Romanos 2 - Nuevo Testamento Tzeltal de Amatenango

Te Diose jaꞌ ya xchapawan sok te tut batsꞌi jiche

¹ Jaꞌ yuꞌun ma spas ya amak aba ta kꞌop, jaꞌat te ya awichꞌ jkuenta te yane, maꞌ awocheluk machꞌauk a. Teme ya awichꞌ jkuenta te yane, jaꞌat nax mismo ya awakꞌ aba ta chꞌayel. Porke tut yipalat ta yichꞌel ta jkuentae, jich mismo yipalat ta spasel euk.

² Pero jnaꞌojtik te Dios ya xchapawan sok te tut batsꞌi jiche te kꞌalal ya yakꞌ bael ta chꞌayel te machꞌatik jich yipalik ta spasele.

³ Jich euk te jaꞌate te ya awichꞌ jkuenta te yane y jich mismo ya apas euk te tut ya spas te yane, ma me akuy te ya xkolat bael te ba kastigo yuꞌun te Diose.

⁴ ¿Me ya apꞌaj te lom bayal slekil te xkꞌuxutayejat te Diose sok te ya to smaliyate? ¿Meꞌn ma xꞌanaꞌ te puersa ya kichꞌbetik slekil yoꞌtan te ya sujtes koꞌtantik ta skuentae?

⁵ Pero te jaꞌate, lom tulan awoꞌtan, y ma xꞌakꞌan ya asujtes awoꞌtan ta stojol Dios. Jaꞌat mismo yipalat ta sleel mas kastigo ta atojol te ya sta skꞌaalel te kastigoe, te kꞌalal ya xchiknaj te Diose, ya xtal yalbe ta jamal te machꞌa ya yichꞌ kastigoe,

⁶ y ya me yaꞌbe stoj ta juju-tul chikan tut a te spasojlaneje.

⁷ Ya yaꞌbe xkuxlejal sbajtel kꞌinal te machꞌatik ya sleik te lekilale, sok la yakꞌ ta jkuenta te tut ma xlaje, sok jaꞌ sil tiempo aꞌ spasik te tut leke.

⁸ Pero ya yaꞌbe kastigo sok yiliꞌba te machꞌatik ma xchꞌuun mantale, jaꞌ te machꞌatik skontrainej te tut batsꞌi jiche, y jaꞌ ya spas te tut ma lekuke.

⁹ Ay me swokolil y xkꞌuxul yuꞌun spisil te machꞌatik ya spasik te tut ma lekuke, jaꞌ nail te juriyoetike, pero jich euk te machꞌatik ma juriyouke.

¹⁰ Yan te machꞌatik lek te tutiꞌ spasike Dios me ya xꞌaꞌbot slekilalik yuꞌun, sok akꞌtalanbil ta jkuenta, sok jun yoꞌtanik ta spisilik, jaꞌ nail te juriyoetike, pero jich euk te machꞌatik ma juriyouke.

¹¹ Porke te Diose ma yauk nax ya stsa ta jtul ta cheb.

¹² Spisil te machꞌatik ya xmulaw te maꞌyuk yichꞌojbey te mantaliletik yuꞌun te jMoisese, ya xchamik manchuk me maꞌ yaꞌiyejbeyik sluwar te mantaliletike. Y te machꞌatik ya xmulaw te yaꞌiyejbeyik sluwar te smantaliletik yuꞌun te jMoisese, jaꞌ mismo ya xꞌakꞌot bael ta kastigo yuꞌun te mantaliletike.

¹³ Porke ma jaꞌuk nax ya xꞌakꞌot ta libre yuꞌun teme la nax yaꞌiyik te mantaliletike, jaꞌ nax te machꞌatik ya xchꞌuunik te mantaliletike.

¹⁴ Pero te machꞌatik ma juriyouk te kꞌalal ni ma yichꞌojikuk te mantaliletike jaꞌ ya spasik te tut ya yal te mantaliletike, skaj te ay nix kꞌoem ta yoꞌtanike, stukelik nax snopojik te tut lek ta pasele.

