Romanos 8 - Nuevo Testamento Tzeltal de Amatenango

Te kuxlejal ta skuenta te Espíritu yuꞌun te Diose

¹ Jaꞌ yuꞌun, ni maꞌyuk tut kastigoil ay ta skuenta te machꞌatik jun nax ay sok te Cristo Jesuse. Jaꞌ bi, jaꞌ te machꞌatik ma ta skuentaukix stiꞌbalul kuxulike; jaꞌikix te kuxulik ta skuenta te Espiritue.

² Porke kꞌalal la kakꞌ jbatik ta skuenta te Espiritue, te ya yakꞌ kuxlejal ta skuenta te Cristo Jesuse, jaꞌ la skoltayotik ta skꞌab te mulile sok te lajele.

³ Porke Dios a spasix te tut maꞌ juꞌ yuꞌun spasel te mantaliletik yuꞌun te jMoisese. Yuꞌun maꞌ juꞌ yuꞌun te mantaliletike, ta skaj te maꞌyuk spuersa te stiꞌbalul te mulawil winike. Dios a stikon tal te batsꞌil Xnichꞌan te batsꞌi jachik yilel te tutꞌil jmulawil winike, y la yakꞌ ta milbil majtanil skuenta yuꞌun mulil, yuꞌun jich a yakꞌ ta lajel te mulil te ay ta jtibalultike.

⁴ La spas yuꞌun joꞌotik ya xjuꞌ ya jpastik te tut ya yal te mantaliletike. Yuꞌun ma jaꞌukix ya xkuxuyinotik te tut ya skꞌan te jmulawil tiꞌbalultike; jaꞌ ya skꞌan ya xkuxuyinotikix ta skuenta te Espiritue.

⁵ Te machꞌatik kuxajtik ta skuenta te tut ya skꞌan te stiꞌbalul te jmulawil winike, jaꞌ nax yajtal yoꞌtanik te tut ya skꞌan te stiꞌbalulike. Pero te machꞌatik kuxajtik ta skuenta te Espiritue, jaꞌ yajtal yoꞌtanik te tutꞌil ya skꞌan te Espiritue.

⁶ Teme jaꞌ yajtal yoꞌtanik te tut ya skꞌan te stiꞌbalule, ya akꞌot bael ta lajel yuꞌun. Pero teme jaꞌ yajtal koꞌtantik te tutik ya skꞌan te Espiritue, jaꞌ ya yaꞌbotik jkuxlejaltik sok bujtsꞌan kꞌinal.

⁷ Te machꞌatik jaꞌ yajtal yoꞌtanik te tut ya skꞌan te stiꞌbalulike, jaꞌ skontrainejik Dios yuꞌun, porke ni ma skꞌanik ni ma xjuꞌ yuꞌunik te ya xchꞌuunbeyik te smantale.

⁸ Jaꞌ yuꞌun te machꞌatik kuxajtik ta skuenta te tut ya skꞌan te stiꞌbalul jmulawil winike, ma xjuꞌ yuꞌun spasel te tut lek yoꞌtan Dios yuꞌune.

⁹ Pero te jaꞌexe ma me jichuk ya xkuxuyinex ta skuenta te tutꞌil ma tsaꞌamuk ya skꞌan te atiꞌbalulike. Jaꞌ ya xkuxuyinexix ta skuenta te Espiritue, teme batsꞌi jich te ay ta atojolik te Espíritu yuꞌun te Diose. Te machꞌa ma yikꞌojuk te Espíritu yuꞌun te Cristoe, ma jaꞌuk yuꞌun te Cristoe abi.

¹⁰ Pero teme ay ta awoꞌtanik te Cristoe, aunke chamen te atiꞌbalulik ta skaj te mulile, kuxul me achꞌulelik ta skuenta te libreix ayex ta stojol te Diose.

¹¹ Y te Espiritue, te jaꞌ te la xchaꞌkuses tal te Jesuse, kuxulix ta akuentaik. Jaꞌ mismo te la xchaꞌkuses tal te Cristo, ya yaꞌbeyex achꞌ kuxlejal ta atiꞌbalulik te ya xlaje ta skuenta te Espíritu yuꞌun Dios te ayix ta atojolike.

