San Mateo 21 - Nuevo Testamento Tzeltal de Amatenango

Och bael ta Jerusalen te Jesuse

¹ Nopol xkꞌotikix ta Jerusalen a, och kꞌoel ta chꞌin jtejklum Betfage sbiil te ba wits Olivailtike. Te Jesuse la stikon bael chaꞌtul te jnopojeletik yuꞌune.

² La yaltalanbe: —Baanik ba chꞌin kolonya te ya kiltike. Teꞌ chukul ya me xkꞌo ataik jkojt meꞌburu sok xchꞌin yal. Polaik y chechbikon tal.

³ Teme ay machꞌa ay tut ya yalbeyex yuꞌune, albeyaik: “Jaꞌ ya xtuun yuꞌun te Kajwaltike. Ya me sujtesbeyat tal ta ora”, ya me awutik —xchi te Jesuse.

⁴ Jich ya xkꞌot ta pasel te tut yaloj jilel te jꞌalwanej yuꞌun te Diose te la stsꞌiba jile:

⁵ “Albeyaik te mukꞌul jtejklum Sion: ‘Ilawilik talix te rey awuꞌunike. Chꞌin yakꞌoj sba. Moem tal ta buru, ta jkojt chꞌin buru, yal te ijkatsom chambalame,’ uta me”, xchi.

⁶ Jicha bajtik te chaꞌtul nopojeletike. Jich a spasik te tuti altalanbot bael yuꞌun te Jesuse.

⁷ La yikꞌik tal te meꞌburue sok te yale. La slimbeyik skꞌuꞌ-spakꞌik ta spat y mo a te Jesuse.

⁸ Bayal genteetik teꞌa la slimbeyik skꞌuꞌ-spakꞌik ta be, te yane la sbojik tal skꞌabkꞌab teꞌ la slimik ta be.

⁹ Te machꞌatik nailajemik baele sok te machꞌatik patilajemike la yawutayik: —¡Bayal slekilal! ¡Ben tsaꞌam slekil te machꞌa talem ta skuenta te Kajwaletike! ¡Bayal slekilal te chꞌul Dios te ay ta chꞌulchane! —xchiik ta yawutayel.

¹⁰ Te kꞌalal och bael ta Jerusalen te Jesuse, xchꞌeꞌet nax lijkel spisil te jtejklume. Ben bayal machꞌa a sjojkꞌoy: —¿Machꞌa me a to? —xchiik.

¹¹ Te genteetike la yalik: —Jaꞌ te jꞌalwanej yuꞌun Dios te Jesus sbiile te talem ta jtejklum Nazaret ta estado yuꞌun Galilea —xchiik.

Jesus la yakꞌ ta akꞌel ta jkuenta te mukꞌul temploe

¹² Te Jesuse och bael te ba mukꞌul templo, la sten lokꞌel spisil te machꞌatik yipal ta chonbajel y manbajel teꞌae. La xbalchꞌunbe xmexaik te jel-takꞌinetike, sok la xbalchꞌunbe snaktajib te machꞌatik yipalik ta xchonel palomae.

¹³ Y la yaltalanbe: —Jich tsꞌibabil ta Sjun Dios: “Te jnae jaꞌ snaul skꞌoponel Dios sbiil”, xchi me. Pero te jaexe sujtix awuꞌunik ta xchꞌen jꞌelekꞌetik —xyut.

¹⁴ Teꞌ ta templo tijilajik tal ta stojol Jesus choketik sok koxoetik, y la slekuteslan.

¹⁵ Te statal-saserdoteetike sok te maestroetik yuꞌun te mantaliletike la yilik te milagroetik te ya spas te Jesuse. Sok ilinik kꞌalal la yaꞌiyik te xꞌawlajan ta templo te chꞌin untike. Jich a yalik ta stojol te Jesuse: “¡Bayal slekilal te stsꞌumbal jDavide!” xchiik.

¹⁶ Jich te saserdoteetik la yalbeyik te Jesuse: —¿Me ya awaꞌibe sluwar te tut yipalik ta yalel te chꞌin untike? —xchiik. La sjakꞌbe te Jesuse: —Yak, ya kaꞌi. ¿Meꞌn maꞌyuk awilojik ta Sjun Dios te jich ay skꞌoplal to te jich tsꞌibabil?: “Te skꞌayoj te chꞌin untike sok te chꞌin alaletik te ya to xchuꞌunej ya yalik te ben tsaꞌam ta kꞌayojinel te achꞌul-biile”, xchi me —xchi te Jesuse.