¹⁵ Jich ya yakꞌ ta ilel a ta skuenta te tut ya spasike te tsꞌibabil ta yoꞌtanik te mandaliletike. Stukel nax ta yoꞌtan ya snaꞌ te tut leke, y stukel nax ta yoꞌtan ya snaꞌ teme lek o ma lekuk te tut ya spase.

¹⁶ Ya sta skꞌaalel yuꞌun Dios te ya yichꞌ jkuenta te Jesucristoe, sok te ya yal ta jamal te tut yilel te kaꞌteltike. Jich tutꞌil ya yal te lek achꞌ kꞌop te yipalon ta yalele.

Te juriyoetik sok te mantaliletik yuꞌun te jMoisese

¹⁷ Jaꞌat ya awichꞌ aba ta jkuenta te tutꞌil juriyoate, y jaꞌ ya awipin aba a te mantaliletik yuꞌun te jMoisese, y ben atoyoj aba yuꞌun achꞌuunej te Diose.

¹⁸ Anaꞌojbe te sboluntare, y te smantal jaꞌ ya snojpesat ta stꞌujel te baꞌay te leke.

¹⁹ Jaꞌ ya awal te ya xjuꞌ awuꞌun stojotesel te machꞌatik ma xyil kꞌinale; y ya awaꞌbe yil kꞌinal te machꞌatik ya xbeenik ta ijkꞌal kꞌinale.

²⁰ Sok ya awal ya xjuꞌ awuꞌun stojotesel te machꞌatik maꞌyuk tut ya snaꞌike y ya anojpes te untike, yuꞌun ta skuenta te mantaliletik awichꞌojix te lekil pꞌijutesel sok te tut batsꞌi jiche.

²¹ Lek ay, teme ya anojpeslan te yane, ¿tuꞌun makꞌ ya anojpes aba te jaꞌate? Teme ya awal te ma lekuk elekꞌe, ¿tuꞌun xꞌelkꞌajate?

²² Teme ya awal te ma lekuk antsiwejele, ¿tuꞌun ya xꞌantsiwejate? Sok teme kolaꞌ ya awil te idoloetike, ¿tuꞌun ya awelkꞌanbe te tutik ay yuꞌun ta xchꞌulna te?

²³ Ya awal te ben lek te mantaliletike; pero kꞌalal ma xapas te tut ya yale, ya awakꞌ ta ixtaꞌkꞌoptayel te Diose.

²⁴ Jaꞌ yuꞌun te ya yal te Sjun Diose: “Jaꞌex ta akajik te ya yixta-kꞌoptay te Diose te machꞌatik ma juriyouke”, xchi me.

²⁵ Batsꞌi jich te machꞌatik ya xchꞌuun te mantaliletik yuꞌun te jMoisese, ya xtuun yuꞌunik chꞌinuk te sirkunsisione. Pero teme ma xchꞌuun te mantaliletike, jich kꞌoem te tutꞌil ma yichꞌojuk sirkunsisione.

²⁶ Sok te machꞌa ma yichꞌojuk sirkunsision, teme lek xchꞌuunej te tut ya yal te mantaliletike, jich kꞌoem te yichꞌoj sirkunsision keseme ma yichꞌojuk.

²⁷ Te machꞌa ya xchꞌuun te mantaliletike, keseme ma yichꞌojuk sirkunsision ta stiꞌbalul, ya yakꞌ ta kꞌexlal te machꞌatik yichꞌojik te mantaliletike sok te yichꞌojik sirkunsisione, pero ma xchꞌuunejuk.

²⁸ Yuꞌun ma mero juriyo-winikuk te machꞌa jaꞌ nax juriyo ta stiꞌbalul, sok te sirkunsision ma jaꞌuk ta skuenta stiꞌbalul.

²⁹ Te machꞌa batsꞌi juriyoe jich ay ta yoꞌtane sok te yichꞌoj sirkunsision ta yoꞌtane. Ma jaꞌuk ya xꞌaꞌtej te tut ya yal te tsꞌibabile. Jaꞌ ya xꞌaꞌtej stukel te Chꞌul Espiritue. Te machꞌa jich aye, lek ay skꞌoplal stukel. Ma jaꞌuk lek skꞌoplal yuꞌun te winketike, jaꞌ lek skꞌoplal yuꞌun te Diose.