Romanos 5 - Nuevo Testamento Tzeltal de Amatenango

Libre ayotik yuꞌun te jmultike

¹ Jich yuꞌun, libreix ayotik yuꞌun te jmultike ta skuenta nax te xchꞌuunel koꞌtantike. Jich bujtsꞌan kꞌinal ya kaꞌitik ta stojol Dios ta skuenta te Kajwaltik Jesucristoe.

² Yuꞌun ta skuenta Cristo te kꞌot ta jkuentatik te slekil yoꞌtan Dios, ta skuenta nax te xchꞌuunel koꞌtantike. Y jich jun koꞌtantik ayotik sok ben butsꞌan kꞌinal ya jmalitik ya kichꞌtik te slekilal Diose.

³ Y ma jaꞌuk nax to. Jun koꞌtantik yuꞌun euk te ayotik ta wokole, porke jnaꞌojtik te wokole mas ya yaꞌbotik spuersa koꞌtantik a.

⁴ Y te spuersa koꞌtantik jaꞌ ya yakꞌotik a te lek ya xkꞌootik ta stojol te Diose. Y teme lek ya xkꞌootik ta stojol Diose, jich ya yaꞌbotik spuersa koꞌtantik ta smaliyel.

⁵ Sok makꞌ ya jtatik kꞌexlal yuꞌun te tutꞌil ya jmaliytike, porke Dios aꞌ snojesbotik ta koꞌtantik te slekil yoꞌtan ta skuenta te Chꞌul Espíritu te yakꞌojbotike.

⁶ Yuꞌun te kꞌalal maꞌyuk jpuersatik te ya jkoltay jbajtike, la sta yorail te cham te Cristoe ta skaj te machꞌatik ma lekikuke.

⁷ Ma pasiluk teme ay machꞌa ya yakꞌ sba ta milel ta skaj te jtul gente te toj ay ta balmilale. Aunke me ay machꞌa dispuesto ya skꞌan yakꞌ sba ta lajel ta skaj tul gente te batsꞌi ben leke.

⁸ Pero te Diose la yakꞌix ta ilel te ben skꞌanojotik ta yoꞌtane, te tutꞌil cham Cristo ta jkajtik te kꞌalal ayotik to ta mulil aye.

⁹ Y te ora to libreix ayotik yuꞌun te jmultik ta skuenta te cham te Cristoe, sok mas to xan ya xkolotik ta libre yuꞌun te kastigo ta slajibal kꞌaal ta skuenta te Cristoe.

¹⁰ Porke te Diose, te kꞌalal jkontrainejtik to aye, la yaꞌbotik bujtsꞌan kꞌinal ta skuenta te tutꞌil a cham te Xnichꞌane. Mas to xan a kolotik a te la yakꞌ xkuxlejale. Te ora to junix koꞌtantik sok

¹¹ y ma jaꞌuk nax to. Jun koꞌtantik ayotikix ta stojol Dios ta skuenta Cristo te junix koꞌtantik sok te Diose.

Adan sok te Cristoe

¹² Ta skuenta te jtul winik te och mulil ta balmilal, y jich a tal te lajele. Y te lajele kꞌax ta spisil, porke spisil a mulawik.

¹³ Ma to ayuk a te mantaliletike, ayix a te mulil ta balmilale; aunke te mulile ma to xꞌichꞌot jkuenta a te kꞌalal ma to ayuk a te mantaliletike.

¹⁴ Jaꞌ yuꞌun, jaꞌ to ta yorail te jꞌAdan y asta ta yorail jMoises te lajele och ta spisil te machꞌatik ya xmulawe. Aunke te mulil to ma yuꞌunuk te ma xchꞌuun te mantal yuꞌun Dios, jaꞌ tutꞌil la spas te jꞌAdane. Jaꞌ slokꞌol a kꞌot ta machꞌa patil ya xtale.

¹⁵ Pero te smul te jꞌAdane ma xjuꞌ spaj sba sok te tut majtanil ya yaꞌbotik te Diose. Yuꞌun ta skaj nax smul jtul winik te bayal machꞌa chamike. Pero te jkoleltik ya yaꞌbotik te Diose majtanil nax ta skuenta nax jtul winik, jaꞌ te Jesucristoe. Jaꞌ mas tsaꞌam stukel, y jaꞌ jlekiltik ta jpisiltik a.

¹⁶ Te smul jtul winike ma pajaluk sok te majtanil ya yakꞌ te Diose. Chiknaj te kastigo ta skaj nax te jun buelta la xkꞌaxintaybe smantal Dios te jtul winike. Te Diose majtanil ya yakꞌ te kolele, aunke bayal mulawenik te genteetike.

¹⁷ Yuꞌun te lajele jmel nax a och ta skaj nax te smul jtul winike. Mas to xan te machꞌatik Dios a kꞌuxutayot yuꞌun, ya xꞌalbot ta jamal te kolemix yuꞌun te smul ta majtanil nax, sok jmel nax ayik ta achꞌ kuxlejal ta skuenta nax jtul winik, jaꞌ te Jesucristoe.

¹⁸ Jich tutꞌil te smul Adan te la yakꞌ ta lajel spisil te winketike, jaꞌ nax jich euk, yuꞌun te tut lek a spas te Jesucristoe, ayix te achꞌ xkuxlejalik sok te kolemikix ta kastigo spisil genteetik.

¹⁹ Jaꞌ xyal te ta xkꞌaxemul nax jtul winik, jmulawiletik a kꞌot spisil genteetik. Pero jich mismo, yuꞌun te la xchꞌuun mantal jtul xan winik, bayal genteetik a kolik ta libre yuꞌun te smulike.

²⁰ Tal te mantaliletik yuꞌun la sbayaltes te mulile. Pero te kꞌalal bayale te mulile, Dios a yakꞌ xan ta ilel ta mas te slekil yoꞌtane.

²¹ Jich tutꞌil te jmel nax a och te mulil yuꞌun te yichꞌoj tal te lajele, jaꞌ nax jich euk te slekil yoꞌtan Diose jmel nax a och yuꞌun te ya xꞌakꞌawan ta libre yuꞌun te mulile, y jaꞌ ya yaꞌbotik te kuxlejal sbajtel kꞌinal ta skuenta te Kajwaltik Jesucristoe. Jich me ay jkuxlejaltik sbajtel kꞌinal te jayebotik te chapbilotikix ta skuenta te Diose.