¹⁷ Y la sjileslan y bajt ta jtejklum Betania. Teꞌ kꞌax ajkꞌubal yuꞌun a.

Te Jesuse la yut te ikux te maꞌyuk site

¹⁸ Pajtajel to a te kꞌalal sujt xan bael ta mukꞌul jtejklum te Jesuse, aꞌbot wiꞌnal.

¹⁹ La yil pejt ikux te ay ta tiꞌbee, tijilaj bael teꞌa. Pero maꞌyuk sit a stabe. Puru yaꞌnimal nax ay. Te Jesuse la yalbe te ikuxe: —Ni jaymel ya awakꞌ asit —la yut. Y tsꞌin a takej te ikuxe.

²⁰ Te kꞌalal jich a yilik te jnopojeletike, cham a yaꞌiyik y la sjojkꞌobeyik te Jesuse: —¿Tuꞌun te ikuxe te tsꞌin a takeje? —xchiik.

²¹ Te Jesuse la sjakꞌtalanbe: —Jamal ya kalbeyex, teme ay xchꞌuunel awoꞌtanik te jich ya xkꞌot ta pasele sok teme makꞌ ya awal ta awoꞌtanik te ma jichuk ya xkꞌote, ya xkꞌot ta pasel awuꞌunik te tutꞌil la jpasbe te ikuxe. Sok jich ya xkꞌot ta pasel awuꞌunik euk teme ya awalbeyik te wits to: “Lokꞌan bael liye, chꞌoja aba ochel ta mar”, teme ya awute.

²² Spisil te tut ya akꞌanbeyik te Diose ya yaꞌbelex teme jich xchꞌuunej awoꞌtanike —xchi te Jesuse.

Yichꞌoj yaꞌtel te Jesuse

²³ Och bael ta templo te Jesuse. Yipal ta pꞌijuteswanej a, tal ta kꞌoponel yuꞌun te statal-saserdoteetike sok te moletik yuꞌun te jtejklume. La sjojkꞌobeyik: —¿Tuti awaꞌtel awichꞌoj ta spasel spisil to? ¿Machꞌa yaꞌbeyat awaꞌtel? —xchiik.

²⁴ La sjakꞌ te Jesuse: —Jichon euk, ay tut ya jojkꞌobeyex: ¿Machꞌa tikonot tal yuꞌun te Juan te la yakꞌ ichꞌjaꞌe? ¿Me jaꞌ te Diose o winketik?

²⁵ Teme ya awalbikone, ya me kalbeyex euk te tut kaꞌtel kichꞌoj ta spasel to —xchi. Jich a lijk yalbe sbaik stukelik: —Teme ya kaltik te Dios la stikon tale, ya me yalbotik: “¿Tuꞌun te ma la achꞌuunik te tuti yale?” ya me yutotik.

²⁶ Sok ma spas ya kaltik te winketik a tikonot tal yuꞌune, yuꞌun ya xiꞌtik te jtejklume, yuꞌun ya xchꞌuunik te jaꞌ jꞌalwanej yuꞌun Dios te Juane —xchiik ta yaꞌabiyanel.

²⁷ La yalbeyik tsꞌin te Jesuse: —Ma jnaꞌtik —xchiik. La sjakꞌ euk te Jesuse: —Jichon euk ma xkalbeyex te tut kaꞌtel kichꞌoj ta spasel to —xchi.

Te seña-kꞌop te chaꞌtul te nichꞌaniletike

²⁸ La sjojkꞌolanbe te Jesuse: —¿Tut ya awalik yuꞌun to? Ay jtul winik te ay cheb xnichꞌnab. Jich a yalbe te jtule: “Jnichꞌan, ya me xbaat ta aꞌtel ora to lum ba kubailtike”, xyut.

²⁹ La sjakꞌ te xnichꞌane: “Ma jkꞌan”, xchi. Pero ta patil la yakꞌ yajtal yoꞌtan yuꞌun te tuti yalbe te state, y jicha ba aꞌtejuk.

³⁰ “Te tatile ba yalbe xan te jtul xan xnichꞌane. La sjakꞌ te skereme: “Jichuk, tat, ya xboon”, xchi. Pero maꞌ bajt.

³¹ “¿Machꞌa ta xchebalik ya awaꞌi te la spasbe te tut la skꞌan yoꞌtan te state? —xchi te Jesuse. La sjakꞌik: —Jaꞌ te naile —xchiik. Te Jesuse la yal: —Jamal ya kalbeyex, te jkꞌan-tojemaletike sok te jmulawil-antstike ya me xnalajik ochel awuꞌunik te ba ay ta mantal te Diose.

