotik, ma jaꞌuk nax te juriyoetike, jich euk te machꞌa ma juriyouke.

²⁵ Jich tutꞌil ya yal ta sjun te jꞌOsease: “Te machꞌatik ma jtejklumuk kuꞌune, jtejklum kuꞌun me ya kalbey euk. Te machꞌa ma kꞌuxutaybiluke, ya me kalbe ya jkꞌuxutay.

²⁶ Y ta mismo luwar te ba altalanbote: ‘Te jaꞌexe ma jtejklumukex kuꞌun’, te xchie, ya me xꞌaltalanbot: ‘xnichꞌan kuxul Dios’, xchi me.

²⁷ Jich te jꞌIsaiase la yalbey te tutꞌil ay te jꞌisraeletike: “Manchuk me lom bayal te stsꞌumbal Israele jich tutꞌil sjiꞌal te mar, úniko xanix sobrail te ya staik te kolele.

²⁸ Porke ora nax te Kajwaltike ya me skꞌoes ta pasel te skꞌop ta spisil te balmilale”, xchi me.

²⁹ Jich tutꞌil la yal ta antes te jꞌIsaiase: “Te Kajwaltik te spisil ya xjuꞌ yuꞌune te jichuk maꞌyuk yakꞌoj jilel te jtsꞌumbaltike, jachik mismo ayotik te tutꞌil Sodoma y Gomorrae”, xchi me.

Te juriyoetik sok te lek yachꞌil kꞌope

³⁰ ¿Tut ya kaltik yuꞌun to? Te machꞌatik ma juriyouke te makꞌ sleik te machꞌa ya yakꞌ kolele, te Diose yalojix te kolemikix yuꞌun te smule ta skuenta nax xchꞌuunel yoꞌtanik.

³¹ Yan te Israeletike toj yakꞌoj yoꞌtanik ta xchꞌuunel te mantaliletik ta skuenta jich kolemix ya xjilik yuꞌun te smulike, pero ma juꞌ yuꞌunik xchꞌuunel te mantaliletike.

³² ¿Tut yuꞌun? Porke maꞌ yakꞌ ta yoꞌtanik te kolemix ya xjil yuꞌun smulik ta skuenta nax xchꞌuunel yoꞌtanik, yuꞌun skuyojik te jaꞌ toj ya xꞌilot yuꞌun te tut ya spasike. Jaꞌ yuꞌun la xkꞌojchin yokik a te ton te ya syaleswane.

³³ Jich tutꞌil tsꞌibabil ta Sjun Diose: “Joꞌon ya kakꞌ ta Sion jun mukꞌul ton te ya xkꞌojchin yokik aye. Te machꞌa ya xchꞌuunike, makꞌ xjilik ta kꞌexlal yuꞌun”, xchi me.