¹² Jaꞌ yuꞌun, kermanotak, ay tut ya skꞌan ya jchꞌuuntik spasel, pero ma jaꞌuk te tut ya skꞌan te jmulawil tiꞌbalultike.

¹³ Porke teme jaꞌ kuxulex ta skuenta te tut ya skꞌan te atiꞌbalulike, ya me xlajex. Pero teme jaꞌ ta skuenta te Espiritue ya awakꞌik ta lajel te tut ya skꞌan te atiꞌbalulike, ya me xkuxuyinex.

¹⁴ Spisil te machꞌatik uꞌuninbil yuꞌun te Espíritu yuꞌun te Diose, jaꞌ yal-xnichꞌan Dios abi.

¹⁵ Yuꞌun te jaꞌexe ma jaꞌuk awikꞌojik te Espíritu yuꞌun mosoil te ya yaꞌbeyex xan xiꞌele. Jaꞌix te Espíritu te ya yakꞌex ta yal-xnichꞌan Diose. Jaꞌ te Espíritu te ya yalbotik te ya xjuꞌ ya kaltik ta stojol Dios: “jTat”, xchootik.

¹⁶ Y jaꞌ to jaꞌ mismo te Espíritu ya yalbotik ta koꞌtantik te joꞌotik te yal-xnichꞌanotikix te Diose.

¹⁷ Y te tutꞌil yal-xnichꞌanotikix te Diose, jich ayix jpartetik te jmajtantik te Dios yaloj jilel te ya yaꞌbotike. Pajal ya kichꞌtik sok Cristo, teme jich ya xkꞌax jwokoltik soke, yuꞌun ta patil jun ayotik sok ta lekilal.

Lekilal ta patil

¹⁸ Te ora to ayotik ta wokolajel, pero ma tulanuk ta koꞌtantik te wokolajel teme jaꞌ ya jnaꞌtik te lekilal te ya kiltik ta patile.

¹⁹ Sok te tutik spasoj te Diose jun yoꞌtan yipal ta smaliyel te tut ora ya xchiknatesot te machꞌatik yal-xnichꞌan te Diose.

²⁰ Porke te tutik pasbile, jmel nax a chꞌay te stsaꞌamule. Ma yalojuk te ya xꞌixtaꞌaje. Yuꞌun mismo te Diose te la yakꞌ kꞌotuk ta pasele. Pero jun to yoꞌtan ta smaliyel

²¹ te ya to xkolesot ta mosoil sok ta lajel, yuꞌun ya sta a te lekilal kolel te ya yichꞌik te machꞌatik yal xnichꞌan te Diose.

²² Jnaꞌojtik asta te ora to te tutik spasoj te Diose ya skꞌanik koltayel y ayik ta wokol, jich tutꞌil jtul ants te ay xkꞌuxul swokol te ya xpajt yoꞌtane.

²³ Y ma jaꞌuk nax ay swokol te tut spasoj te Diose; jich euk te joꞌotike ayotik ta wokol, aunke kikꞌojtikix te Espiritue te ja seña te jayeb to ya yaꞌbotik te Diose. Lom ayotik ta wokol ta smaliyel te tut ora yal-xnichꞌanotik Dios ya xkꞌootike. Jich me ya xkolotik sok a te jtiꞌbalultike.

²⁴ Jnaꞌojtik te kolemotikixe, pero ay to te tut ayotik ta smaliyele. Teme ay machꞌa ya yilix te tut yipal ta smaliyele, jich ma jaꞌuk ya smaliy xan. Yuꞌun teme ay machꞌa ya sta ta ilele, ¿tuꞌun xan ya smaliy tem jichte?

²⁵ Pero teme ya jmalitik te ma to jaꞌuk te chikan ya kiltike, ya to me skꞌan te junuk me koꞌtanik ta smaliyel.

²⁶ Jaꞌ ya skoltayotik te Espíritu te tutꞌil maꞌyuk puersatike. Porke ma jnaꞌtik tutꞌil ya skꞌan ya jkꞌopontik te Diose. Pero te Espiritue stukel mismo ya skꞌoponbotik Dios ta jtojoltik. Meꞌbaꞌtik nax yoꞌtan ta kꞌop te ma chikanuk tut ya yale.