³² Jich te Juan Akꞌichꞌjaꞌe tal snojpesex tut a te tsaꞌam ta pasele, pero ma la achꞌuunik te tuti yalbeyexe. Yan te jkꞌan-tojemaletike sok te jmulawil-antstike la xchꞌuunik stukelik. Yan te jaꞌexe manchuk me la awilik te jich yipal kꞌoel ta pasele ma la asujtes awoꞌtanik te yauk achꞌuunike.

Seña-kꞌop te jꞌatꞌeletik te ma tsaꞌamuk yoꞌtanike

³³ “Aꞌibeyaik sluwar yan seña-kꞌop: Te yajwal pinkae la stsꞌun yubailtik ta slum y la spasbe smakteꞌul. La xchap jun luwar ba ya spitsꞌbe sit te yubae, sok la spas slotstajib yuꞌun ya skanantay te yubailtike. La yakꞌ jil ta lokꞌel yuꞌun te jmajan-lumetike y bajt ta jakal.

³⁴ “Kꞌalal la staix yora ta tulel sit te yubae, la stikon yaj-mantal ta skꞌanel ta stojolik te jayeb slojkꞌil te slume.

³⁵ Te jꞌaꞌteletike la stsakik te jmantaletike, la smajik te jtule, jtul a milik, y jtul a swolik ta ton.

³⁶ Te yajwal lume la stikon xan bayal yan jmantaletik. Te jꞌaꞌteletike jich mismo spasbeyik te tutꞌil la spasbeyik te yane.

³⁷ “Patil te yajwal-lume la stikon bael te batsꞌi xnichꞌane, yuꞌun la yal ta yoꞌtan: “Jaꞌ me ya xꞌakꞌot ta jkuenta te jnichꞌane”, xchi ta yoꞌtan.

³⁸ “Te kꞌalal la yilik te jaꞌ xnichꞌan te yajwal-lum te talemixe, sok la snaꞌik te stukel ya xjil ta skuenta te lume, jicha lijk yalbe sbaik: “Jaꞌ to jaꞌ ya yichꞌ jilel te lume. Jaꞌ lek ya jmiltik yuꞌun joꞌotik ya kichꞌbetik jilel te slume”, xchiik.

³⁹ Jich a stsakik, la slokꞌesik bael ta spat te ubailtike y la smilik.

⁴⁰ ¿Tut xchaex te jaꞌexe? ¿Tut ya spasbe ya awaꞌi te aꞌteletik te yajwal-lume te tut ora ya xtale? —xchi te Jesuse.

⁴¹ La sjakꞌik: —Ya me xtal smil jilel te jꞌaꞌteletike te ma tsaꞌamuk yoꞌtanik, sok ay me yan jꞌaꞌteletik te ya yaꞌbey smajan te slume te jaꞌ ya snaꞌik yaꞌbeyel slojkꞌil te jujun kosecha te jayeb ya xlokꞌ te yubae —xchiik.

⁴² Te Jesuse la yaltalanbe: —¿Me ma awilojuk ta Sjun Dios te jich ya yale?: “Te ton te ma tsaꞌamuk a yilik te jꞌalwaniletike, jaꞌ yipajib chikin-na a kꞌotix stukel. Jaꞌ a yakꞌ kꞌotuk ta pasel te Kajwaltike. Ben tsaꞌam slekil ya kiltik”, xchi me.

⁴³ Jaꞌ yuꞌun ya kalbeyex te jaꞌexe, ya me spojbelex awaꞌtelik te ba ay ta mantal te Diose. Jaꞌ me ya xkꞌot ta skuenta te machꞌatik ya snaꞌik spasel te tut ya skꞌan yoꞌtan te Diose.

⁴⁴ Te ton te ya kale, tem ay machꞌa ya xtꞌuxaj ta sbae, teꞌ me xkꞌo pꞌuyuk a. Yan teme ya xtenot yuꞌun te tone, mel nax me polvo ya xjil yuꞌun —xchi te Jesuse.

⁴⁵ Te statal-saserdoteetike sok te fariseoetike te kꞌalal la yaꞌibeyik sluwar te seña-kꞌop te la yal te Jesuse, sujt sjolik te stukel skꞌoplalike.

⁴⁶ Yoꞌtanuk kꞌan stsakik te Jesuse, pero ya xchiik yuꞌun te genteetike, yuꞌun kꞌoem ta yoꞌtanik te jaꞌ jꞌalwanej yuꞌun Dios te Jesuse.