²⁷ Y te Diose ya snaꞌ tut ay ta koꞌtantik, sok ya snaꞌ te tut ya yal te Espiritue. Porke te Espiritue ya skꞌanbe Dios ta skuenta te machꞌatik ay ta stojole, jich tutꞌil ya skꞌan te Diose.

A me jtsaltik ta jmel nax

²⁸ Jnaꞌojtik te Diose ya yaꞌbe spisil te tutik lek te machꞌatik lek skꞌanoje, y sok te ikꞌbilik yuꞌune, jich tutꞌil te ya skꞌan yoꞌtan stukele.

²⁹ Jaꞌ te machꞌatik tsabilik ta nail to yuꞌun te Diose, te la snop Dios ta slijkibal to te jich ya xkꞌotik te tutꞌil Xnichꞌane. Yuꞌun jich ya xkꞌot te Xnichꞌan te jaꞌ bankilal yuꞌun te bayal yijtsꞌinabe.

³⁰ Sok te machꞌatik Dios ta slijkibal to jich stsaoje, la yikꞌtalan euk. Sok te machꞌatik ikꞌtalanbile, jamal a yalbe te kolemix yuꞌun te smule. Sok te machꞌatik jamal a yalbe te kolemix yuꞌun te smule, la yakꞌtalanbe smajtanin te slekilale.

³¹ ¿Tut mas ya kaltik? Teme Dios ayotikix ta koltayel yuꞌune, maꞌyuk machꞌa ya xjuꞌ te ya skontrainotike.

³² Te Diose maꞌ spꞌajotik ni te batsꞌi Xnichꞌane, asta la yakꞌ entregal ta lajel ta joꞌotik ta jkajtik. Teme jich a yaꞌbotik ta majtanil te Xnichꞌane, ¿me makꞌ ya yaꞌbotik spisil te tut ya jkꞌantike?

³³ ¿Machꞌa kꞌan slebe smul te machꞌatik Dios tsabilix yuꞌune? Maꞌyuk. Yuꞌun yalojbeyix ta jamal te Diose te kolemotikix yuꞌun te jmultike.

³⁴ ¿Machꞌa kꞌan yakꞌotik bael ta chꞌayel? Maꞌyukix. Yuꞌun jaꞌ a cham Cristo Jesus kuꞌuntik. Sok ma jipuk a. Te Cristoe chaꞌkux y teꞌ ayix ta sbatsꞌi kꞌab te Diose; jaꞌ yipal ta kꞌop kuꞌuntik.

³⁵ ¿Machꞌa kꞌan juꞌuk yuꞌun te ya spitotik a te slekil yoꞌtan te Cristoe? Maꞌyukix. Ni jaꞌ te wokole, ni jaꞌ te oꞌol jbajtike, ni jaꞌ te tenele, ni jaꞌ te wiꞌnale, ni jaꞌ te maꞌyuk lek jkꞌuꞌ-jpakꞌtike, ni jaꞌ te milele, ni jaꞌ te lajele.

³⁶ Jaꞌ jich te tut ya yal te Sjun Dios: “Jaꞌat ta akaj te sil tiempo ayotik ta milele; jich kuybilotik te tutꞌil karnera te ya xꞌikꞌot bael te ba ya xmilote”, xchi me.

³⁷ Pero ta spisil to ya me jtsaltik jilel ta skuenta te machꞌa kꞌuxotik ta yoꞌtane.

³⁸ Te joꞌone jnaꞌoj te maꞌyuk tut ya spiton ta slekil yoꞌtan te Diose. Ni jaꞌuk te lajele, ni jaꞌuk te kuxlejale, ni te angeletike, ni te machꞌatik ay tulan yaꞌtelik sok te ay spoderike, ni te tut ya xkꞌot ta pasel te ora to, ni te tut ya xkꞌot ta pasel ta patil baele.

³⁹ Ni jaꞌuk te tut toyol aye, ni jaꞌuk te lom najt koem baele, ni jaꞌuk jkajuk te tut spasoj te Diose. Maꞌyuk tut ya xjuꞌ ya spitotik a te slekil yoꞌtan Dios te la yaꞌbotik kiltik ta skuenta te Kajwaltik Cristo Jesuse.